Mat 27

Yudanɛ ma betsixwa ba bɛtsini Yesu ní Pilato klɔ

1Keletitia livlɛ lɛ fìfìfì ì, kusumu yo baka ba nì banɔtsitsi ba bɛnya si biaye Yesu. 2Bɛkpɛ yɛ bibɔ lɛ bɛgbani yɛ tsini Pilato gi yɛ onu Roma ɔnɛ kesea aʋa odidi ye klɔ ɔ.

Kiliɛ gi Yuda etse e

3Agi Yuda a, gi yɛ ebu Yesu akɔ, enu si bɛtsa kutse pia ɛki Yesu i, ekyi ɔna mɛ lɛ edzini klosalo, kibɔ pititi avitata la atsini kusumu yo baka ba nì banɔtsitsi ba ɛ. 4Lɛ apani si i, “Mabitɛ liboe zimizi gi makɔ onyime e gi ɔ́ŋa lipɔ ɛ akpɛ awla kí kutse.” Lɛ bebu le onu kí yɛ si i, “Kitɛ líyi blo e? Wɔ liboe linu!” 5Lɛ Yuda aŋwia kibɔɛ aplɛ ní Yerusalem lisɔligba lɛ mɛ lɛ asɛ xe azɛɛkpɛ isu ya lihuʋi i. 6Lɛ kusumu yo baka ʋidi ba bɛtá kibɔɛ lɛ bɛpani si i, “Ika kibɔ kɛ ya, liyɔ kedu ní blɔ isã nɛ su si kukɔ kɛ kpɛ ní bidɔgyɔgyɔ ʋɛ kepimia mɛ.” 7Bɛbitɛ kugyodi lɛ bɛkɔ kɛ zeedzi ɔ́dɔʋɔ yɛ kesea tɔ biazevìve bababa ba. 8Lɛ loso bizɛxwa kesea lia klɔ si ìka kese kɔkpɛ nì omono o. 9Niteme si liboe lɛ klɔ gi Aya apani i agani oboedoplɛ Yeremya aʋa liba lɛ mɛ si, “Bɛkɔ kibɔ pititi avitata la gi Israelbanɛ ma bɛdimɛ si biatsa ní yɛ litukpo e, 10bekɔ kɛ edzi ɔdɔʋɔɛ kesea ŋwisi kiliɛ gi ɔkaɛ aki mɛ ɔsã nɔ kinɛ ɛ.”

Pilato eʋi Yesu beʋíʋi

11Yesu alɛɛ ní Roma ɔnɛɛ kesea ɔʋadi ye aŋu mɛ, lɛ eʋi Yesu si, “Wɔ wonu Yudanɛ ma okusi ye na a?” Yesu ebu le onu aki yɛ si, “Nite wɔ̀pani.” 12Pɔ̀ gi kusumu yo baka ba nì banɔtsitsi ba bɛkɔ eboe la ní yɛ su i, óbu litɔtɔ onu u. 13Lɛ gi Pilato eʋi Yesu si i, “Woʋínu eboe ala gi bɛkɔ ní wɔsu na a?” 14Pɔ̀ Yesu obu liboeboe onu tɔɔ gi lítu kesea ɔʋadi ye kugyɔ ɔ.

Pilato atsa kutsépia akí Yesu

15Ni Kutseo lidɔzawe kakaa aʋa ɛ, Roma ɔnɛɛ kesea ɔʋadi ye izɛyurɔ ɔnɔ tole gi bɛkpɛ ligba ɛ, ɛki linɔkpi le xegi liʋi ye e. 16Ní lipoe lɛ klɔ mɛ ɛ, ɔka ɔtɔ gi bete mɔmɔɔmɔ si eze ɔnɔ zimizi i, gi bɛzɛxwa si Baraba ɛ, eze ligba. 17Lɛ loso gi linɔkpi le likpɛ likpɔ ɛ, Pilato eʋi ba si, “Bamɛ owoli mlɛpɛ si miyurɔ kí mlɔ na a? Baraba loo Yesu gi onu Kristo ye na a?” 18Pilato etè mɔmɔɔmɔ si Yudanɛ ma baka ba ɛ, bɛkɔ Yesu i mani yɛ lɛ ese linu si bɛkɔ kaŋuza nì yɛ. 19Agi Pilato eze ní litsixwagbo le aʋa ɛ, yedze atsisi yɛ ole si, “Wukíbitɛ kididɔ nì onyime liɛ klɔ ɔ, gi ɔ́ta kese e. Lɛ ese linu si mamɔ ɔzia glegle omono kelea petee kɔkpɛ kulila gi maza elesi la ní yɛ su i.” 20Kusumu yo baka ba nì banɔtsitsi ba bɛliɔʋi linɔkpi le tɔ liʋi Pilato tɔ ɔyurɔ Baraba ɔki ba tɔ beye Yesu boŋu. 21Lɛ Roma ɔnɛɛ kesea ɔʋadi ye eʋi linɔkpi le si, “Ní banɔ tiaʋa ba ya kusi i, ba mɛ owoli mlɛpɛ si miyurɔ kí mlɔ na a?” bebu le onu si, “Baraba!” 22Lɛ Pilato eʋi ba si, “Kɔlɔ ɛ, ege, mlɛpɛ si míbitɛ nì Yesu gi onu Kristo ye na a?” Lɛ ba pɔ́ bebu le onu si, “Kú ye ní ose lo su!” 23Lɛ Pilato eʋi dzɛ si, “Ege loso o, liboe zimizi woli abitɛ na a?” Lɛ linɔkpi le likpɛ ozi lo gaglaa si, “Kú ye ní ose lo su!” 24Agi Pilato amɔ si litrabu libiitɔtɔ xe yɛ atrɛ ní lɛ aʋa a, pɔ̀ anyra ko aaga lɛ mɛ kudo e, akɔ kuni yo lɛ eplo yɛ awla la ní linɔkpi le aŋu mɛ, lɛ apani si, “Mɛ ɔwla ɔma ní onyime liɛ ya kutseo me! Mlɔ kiboebitɛ kɛ ya.” 25Lɛ linɔkpi le pɔ́ libu le onu si, “Ki yɛ kutseo kɔ kutuheheo kuba blɔ ni blɔ bebi ba aʋa a!” 26Lɛ Pilato ayurɔ Baraba aki ba ɛ; xe aki sì bɛfiaʋi Yesu atam la ɛ. Lɛ kede e, ayurɔ yɛ aki ba tɔ bazeekú ye ní ose lo su.

