Mak 7

Bakatsitsi ba bidɔbasɛbasɛ ní ba egoʋi la su u

1Gi Farisianɛ ma ni Ɔsã nɔ badɔbasɛ batɔ bɛdɔ ní Yerusalem xe bɛba ɛ, bexogo ní Yesu su. 2Bevu aŋu si Yesu yɛ badɔkpasi batɔ bɛzɛŋa bidɔ mɛ ni awla gi béplo ní ba ɔkɔ lɔ onu u. Lɛ ese linu si ba ɖii kɔ béplo awla la kiliɛ gi Farisianɛ ma bɛtrɔ ɛki ɔnɔ kakaa kinɛ ɛ.

3Farisianɛ ma ni Yudanɛ ma pɔ́, bekuni ba bakatsi ba bidɔbasɛbasɛ bɛ kude, nite si xegi béplo awla la ní ligoʋi le onu i, bátraŋa bidɔ ɔ. 4Lɛ kidɔ kakaa gi bedzi idɔnɔ kedzia mɛ ɛ, linu si beplo ke ni tɔ beplo ba awla la ní ɔtɔpu kɔ xe ableke biaŋa bidɔ ɔ. Isã dzedze itɔ gi ba bakatsi ba bɛkpɛ ɛplɛ, ŋwisi kupliʋi yo, kudɔtɔfukpoo, ni kudɔkpaa liɔ mɛ bizɛŋa bidɔ mɛ ɛ, bɛ kiploploe ní ba egoʋi la onu petee, bɛzɛbitɛ ní lɛ aʋa.

5Nite si Farisianɛ ma ni Ɔsã nɔ badɔbasɛ ba beʋi Yesu si, “Ege lɛ loso xe wɔ badɔkpasi ba kɔ bévu blɔ bakatsi ba ba egoʋi la gi bɛkpɛ ɛplɛ ɔzɔ mɛ na a, xe ba kɔ bizɛɛŋa bidɔ ni awla gi la su ádra na a?”

6Lɛ Yesu ebu lɛ onu si, “Yesaya liboe le ligyɔ koŋ gi amɔ liboe edo aplɛ ní mlɔ su i! Mlɔ banɔ aŋu mɛ beboebitɛ mlenu, kiliɛ gi aŋwlimi aplɛ si i:

Aya si, “ ‘Banɔ ba ya ɛ,

enugumeboe ko bɛkɔ ɛlɔ mɛ ɛ;

pɔ̀ ba ina nɛ kɔ ívu me kura.

7Líziã si besumu me e.

Lɛ ese linu si banima isã nɛ aʋa ko bizɛbitɛ

ŋwisi lɛ inu Aya yɛ isã nɛ na a!’

8“Mlɛyurɔ Aya yɛ isã nɛ, lɛ mlevu banima isã nɛ ɔzɔ mɛ ɛ.”

9Lɛ Yesu atrɛ yɛ liboe le aʋa si, “Ni mlɔ kuboeteo me e, mlɛyurɔ Aya isã nɛ ɛplɛ lɛ mlevu isu i kɔ ni mlɔ tutɔ mlɔ isã nɛ ɛ. 10Lɛ ese linu si, Mose edo aplɛ si, ‘Bù wɔka ni wone.’ Lɛ edo dzɛ si, ‘Ɔnɔ kakaa gi aadu onugu yurɔ yɛka loo yene e, lilɛ si beye ɔniliɛ klɔ.’ 11Pɔ̀ mlɔ si, xegi kidiitɔ kilɛ ɔnutɔ awla gi aatani kɛ kukɔ odi yɛka loo yene aʋa a, pɔ̀ xe asi ba si kinu Aya kinɛ ɛ, 12kɔ libasɛ si mlɛki yɛ kudeo si ɔkipɔni yɛka loo yene e. 13Nite mlɛbitɛ, gi mlevu mlɔ bakatsi ba egoʋi la awla a, xe mlɛki si Aya isã nɛ íyi kididɔ tɔɔ ɔ. Lɛ ɛ, eboe glegle dzedze alɛ ŋwisi la ya kinɛ gi mlɛzɛbitɛ ɛ.”

Yesu apani ní kidiliɛ gi kizelulu ɔnɔ su i

14Dzɛ ɛ, Yesu axwa linɔkpi le amani isu ya lɛ asi ba si, “Liboe lɛ gi matrapani i, mlɔ petee mlata kutu tɔ mlenu lɛ ese. 15Kidiliɛ gi kidɔ oge no o, xe kiti iku ɔnɔ mɛ ɛ, aní kɛ kiaki si ɔnɔ aalulù ní ɔkɔ lɔ onu u. Boŋu i, kidiliɛ gi kidɔ ní ɔnɔ mɛ ɛ, kɛ kizelulu ɔnɔ. 16Ɔniliɛ gi kutu kuli yɛ ɛ, atɔ onu!”

17Gi asɛ ní linɔkpi le su xe atrɛ ní kepea mɛ ɛ, yɛ badɔkpasi ba beʋi ye si obu abee liɛ ya ese ɔki ba. 18Yesu eʋi ba si, “Kɔ mlɔ fɛ mlénu eboa la ya ese na a? Kidiliɛ gi kidɔ oge no e, kitrátani ɔnɔ kululu u. 19Lɛ ese linu si kidiliɛ klɔ ɛ, kitiiku ní yɛ ɔna nɔ mɛ ɛ; pɔ̀ kiza eku ní yɛ lipo le me kɔ kido eza ní yɛ ɔnɔse lo me e.” Liboe lɛ gi Yesu apani nite e, libasɛ si kidɔŋaŋa kakaa ɛ, kɛ su kidra gi biaŋa fãa a.

