Mak 6

Nazaret banɛ ma bázɛ Yesu u

1Gi Yesu asɛ niklɔ ɛ, edzi atrɛ ní Nazaret, yɛ kepea. Yɛ badɔkpasi ba bekuni yɛ kude. 2Ní Lizemɔniwe le aʋa ɛ, Yesu ekpese bidɔ kubasɛ ní Yudanɛ ma ɔtsaklɔ. Banɔ glegle beze níklɔ, lɛ gi benu yɛ bidɔbasɛbasɛ ʋɛ ɛ, bɛwɔ yaa. Lɛ beʋi si, “Nifɔ yɛ kɔ adɔ ni eboa la ya petee? Kuboeteo liɔ gi bɛki yɛ ɛ, nifɔ kwidɔ? Kitɛ xe izɛɛtani enugutseboe la kubitɛ nite e? 3Aní osetsi yɛ iliɛ ya lò o? Ani Maria yɛ obinyimee, gi yɛ benemi ba benu Yakobo, Yosef ni Yuda ani Simon lò o? Lɛ aní yɛ benemidzɛ ba bali blɔ kusi lò o?” Lɛ loso e, bázɛ yɛ ɛ.

4Nite si Yesu asi ba si, “Bizɛkpɛ kubùbù ní Aya yɛ beboedoplɛ ba su ní ɔkɔ kakaa. Pɔ̀ ní ba kepea ɛ, ba akɔanɛ ma nì ba benete ba kusi kɔ ɛ, beboedoplɛ ba béyi kididɔ ní ba aŋu mɛ ɛ.”

5Yesu ɔ́tani enugutseboe atɔtɔ kubitɛ níklɔ ɔ, sani si ɔtrɔ yɛ awla ní banɔ klakla batɔ aʋa lɛ bɛhaya ɛ. 6Litu ye kugyɔ si kuziŋa kúze ní banima mɛ ɛ.

Yesu akpɛ badɔkpasi liɔfɔ ni tiaʋa ba

Lɛ Yesu aklani kumami uliɔ klɔ gi kwiklani Nazaret i, kɔ mɛ xe abasɛ bidɔ mɛ ní kɔ petee me e. 7Yesu axwa badɔkpasi liɔfɔ ni tiaʋa ba kpɛ likpɔ, lɛ alɛ ba tiaʋa tiaʋa a xe akpɛ ba ɛ. Aki ba kigagla ní ifuɛfuɛ zimizi ne aʋa. 8Lɛ akpɛ ɔsã aki ba si, “Xe mleku kudeo me e, ɔnɔnɔ ɔkivu kididɔ ɛsani ose vuga vuga. Ɔnɔnɔ ɔkikɔ liklã̀ loo kudɔʋí kepimi loo kibɔ ɛtɔtɔ kpɛ isu kura a. 9Mlakpɛ afɔkpa fãa, pɔ̀ ɔnɔnɔ ɔkikɔ liwu ʋla evu u. 10Asi ba dzɛ si, Kepea lia klɔ mɛ gi biakpɛ mlɔ wolaa ɛ, mleze ka mɛ kɔkpɛni mlɔ lisɛpoe le e. 11Xe mleku ɔma ɔtɔ mɛ ɛ, xe bázɛ mlɔ ɛ, loo bápɛ si bɛzi mlɔ liboe le e, mlasɛ ní ɔmaa lɔ klɔ mɛ. Xegi mlɛɛsɛ ɛ, mlekple ovugbo lo mlɔ kukliseo aplɛ. Bɛ biaze kiseʋi gi mledu ní ba su i.” 12Lɛ loso e, badɔkpasi ba bɛtrɛ, lɛ bɛpani liboe le klanɔ si, ɔnɔ kakaa okyi ɔna mɛ ɛ. 13Bɛkpikpini ifuɛfuɛ zimizi ne dono ní banima ma mɛ. Bɛsra kumu iiki banyanya glegle, lɛ bɛyɔ ni ba ɛ.

Yohanes Kuni yo ɔkpɛkpɛɛ yɛ kutse o

14Okusi ye Herodes enu eboa la klɔ gi ɛzɛtrɛ la aʋa a, lɛ ese linu si Yesu yɛ linyi ne liyi hoo. Banɔ batɔ ba kugyodi yo ní Yesu su kwize si Yohanes Kuni yo Ɔkpɛkpɛ yɛ edzì ligbã o lɛ loso kigaglaɛ liɛ ya kilɛ ní yɛ awla si ɔbitɛ enugutseboe ala ya nite e.