Baguta ba bɛkpɛ Yesu kakpaa

27Lɛ Pilato yɛ baguta ba bɛkɔ Yesu itsini kesea ɔʋadi ye yɛ kepea mɛ ɛ, lɛ baguta ba pɔ́ ní ba lihakpɔ lɛ mɛ bɛklani yɛ ɛ. 28Agi bebu ewu la ní yɛ su i, bɛkɔ liwu kyíkyĩ kpɛ ki yɛ. 29Lɛ beyo bibu ʋɛ likuto le xe bɛkɔ lɛ ekume ki yɛ lɛ bɛkpɛ kiseʋi ní yɛ kaŋawla mɛ; xe bɛdɔ ní ba aklamasi na aʋa ni yɛ ketu ya, lɛ bɛkpɛ yɛ kakpaa ɛ nì eboa la si, “Oheye lo! Yudanɛ ma okusi ye ozè ligbã gblamadzaa!” 30Betsĩ sita sɛ bali yɛ aʋa lɛ bɛzi kiseʋi ye yɛ awla xe bɛkɔ kɛ sa yɛ litukpo le tasɛ tasɛ. 31Agi bɛkpɛ yɛ kakpaa pɔ́ ɛ, bebu liwu kyíkyĩ nɛ ní yɛ su lɛ bedzini yɛ ɔtutɔ ewu la ɛkpɛ ki yɛ ɛ, lɛ bɛgbani yɛ edono si bɛzekú ye ní ose lo su i.

Baguta ba bekú Yesu ní ose lo su

32Lipoe lɛ gi bedo ɔma nɔ mɛ xe bɛzɛtrɛ ɛ, bɛtsani onyime ɔtɔ gi ádɔ Kirene gi bizɛxwa si Simon i, baguta ba bemi yɛ aʋa si ɔzɛ Yesu osetsase lo otu. 33Bɛzɛna ɔkutɔ gi bizɛxwa si Golgota, gi lɛ ese linu si “Litukpoxwa ozekɔ.” 34Ni klɔ bɛki Yesu kuda gi bɛtsa ni bidɔ tiitii bitɔ; pɔ̀ gi akpɛ kɔ onu edi i ɔŋwɛ kɔ. 35Lɛ gi bekú ye ní osetsase lo su i, bɛlɛ yɛ ewu la gani exoeʋi ʋi kutata mɛ ɛ. 36Lɛ kede e, beze kesea xe bezeepe ye e. 37Ní yɛ etukpo la onu i, bekú bidɔ ŋwlimiŋwlimi gi bipani si, “Yesu, Yudanɛ ma Okusi ye liɛ ya.” 38Lɛ beku beze tiaʋa ní ise su i pɔni yɛ, tole ni yɛ kaŋa mɛ, ɔʋlaɛ ni yɛ kaba mɛ. 39Banama gi bɛzɛga ɛza ɛ besugu ba etukpo la, lɛ bekpini Yesu si: 40“Wɔpani si wɔayaʋi Yerusalem Lisɔligba lɛ, lɛ wɔadzini lɛ kuwa ní ewe tata mɛ ɛ! Bú isu ya xe Aya Yebi wonu i, tɔ ple ní osetsase lo su!” 41Niteme ké, kusumu yo baka ba nì ɔsã nɔ badɔbasɛ ba ani banɔtsitsi ba bɛzɛɛkpɛ yɛ kakpaa si; 42“Ebu banima, pɔ̀ ɔ́tani yɛ isu ya kubu! Xe yɛ onu Israelbanɛ ma okusi ye e, lɛ kɔ ople dɔni osetsase lo su abla tɔ kwiazi yɛ aʋa ŋa! 43Aká Aya aʋa lɛ apani si, Aya Yebie yenu u. Xe nite e, mlaki tɔ kudi sì Aya aapɛ si yibu ye abla na!” 44Nite ke e beze ba klɔ gi bekú i pɔni yɛ ɛ fɛ bekpini ye.

