Mak 5

Yesu akpikpini Ifuɛfuɛ Zimizi ne dono ní Onyime ɔtɔ mɛ

1Lɛ kede e, Yesu nì yɛ badɔkpasi ba bɛzeku Galilea Limù ne oge lɔ kɔlɔ ní Gerasanɛ ma kesea aʋa. 2Kiliɛ gi Yesu eple ní katapokpaa mɛ me ko e, onyime ɔtɔ edo ní bekpo ʋa idrɔ lɛ kusi lɛ aba atsani yɛ ɛ. Ɔfuɛfuɛ zimizi eze ní onyimee me. 3Lɛ loso e, idrɔ lɛ mɛ ize yɛ ozeklɔ ɔ. Ɔnɔnɔ ɔ́zɛtani yɛ bibɔ ʋɛ kukpɛ tɔ ɔ. 4Bɛzɛkpɛ yɛ bibɔ ʋɛ ní ikli lɛ ni iwla lɛ epoe glegle, pɔ̀ lipoe kakaa ɛ, azɛɛpa egboo na, kɔ avini bala ʋa ní yɛ ikli lɛ ɛ. Eze gagla niteme si ɔnɔnɔ ɔ́zɛtani yɛ aʋa kuŋa a. 5Azɛɛklanɔ ní idrɔ lɛ kusi ní eto la aʋa elesi ni kemize gi azɛɛkpɛ ozi táataa, lɛ azɛɛkɔ akla na akpɛ isu ya ebi la a.

6Eze ɔdzage no xe amɔ Yesu atsisi i. Lɛ loso e, ese lɛ adɔ́ yɛ aklamasi na aʋa ní Yesu ketu ya ɛ. 7Lɛ akpɛ ozi ni ole gagla sì, “Wɔ Yesu, Aya Ʋidi ye Bi ye! Liboe woli wɔɛpɛ ní mɛ su u? Aya loso e, maki wɔ litukpo si wukíhe kutu iiki mɛ ɛ!” 8Apani nite e, lɛ ese linu si Yesu azɛɛpani si, “Wɔ ɔfuɛfuɛ zimizi, doza ní onyime liɛ ya mɛ!”

9Lɛ Yesu eʋi ye si, “Kitɛ bizɛxwa wɔ ɔ?”

Onyimee ebu isu ya onu si, “Mɛ linyi linu si, ‘Likpi’, lɛ ese linu si kwisrɛ.” 10Niteme si azɛɛki Yesu litukpo si ɔkikpikpini ifuɛfuɛ zimizi ne edono ní kusio klɔ ɔ.

11Liba lɛ mɛ si ihà likpi itɔ lizɛɛŋa bidɔ mɛ ní lito etɔ su ní niklɔ ʋa ɔza lɔ. 12Lɛ loso e, ifuɛfuɛ zimizi ne iiki Yesu litukpo si, “Tsisi blɔ ní ihà lɛ klɔ ʋa mɛ, tɔ ki tɔ kuti iku lɛ mɛ!” 13Ebu kudeo aki lɛ, lɛ ifuɛfuɛ zimizi ne ido ní onyimee me xe itiku iha lɛ mɛ ɛ. Ihà lɛ likpi le kiklaklaɛ mɛ kiaze ŋwisi akpe tiaʋa kinɛ te e. Lɛ pɔ́ ise eple lito le lɛ izɛdɔ limu ne e.

14Banama gi bezeedi ihà lɛ aʋa ɛ, bese lɛ bɛzeeefuflu liboe le kpɛ ɔma nɔ mɛ ni inyrɔ nɛ aʋa a. Banima bedo eba tɔ bedi liboe le kibabaɛ mɛ 15niteme si gi bɛba Yesu klɔ ɛ, bɛmɔ onyime liɛ klɔ mɛ gi ifuɛfuɛ zimizi likpi le lize bázanɔ ɛ. Bemɔ yɛ gi odi i, akpɛ awu la mɔmɔmɔ gi eze ní sínɔ mɛ, nite si lifu ne liku banima pɔ́. 16Banama gi bɛmɔ liboe le aŋu mɛ ɛ, behle kiboebitɛɛ kpɛ banɔ dzedze ba mɛ kiliɛ gi liba lɛ mɛ ɛki onyime liɛ me gi ifuɛfuɛ zimizi ne ize e, ni kiliɛ gi liba lɛ mɛ ɛki ihà lɛ fɛ ɛ.

17Lɛ loso banima bɛsi Yesu sì ɔsɛ ní ba kesea mɛ.

18Gi Yesu azeemu iku katapokpaa mɛ si yisɛ ɛ, onyime liɛ klɔ mɛ gi ifuɛfuɛ zimizi ne ize bázanɔ ɛ, eʋi adɔ ní Yesu awla si ɔki tɔ yiku ni yɛ kude.

19Pɔ̀ Yesu ɔ́dimɛ ɔ́ki yɛ, lɛ asi yɛ boŋ si, “Dzi trɛ ní kepea mɛ ní wɔ benete ba klɔ tɔ zɛɛsi ba kidiliɛ gi Aya abitɛ akí wɔ nì asigaga glegle ala gi edi wo e.”

20Gi onyimee asɛ nite e, aklanɔ ní Ima Liɔfɔ lɛ pɔ́ mɛ. Asi banima petee kidiliɛ gi Yesu abitɛ aki yɛ ɛ. Lɛ loso banama petee gi benu yɛ kupaniɔ ɛ, ba inugu itse.