15Kokoko e, banɔ batɔ fɛ begyo edi si, “Eliya boŋ iliɛ klɔ ɔ.” Banɔ dzedze ba si, “Aya yɛ oboedoplɛ onu ŋwisi kiliɛ gi beboedoplɛ ba beze ni kanaa mɛ kinɛ ɛ.”

16Pɔ̀ gi Herodes enu liboe le e, yɛ kɔɔ asi sì, “Yɛ onu Yohanes Kuni yo ɔkpɛkpɛɛ! Maki bɛti yɛ litukpo le, pɔ̀ edzi ligbã a!” 17Okusi ye Herodes ɔtutɔ aki si bevu Yohanes, lɛ yɛ ke aki bɛkpɛ yɛ bibɔ ʋɛ, xe bɛkpɛ yɛ ligba a. Yedze Herodia loso ebu ɔkli lɔ klɔ ʋa. Herodia eze Filipo yedze, xe Okusi ye Herodes azɛ yɛ agbanɔ ɔ. Lɛ Filipo ni Okusi ye Herodes pɔ̀ ɛ, beze benemi. 18Lɛ Yohanes Kuni yo ɔkpɛkpɛ azɛ si Herodes sì, “Lípɛ si wɔazɛ wonemi ye yedze ɔgbanɔ ɔ.”

19Liboe lɛ klɔ loso e, Yohanes yɛ liboe lizeeyeʋi Okusi ye Herodes yedze Herodia isu nyani nyani gi azaapɛ kudeonu si yiye ye e. Pɔ̀ Okusi ye Herodes loso e, ɔ́zɛmɔ kudeonu ní yɛ su u. 20Lɛ Okusi ye Herodes pɔ ɛ, azeese Yohanes, lɛ ese linu si etè si Yohanes eze ɔnɔ gbã, lɛ yɛ isu fɛ idra ní Aya Ɔfuɛfuɛ nɔ mɛ. Lɛ loso e, edi le aʋa si kididɔ kísa Yohanes kura ní ligba lɛ ɛ. Yohanes yɛ eboe pani pani la ezetu Okusi ye Herodes lipoe kakaa gi enu la ɛ; pɔ̀ fɛ azɛɛpɛ si yinu la.

21Gɔgɔɛ, kudeonu liɔ gi Herodia azaapɛ ɛ kwidra ɛki yɛ. Liba lɛ mɛ si Okusi ye Herodes azaaŋa yɛ lipɔwe le. Niteme si edu ɔkplɔ aki yɛ baʋaŋaa klɔ gi beze banɔ ʋidi ba, baguta ba baka ba ni Galilea kesea mɛ banɔ gbɔgbɔ ʋa petee. 22Liwe lɛ klɔ ɔŋa klɔ ɛ, Herodia yebidzɛʋiɛ eyo livu ne gi isami iku Okusi ye Herodes ni yɛ ɔkplɔ nɔ su bezeze ʋa mɔmɔmɔ. Lɛ loso e, Okusi ye asi obidzɛʋi yɛ si, “Ege wɔpɛ ɛ dɔni mɛ iwla mɛ ɛ? Kidɔ kakaa gi kiku wɔ kule e, ʋi; maki wɔ kɛ.” 23Niteme si aka bitamu glegle aki ɔnuvɔɛ, lɛ atrɛ lɛ aʋa si, “Matàni kidɔ kakaa si, kidɔ kakaa gi wɔaʋi i, vaa xegi mɛ kaʋaŋaa kapɛ tiele fɛ ɛ, maaki wɔ kɛ.”

24Niteme si, ɔdzɛʋi yɛ edo atrɛ ní yene klɔ lɛ azeeʋi ye si, “Mone, ege maaʋi i?”

Niklɔ yene asi yɛ si, “Ʋi Yohanes Kuni yo Ɔkpɛkpɛ yɛ litukpo le!”

