Mak 4

Yesu ebu abee ní amu na ogluglu ye su

1Yesu ekpese yɛ bidɔbasɛbasɛ ʋɛ ní Galilea Limu ne kutu. Linɔkpii lɛ gi lize yɛ ní su i, likeme niteme si, Yesu emu eku ní katapokpa atɔ mɛ lɛ eze ní ka mɛ ɛ. Katapokpaa kɛtrɔ ní kuni yo aʋa lɛ linɔkpi le lize ní limu ne kutu yɔ ɛ. 2Ebú eboe glegle me aki ba epoe glegle gani abee ʋa mɛ si:

3“Mlata kutu! Onyime ɔtɔ eze gi atrɛ amu na oglu kɔ ɔ. 4Gi azeefuflu amu na ní kayaa mɛ ɛ, átɔ ɛdɔ kudeo me, lɛ kudzɔʋi yɔ kwita la ɛmlɔ ɛ. 5Atɔ ɛdɔ ní akla na mɛ niklɔ gi sise sè sísrɛ ɛ, Lídze ko lɛ amubi la ɛyɛ ɛ lɛ ese linu si sise sè sísrɛ ɛ. 6Pɔ̀ gi liwo le litu u xe kuweo kwiyi i, amuyɛyɛ la ɛyrɔ lɛ etse e. Lɛ ese linu si igũ̀ ne ísrɛ ní la ese e. 7Amubiatɔ fɛ ɛwɔli eku ní bibu ʋe me. Gi bibu ʋe bitsì i, biwà ɛda ní amubi yɛyɛ la aʋa, niteme si amu na ébu libii tɔtɔ ɔ. 8Pɔ̀ amubiatɔ ɛdɔ ní kese gbã aʋa a. Niteme si ɛyɛ, etsi, lɛ eyo mɔmɔmɔ ɛ. Atɔ eyo ebi avitata, atɔ ebi aviteglo, lɛ atɔ fɛ eyo ebi alafa ɛ.”

9Lɛ Yesu agù yɛ liboe le si, “Ɔniliɛ gi kutu kulɛ yɛ ɛ, tɔ onu!”

Kidiliɛ loso gi Yesu ebu abee ʋa ɛ

10Lipoe lɛ gi Yesu tole agɔ ɛ, banama gi benu yɛ liboe le e, ba mɛ batɔ ni badɔkpasi liɔfɔ ni tiaʋa ba bɛba yɛ klɔ, lɛ beʋi idɔni yɛ awla si abee gi ebu i, obu yɛ ese ɔki ba. 11Niklɔ Yesu asi ba si, “Aya akɔ yɛ Kaʋaŋaa eboe kpòkpò la aki mlɔ. Pɔ̀ banama gi balɛ oge no e, ba xunyɔ ɛ, biapani eboe la asi ba ní abee ʋa mɛ, 12tɔ ɛ,

‘Biatapo odi dzini kutapo odi,

pɔ̀ batrámɔ egyesi i;

biata kutu dzini kuta,

pɔ̀ batránu kididɔ ese e.

Lɛ ese linu si xegi bɛmɔ bidɔ egyesi i,

loo benu eboe ese e,

biakyi ní ba ina mɛ vu Aya

kɔ akɔ akyɛ ba ɛ.’ ”

Yesu ebu amugluglu la abee ese

13Lɛ Yesu eʋi ba si, “Xegi mlénu abee liɛ ese e, kɔ kitɛ liaze xe mlaanu abee dzedze ba ese e? 14Ɔdɔkpɛɛ eefuflu Aya liboe le. 15Banɔ batɔ balɛ ŋwisi amu ana klɔ gi ɛdɔ kudeo su kinɛ ɛ. Xegi benu liboe le ko e, kɔ Satana aba kɔ lɛ asɛ nɔ ɛ. 16Nite ke banɔ batɔ fɛ balɛ ŋwisi amu ana klɔ gi ɛdɔ ní akla na mɛ kinɛ ɛ. Xegi benu liboe le ko e, bizɛɛzi lɛ ni isami. 17Pɔ̀ liboe le liʋívu kese e, lɛ baʋíze gagla ní liboe le me e. Lɛ loso xe kuxixa loo keduyɔyɔ kɛba agani liboe le me e, kɔ bɛɛdzi kede kyɔŋ. 18Lɛ banɔ batɔ fɛ balɛ ŋwisi amu a na klɔ gi ɛdɔ bibu ʋe me kinɛ ɛ. Ba benu banɔ batɔ gi bizeenu liboe le, 19pɔ̀ kelea mɛ baxixa ʋa nì kibɔɛ kude kuzenoo ani kelea mɛ ɔgyi nɔ ɛ, bɛ pɔ́ bikpɛ likpɔ ɔ, gi bikɔ si liboe le límɔ obufuɛkɔ xe liabu libiitɔtɔ ɔ. 20Pɔ̀ banɔ batɔ kɔ ɛ, balɛ ŋwisi amu ana klɔ gi ɛdɔ kese gbã aʋa kinɛ ɛ. Benu liboe le, bɛzi lɛ, lɛ beyò ebi la ɛ; batɔ beyò ebi avi tata, batɔ avi teglo, lɛ batɔ fɛ ɛ, ebi alafa ɛ.”

Kani yɛ izɛkɔ kudradraa

21Yesu atrɛ ní yɛ bidɔbasɛbasɛ ʋɛ aʋa si, “Nyaŋwɛ izɛsú kani xe izɛkɔ yɛ kpɛ agba yɛ ese loo abati ese e? Aní kani yɛ ose lo aʋa bizɛtrɔ kani yɛ ɛ? 22Kidɔ kakaa gi bekpo e biabu ke kudono ní oŋwe no, lɛ kidiliɛ aʋa gi bɛvini awlakpa la ɛtrɔ ɛ, bíabu ke dono. 23Lɛ loso e, ɔniliɛ gi kutu kulɛ yɛ ɛ, tɔ onu!”