Yesu ayɔ ni Yairo yɛ obidzɛɛ nì ɔdzɛɛ liɛ su gi ika lɛ kunyaa kwize e

21Yesu edzì atsà limu ne atrɛ ní oge lɔ kɔlɔ aʋa. Gi eku níklɔ ɛ, linɔkpi ʋidi itɔ lixogo ní yɛ su. 22Lɛ Yairo gi eze Yudanɛ ma ɔnɔtsitsi ní ba ɔtsaklɔ ɛ, yɛ fɛ aba eku i. Gi amɔ Yesu i, adɔ ní Yesu ketu ya 23lɛ eble yɛ ɔna nɔ mɛ kupɛpɛɔ aki Yesu si, “Blɔ Ɔkaɛ! Mɛ obidzɛʋi yɛ eetse gaglaa. Maki wɔ litukpo, ba tɔ gatrɔ awla ní yɛ aʋa atɔ ɔyɔ.”

24Lɛ onu klɔ ko e, Yesu ni onyimee bɛsɛ eku kudeo me e. Banima bɛsrɛ gi bekuni ba kude e, gi liki si bɛzɛpɔ́ Yesu ikpɛ ní kupɛɔ petee e.

25Ɔdzɛ ɔtɔ eze ní banima kusi, gi azɛɛnya ɛ. Ika lɛ izedo ní yɛ su agɔ liɔfɔ ni taʋa nyɔŋ. 26Bawabitɛ glegle bekeni idi pɔ̀ liboeboe lísɛ ɛ. Ezizi yɛ exo la petee tɔ nya yɛ isu ya mɛ idzi iku lɛ kiku ye, pɔ̀ lɛ́ kinyani boŋ lizɛɛnyani itrɔ ɛ. 27Enu Yesu onu lɛ loso yɛ fɛ ɛ, eti eku ní linɔkpi le me gani kedea. 28Lɛ asi yɛ isu ya sì, “Xegi matani Yesu awu la kugbɔnɔ ko e, maahaya.”

29Kiliɛ gi anya gbɔni Yesu awu la ko e, ika lɛ gi ííba yɛ su i, itsa kyɔŋ. Enu le ní yɛ isu ya mɛ ké si yɛ ahaya. 30Lɛ onu klɔ ko e, Yesu amɔ egyesi sì kigagla kido ní yɛ mɛ. Ekyi ní ɔnɔha lɔ gi eze ní yɛ su kusi yo lɛ eʋi si, “Nyaŋwɛ agbɔni mɛ awu la ɛ?”

31Yɛ badɔkpasi ba bebu le onu si, “Wɔ tutɔ wɔɛmɔ kiliɛ gi banima bɛsa likpakpa lɛ ní wɔ su i, lɛ woeʋi dzɛ si nyaŋwɛ agbɔni wɔ liwu le na a?”

32Pɔ̀ Yesu azeedi aklanɔ si yimɔ ɔniliɛ gi yɛ agbɔni yɛ ɛ. 33Gi ɔdzɛɛ amɔ kidiliɛ gi kiba kɛ mɛ ɛki yɛ onu i, edo ní banima kusi aba ɔtɔ nɔ. Lifu ne likɔ si azeesugu. Edu yɛ aklamasi na kesea ní Yesu ketu ya lɛ asi yɛ liboe zizi nɛ lɛ kizezee me ní anukwarɛ mɛ ɛ. 34Niklɔ Yesu asi yɛ si, “Mɛ obidzɛɛ, wɔ kuziŋaa kwiki si wɔ haya. Ga trɛ ní kusuyɔ mɛ tɔ wɔ kunyaa kuyurɔ wɔ.”

35Kiliɛ gi Yesu azɛɛpani eboa la klɔ ko e, banɔ batɔ bɛdɔ ni Yairo kepea mɛ nì odu iiki Yairo si “Wɔ obidzɛʋi yɛ etse.” Lɛ loso e, “kúkpɛ Ɔdɔbasɛ yɛ kunugu tɔ ɔ.”

36Pɔ̀ Yesu ɔ́kpɛ ba liboe le linɔ ɔ. Lɛ asi Yairo si, “Kúse lifu u; wɔ kɔ zi ŋa ko!” 37Lɛ ɔ́ki ɔnɔnɔ kude si okuni ba kude sani Petro, Yakobo ni yenemi ye Yohanes ko o. 38Lipoe lɛ gi beku Yairo kepea mɛ ɛ, Yesu amɔ kiliɛ gi ozi lo ni kubemio kwize ní niklɔ ɛ. 39Gi eti eku ni ba aʋa ɛ, eʋi si, “Ege lɛ loso mlɛpisa nite e? Liboe woli lɛ loso mleebemi nite e? Ɔnuvɔ yɛ oʋítse, sra ko ɛɛdɔ!”

40Pɔ̀, banɔ baklɔ gi beze niklɔ ɛ, bɛmwɛ yɛ; lɛ loso, akpikpini ba petee edono ní ligba lɛ mɛ. Banɔ baklɔ gi beti iku ɔnuvɔ yɛ aʋa a pɔni yɛ ɛ, ba ko beze obika yɛ, obinee ni yɛ badɔkpasi tiata ba. 41Yesu evu ɔnuvɔ yɛ kawlakpɔa lɛ asi yɛ sì, “Talita kumi,” gi lɛ ese linu si, “Ɔdisami, mɛ si yɔ!”

42Nite si ɔdzɛʋi yɛ ayɔ kyɔŋ gi ekpese kuklanɔ ɛ. Azɛ agɔ liɔfɔ ni taʋa a. Gi liboe le liba lɛ mɛ nite e, banima pɔ́ ba inugu itse e. 43Yesu xunyɔ akpɛ ɔsã aki ba si bakífeke onugu ní liboe le aʋa aki ɔnɔnɔ ɔ. Lɛ asi ba si, “Mlaki ɔnuvɔ ɛ kiditɔ tɔ ɔŋa.”

Currently Selected:

Mak 5: avn

Highlight

Copy