25Ɔdzɛʋi yɛ akɔsi edzi atrɛ ní Okusi ye Herodes klɔ, lɛ asi yɛ si, “Mapɛ si kɔ Yohanes Kuni yo ɔkpɛkpɛ yɛ litukpo le trɔ ní kitɛɛ aʋa ki mɛ tɔ mizɛ ablahate!”

26Liboe le likɔ si Okusi ye Herodes awɔ ni asigaga mɛ. Pɔ̀ yɛ bitamu ʋɛ gi aka ní yɛ banɔxwaxwa ba aŋu mɛ loso e, ɔ́pɛ si yigbe ɛki yɛ ɛ. 27Niteme si akpɛ yɛ ɔnɔye tole kyɔŋ si odi lɛ aʋa si yatsa Yohanes litukpo le amanɔ. Ɔnɔyee asɛ atrɛ niklɔ gi bɛkpɛ Yohanes ní ligba lɛ ɛ; lɛ atsa yɛ litukpo le e. 28Lɛ akɔ lɛ atrɔ ní kitɛɛ aʋa a xe akɔ amanɔ ɛ. Akɔ linɔtukpo le aki ɔdzɛʋi yɛ, lɛ yɛ fɛ akɔ lɛ aki yene e. 29Gi Yohanes yɛ badɔkpasi ba benu liboe le e, bɛtrɛ, lɛ bɛzɛkɔ Yohanes okpo ye zevive e.

Yesu aki banɔ akpe tietsu bidɔŋaŋa

30Yesu yɛ banɔkpɛkpɛ ba bɛtrɛ, bedzi; lɛ bebatsani yɛ ɛ. Bɛsi yɛ eboa la gi etrɛ lɛ aʋa ani bidɔ bɛklɔ gi bɛbasɛ petee. 31Lɛ gi banɔ glegle bɛzɛtrɛ xe batɔ fɛ bɛzɛba ɛ, Yesu ni yɛ badɔkpasi ba bámɔ kudeonu tete xe biaŋa bidɔ fɛ ɛ. Lɛ loso asi ba si, “Mlaki tɔ kubu lidze dzaa atɔ mlazeze mɔni taʋɛ.” 32Bemu iku katapokpa atɔ mɛ lɛ beku kudeo me etrɛ ní ɔkutɔ gi ɔnɔnɔ óze e.

33Pɔ̀ fɛ ɛ, banɔ glegle gi bɛmɔ ba a gi bɛzɛsɛ̀ ɛ, bɛmɔ ba egyesi kyɔŋ. Banima bɛdɔ ima nɛ petee me, besega limu ne kutu yɔ ni ikli lɛ lɛ bezeeku limu ne oge lɔ kɔlɔ kpɛ ɔtɔ ɛki Yesu ni yɛ badɔkpasi ba. 34Gi Yesu edo ní katapokpaa mɛ xe amɔ linɔkpi le e, ba liboe liga yɛ asigaga lɛ ese linu si beze ŋwisi iʋesi gi ɔʋadi óze ní lɛ awla kinɛ ɛ. Lɛ loso ekpese ba bidɔ glegle kubasɛ. 35Lipoe lɛ gi kelea kekpese kublo e, yɛ badɔkpasi ba bɛba lɛ bɛsi yɛ si, “Niya ebu lidze” lɛ “Kelea keeblo nì blo. 36Lɛ loso e, ki tɔ banima basɛ tɔ batrɛ ní inyrɔɔ nɛ ani imaɛ nɛ klɔ gi iklani niya mɛ ɛ tɔ bazɛpɛ kiditɔ aŋa a.”

37Lɛ Yesu asi ba si, “Mlɔ tutɔ mlaki ba bidɔ tɔ baŋa.” Lɛ bɛsi yɛ si, “Kibɔɛ liɛ gi kwiazizi ní ba aklã na litukpo e, kiana ɔnɔ tole yɛ badzidzi ɔgɔtiaʋa liʋɛ ɛ!”

38Lɛ Yesu eʋi ba si, “Aklã tasɛ alɛ mlɔ awla a? Mlazedi.” Gi bedzi itrɛ ɛ, lɛ bɛsi yɛ si, “Aklã tetsu ani akpa taʋa.”