24Yesu atrɛ lɛ aʋa sì, “Mlata eboa la gi mlenu kutu mɔmɔmɔ! Kikpɛɛ liɛ gi mlɛkpɛ ɛki banima ɛ, nite ke biakpɛ ɔki mlɔ. Pɔ̀ mlɔ kiniɛ kiasanɔ ɔ. 25Ɔniliɛ awla gi kiditɔ kilɛ ɛ, biaki yɛ bidɔ ɔpɔnɔ. Pɔ̀ ɔniliɛ awla gi kididɔ kíma ɛ, yɛ kini sisami yɛ fɛ ɛ, biazɛ kɛ yɛ awla.”

Abee ní lisebi le kutsitsi yo su

26Lɛ Yesu atrɛ ní yɛ eboe la aʋa si, “Aya yɛ Kaʋaŋaa kalɛ ŋwisi kiliɛ gi onyime ɔtɔ azɛɛkpɛ esebi la ní yɛ kayaa mɛ kinɛ ɛ. 27Ɛɛwa yɛ axwɛ na elesi ni kemize. Ni lipoe lɛ klɔ mɛ petee, yɛ esebi la ɛzɛɛyɛ, gi ezeetsi i. Pɔ̀ yɛ ɔtutɔ lɔ ɛ, óte kiliɛ gi lilɛ ɛ xe liba lɛ mɛ nite e. 28Kesea ɔtutɔ lɔ kizɛki sì amu na izeetsi xe izɛɛpɔ ɔ. Ní ɔtɔpu kɔ ɛ, amu na izedu. Lɛ kede e, kɔ awlakpa la, kɔ ɔmuya lɔ ɛ. 29Xegi amu na ɛzã ɛ, kɔ ɔnyrɔmɛdzɛɛ ekpese la kupa ɛ. Lɛ ese linu si la lipa nɛ le lina a.”

Abee ní lisebi sisami nɛ su u

30Yesu apani dzɛ si, “Ege kwiakɔ Aya yɛ Kaʋaŋaa kusrɔnɔ ɔ? Loo abee woli kwiakɔ obu yɛ kaʋaŋaa ese e? 31Yɛ Kaʋaŋaa kalɛ ŋwisi lisebi sisami gɔgɔ lɛ gi onyime ɔtɔ azɛɛkɔ akpɛ ní yɛ kesea mɛ kinɛ ɛ. 32Lipoetɔ kede e, lisebi le liyɛ gi lidzi ose ʋidi i gi ekeme sani ise gɔgɔ lɛ petee, lɛ kudzɔʋi yɔ kwiwa kɔ evu na ní lɔ aya la mɛ ɛ.”

33Yesu apani yɛ liboe le asi banima ní abee ʋa mɛ ŋwisi ba yà kinɛ ɛ. Apani aki ba kiliɛ onu gi bianu eboe la ese e. 34Yesu ɔ́pɛ si yipani iiki ba a, sani si gani abee ʋa mɛ. Pɔ̀ xegi yɛ tete ɔlɛ pɔni yɛ badɔkpasi ba ɛ, kɔ ebú liboe kakaa ese aki ba ɛ.

Yesu ayɔ liwɔ lɛ onu

35Liwe lɛ klɔ ke gi kulagɔ kwina ɛ, Yesu asi yɛ badɔkpasi ba si, “Mlaki tɔ kutsa limu ne atrɛ ní oge lɔ kɔlɔ” 36Lɛ bɛsɛ ní ɔnɔha lɔ su xe badɔkpasi ba bemu iku ní katapokpaa mɛ ɛ. Pɔ̀ Yesu xunyɔ ɛ, eze ní katapokpaa mɛ koko; ko lɛ ba petee bɛsɛ ɛ. Kutapokpa dzedzeo fɛ kwipɔni yɛ. 37Lɛ lisɛ nɛ ɛ, liwɔ gagla ɛtɔ likpese kufu niteme si kuni yo akpɔ la ɛgbigba eku katapokpaa mɛ gi keyi pɔ́ ɔ. 38Yesu afɛ ní katapokpaa mɛ kedea ɔza lɔ gi adɔ sra ní sumu ye aʋa ɛ. Yɛ badɔkpasi ba benyime ye lɛ beʋi ye si, “Ɔdɔbasɛɛ, wɔ́kɔ lɛ mɛ ɔki blɔ gi kuhatse na a?”

39Yesu ayɔ ɔlɛɛ kedu ya. Lɛ akpɛ ozi lo ní liwɔ lɛ aʋa si, “Gɔ tsriɖi!” Lɛ ekyi eku kuni yo akpɔ la aʋa lɛ apani si, “Dɔ zĩi!” Liwɔ lɛ onu liyɔ kyɔŋ lɛ niklɔ petee ɛgɔ kranaa a. 40Lɛ Yesu eʋi yɛ badɔkpasi ba si, “Ege nì lifu mleese e? Kuziŋaa tɔtɔ kúma ní mlɔ awla kɔʋana nì abla na a?”

41Pɔ̀ akaŋu yɛ atsa ba, lɛ ba mɛ ɔnɔ kakaa eʋi yɛ ɔhanuglɔɛ si, “Onyime woli lu iliɛ ya? Gi liwɔ lɛ ni kuni yo akpɔ la fɛ binu kutu iiki yɛ ɛ!”

Currently Selected:

Mak 4: avn

Highlight

Copy