20Lɛ atrɛ ní yɛ liboe le aʋa si, “Kidiliɛ gi kido edɔní ɔnɔse lo me e, kɛ kizelulu ɔnɔ ɔ. 21Lɛ ese linu si ɔnɔ yɛ kimɛ ɛ mɛ, lɛ dɔni yɛ ɔna nɔ mɛ begyodi nyani nyani ʋa bizɛdɔ edo. Lɛ ba bizɛgbani ɔnɔ ɛkpɛ ní eboe zimizi na kubitɛɔ mɛ ɛ, gi la mɛ atɔ enu kalɔa kulɔ̀lɔ, kuze, kunɔye, kihasiwawa, 22kuŋazi, litukpomegagla, kunɔmeno, onugududu, kunɔmobu, kaŋuzã, banɔ enyi kuxwaxwa, kusufeke ani kugadɔdɔ. 23Eboe dovo la ya petee ɛdɔ ní ɔnɔɛ kimɛ ɛmɛ lɛ la izelulu ɔnɔ ɔ.”

Ɔdzɛ ɔtɔ yɛ kuziŋaa ní Yesu me

24Lɛ kede e, Yesu asɛ klɔ lɛ atrɛ ní Tiro bidɔ mɛ. Eti eku kepe katɔ mɛ. Ɔ́pɛ si ɔnɔnɔ ote si yɛ ɔlɛ ní klɔ ɔ. Pɔ̀ ɛ, ɔ́tani isu ya kukpo o. 25Ɔdzɛ ɔtɔ gi ɔfuɛfuɛ zimizi eze ní yɛ obidzɛʋi ɔtɔ mɛ ɛ, enu si Yesu aba ni klɔ, lɛ aba Yesu klɔ kyɔŋ lɛ edu aklamasi na kese ní yɛ ketu ya ɛ. 26Ɔdzɛɛ eze Heladze gi bɛpɔ ní Foenike bidɔ mɛ mɛ̀ ní Siria kesea mɛ ɛ. Aki Yesu litukpo si ɔkpikpini ɔfuɛfuɛ zimizi no dono ní yɛ obidzɛʋi yɛ mɛ ɔki yɛ. 27Pɔ̀ Yesu asi ɔdzɛɛ si, “Ki tɔ baki banuvɔ ba bidɔŋaŋa ʋɛ kpɛ ɔtɔ. Líma si bakɔ banuvɔ ba bidɔŋaŋa ʋɛ tɔ bakɔ aŋwia plɛ aki kudroʋio o!”

28Lɛ Heladzee ebu le onu aki yɛ si, “Ee Blɔ Ɔkaɛ, lilɛ te xunyɔ; pɔ̀ xegi banuvɔ ba bɛɛŋa bidɔ mɛ ɛ, bitɔ bizɛwɔli kokoko; niteme si kudroʋio fɛ ɛ, kuzɛɛŋa kesea binɛ mɛ ní ɔkplɔ nɔ ese e.”

29Lɛ Yesu asi ɔdzɛɛ si, “Kɔkpɛ liboe lɛ gi wɔpani loso e, dzitrɛ wɔ kepea mɛ. Xe woku i, wɔamɔ si ɔfuɛfuɛ zimizi no edo eza ní wɔ obidzɛʋi yɛ mɛ.”

30Gi ɔdzɛɛ eku yɛ kepea mɛ ɛ, amɔ Yebi ye gi ɔfini yɛ ɔtɔsi lɔ aʋa a, gi ɔfuɛfuɛ zimizi no edo eza ní yɛ mɛ ɛ.

Yesu ayɔ ni otoku omúmu ɔtɔ

31Lɛ kede e, Yesu asɛ ní Tiro bidɔ mɛ mɛ̀, lɛ aga Sidon xe aba Galilea Limu ne kutu xe azaatrɛ ní Ima Liɔfɔ lɛ bidɔ mɛ mɛ̀ ɛ. 32Banɔ batɔ bɛgbani onyime ɔtɔ gi ɔ́zenu i, lɛ ɔ́zɛtani kunugu yo kugu fɛ ɛmani Yesu klɔ ɔ; lɛ bɛki Yesu litukpo si ɔtrɔ awla ní yɛ aʋa a. 33Lɛ Yesu ebu onyimee lidze dzaa ní banima kusi i. Yesu akɔ yɛ biwlaʋi ʋɛ akpɛ ní onyimee batu ʋa mɛ, lɛ ebu sita sɛ; lɛ agbɔni onyimee kinemi ye. 34Lɛ Yesu efeke aŋu na edu lifunu ne, egu hũu, lɛ asi onyimee ní si Hebri sɛ mɛ si, “Hefata!” Lɛ ese linu si, “Dra a!”

35Lɛ onu klɔ ko e, onyimee yɛ batu ʋa bɛdra, lɛ yɛ kinemi ye ika lɛ igyɔ lɛ ekpese kunugu yo kugu gi yɛ kunugu yo me kwidra a. 36Yesu akpɛ ɔsã aki banima si bakísi ɔnɔnɔ. Pɔ̀ lɛ kiliɛ gi azaakpɛ ɔsã nɔ aki ba si bakífeke onugu ní liboe le aʋa ɛ, nite ke banima fɛ bezehle liboe le. 37Lɛ banama petee gi benu liboe le e, bɛwɔ yaa. Liboe gi ɔnɔ kakaa aapani ní lɛ su ko lize si, “Kitɛ yɛ kiboebitɛɛ kidɔ nite e? Kitɛ xe yɛ kɔɔ izɛki si itoku le ize nu u, xe imumu ne fɛ izɛpani i?”

Currently Selected:

Mak 7: avn

Highlight

Copy