39Lɛ Yesu asi yɛ badɔkpasi ba si baki tɔ linɔkpi le lize kesea ní ahakpɔ mɛ ní siwa sɛ aʋa. 40Lɛ loso e, banima beple eze ní ahakpɔ mɛ, ikutɔ banɔ alafa, ikutɔ avi tetsu. 41Lɛ Yesu akɔ aklã tetsu la ni akpa taʋa la ɛ. Efeke yɛ aŋu na edi lifunu ne, lɛ edo Aya ɖase e. Ayaʋi aklã na lɛ avini akpa la fɛ mɛ xe akɔ aki yɛ badɔkpasi ba si balɛ aki linɔkpi le petee e. 42Ɔnɔ kakaa aŋa, gi eke e. 43Pɔ̀ gi bɛŋa pɔ ɛ, badɔkpasi ba bɛkpɛ bidɔ mɛ gi bɛŋa ɛgɔ likpɔ, gi biyi kusɔʋi liɔfɔ ni tuʋa a. 44Ní linɔkpi lɛ klɔ gi liŋa bidɔ mɛ mɛ̀ ɛ, benyime ba beze akpe tietsu.

Yesu aga kuni yo aʋa

45Lɛ Yesu akpɛ yɛ badɔkpasi ba ní katapokpa me tɔ bekú yɛ ɔtɔ nɔ atrɛ ní Betsaida ní limu ne kapɛ ʋla. Yesu apɛ si yikpɛ linɔkpi le kude e 46Gi akpɛ banima kude pɔ́ ɛ, emu atrɛ ní lito etɔ aʋa si yixwa Aya. 47Gi kelea keblo e, katapokpaa keze ní limu ne kusi yo; pɔ̀ Yesu tole eze ní oge no o. 48Amɔ si yɛ badɔkpasi ba bɛzetutru ni katapokpaa ní limu ne aʋa lɛ ese linu si bɛtsani liwɔ lɛ gi lifu idɔni niklɔ gi bɛzɛtrɛ ɛ. Lɛ loso olezatɔ nɔ ŋwisi ɔkukɔ tɔpu nɔ kimemee me kinɛ ɛ, Yesu aga kuni yo aʋa aba tsani ba. Nya apɛ si yiza ba aʋa xe e. 49Pɔ̀ gi bɛmɔ yɛ ɛ gi azɛɛga kuni yo aʋa ɛ, begyodi si okpo bɛmɔ, niteme si bese lifu ne. Lɛ bɛkpɛ ozi lo si, “Okpo ye!” 50Gi bɛmɔ yɛ ɛ, belulu pɔ̀

Yesu asi ba ni le onu klɔ si, “Mlamɔ ɔna! Mɛ iliɛ ya! Mlakíse lifu u!” 51Lɛ emu eku apɔni ba ní katapokpaa mɛ ɛ. Lɛ onu klɔ ko e, liwɔ lɛ onu líyɔ miɔɔ. Badɔkpasi ba onugu etse 52lɛ ese linu si bénu liboe lɛ gi likpasi ní banɔ akpe tietsu ba ba kaʋadi ya mɛ ese e. Ba begyodi ʋa bátani liboe le kuvu kura.

Yesu ayɔ ni banyanya ba ní Genesaret

53Yesu ni yɛ badɔkpasi ba bɛtsa limu ne lɛ beple eku ní Genesaret kesea mɛ; lɛ bɛka katapokpaa ní limu ne kutu yɔ ɛ. 54Agi beple ní katapokpaa mɛ pɔ́ ko e, banima bɛmɔ Yesu igyesi kyɔŋ. 55Lɛ loso e, banima bese eklani kesea mɛ petee niteme si ɔkɔ́ kakaa gi benu si Yesu ɔlɛ ko e, befeke ba banyanya ba ɛmani yɛ ní ba inyanyatɔsi lɛ aʋa. 56Lɛ ɔkɔ kakaa gi Yesu atrɛ ɛ, ní kumami yɔ mɛ, ima ʋidi ne me ani inyrɔ nɛ aʋa ko e, banima bɛkɔ ba banyanya ba ɛtsinɔ ní ablɔ ʋa aʋa. Kɔ bɛki Yesu litukpo si ɔki tɔ bagbɔni yɛ awu la kutu yɔ. Lɛ banama petee gi bɛgbɔni yɛ ɛ, ba isu ya mɛ iku igagla a.

Currently Selected:

Mak 6: avn

Highlight

Copy