Yesu yɛ kutseo

45Gi kemizea inyɔ liɔfɔ ni tiʋa isã ɛ, litumu ne lìdɔ ní kesea pɔ́ aʋa inyɔ sasa tita. 46Gi inyɔ tita isã ɛ, Yesu akpɛ ozi lo gaglaa si, “Eli, eli, lama sabaxtani?” gi lɛ ese linu si, “Mɛ Aya, mɛ Aya, ege lɛ loso wokyi kede ɔkpɛ mɛ ɛ?” 47Lɛ banɔatɔ gi bɛlɛɛ ní klɔ ʋa ɛ, benu yɛ onu lɛ bɛpani si, “Ɛɛxwa Eliya!” 48Bamɛ tole ese kyɔŋ, lɛ azɛɛkɔ ɔsapo ɔtɔ, akɔ lɔ akpɛ ní kuda nyagba nyagba mɛ, lɛ ete lo ní ose ɔtɔ onu i, xe akɔ lɔ atɔ si aki yɛ si ɔŋwɛ. 49Pɔ̀ banɔ gɔgɔ ba bɛpani si, “Lɛɛ mlaki tɔ kudi sì Eliya atra bu ye na a!” 50Yesu akpɛ ozi lo gaglaa dzɛ ko lɛ akɔ yɛ Ɔfuɛfuɛ nɔ akɔ ɛ. 51Ni lipoe lɛ klɔ mɛ ɛ, Yerusalem Lisɔligba lɛ mɛ kusa gi bɛkɔ ɛtsa lɛ mɛ ɛ, kwikyi idɔnɔ lifune banani kesea. Lɛ kesea kesugu u, xe aklakpɔ la ɛyaʋi i. 52Idrɔ lɛ idra lɛ banɔ dradra glegle gi betse e, bɛyɔni ba gi bedzi ligbã. 53Bedo ní ba idrɔ lɛ mɛ, le gi Yesu ayɔ adɔ ni bekpo ʋa mɛ ɛ, bɛtrɛ ni ɔma ʋidi dradra lɔ mɛ, lɛ banɔ glegle bɛmɔ ba a. 54Agi baguta ba ɔkaɛ ni baguta ba gi beze ni yɛ su u, xe bɛzeepe Yesu u bɛmɔ kesea kusugu yo ni eboa la gi ɛba lɛ mɛ ɛ, lifu liku ba lɛ bɛpani si, “Sugba ɛ, Aya Yebi iliɛ ya!” 55Badzɛ glegle gi beze nì yɛ kude e dɔni Galilea xe bezee di yɛ baziazia ba aʋa ɛ, bezee di bidɔ ɛdɔni ɔdzage no. 56Maria Magdaladzee, Maria gi onu Yakobo nì Yosef ba onee ani Zebedeo yedze, beze ní ba kusi i.

Yosef gi ádɔ Arimatia ɛ, evive Yesu

57Agi ɔlagɔ lɔ ɛna ɛ, oxonete ɔtɔ gi ádɔ Arimatia ɛ, aba eku; yɛ linyi lize Yosef, lɛ yɛ fɛ eze Yesu yɛ ɔdɔkpasi i. 58Atrɛ ní Pilato aŋu mɛ lɛ eʋi si ɔkɔ Yesu yɛ okpo ye ɔki yɛ ɛ. Lɛ Pilato aki ɔsã si bakɔ okpo ye akí Yosef. 59Lɛ Yosef akɔ okpo ye, xe axla kusa pititi vuvu ní yɛ su i, 60lɛ azɛɛkɔ Yesu okpo ye akpɛ ní yɛ ɔtutɔ yɛ ɔdrɔ vuvu gi ebu akpɛ ní liklakpɔ ɛtɔ mɛ. Lɛ emli likla ʋidi itɔ etsi ɔdrɔ lɔ kevunu ya xe asɛ ɛ. 61Maria Magdaladzee ni Maria ʋlaɛ, bezè niklɔ gi bebu aŋu na mɛ kpɛ ɔdrɔ lɔ ɛ.

Bedu ɔnɔ si oze pɛ ɔdrɔ lɔ

62Keletitia gi keze Lizemɔniwe le e, kusumu yo baka ba ni Farisianɛ ma bɛzɛtsani Pilato, 63lɛ bɛsi yɛ si, “Ɔka, kwiplɛ aŋu si lipoɛ lɛ gi ɔsia nɛ liɛ klɔ ezè ligbã́ nɛ ɛ, apani aplɛ si, ‘Mayɔ ní ewe tata kede’ 64Ki ɔsã nɔ tɔ bazeepe yɛ ɔdrɔ lɔ kɔzɛna nì liwetanɛ we le tɔ yɛ badɔkpasi ba bakítani yɛ okpo ye kuzuru tɔ biasi banima si, bɛyɔ ni yɛ dɔni bekpo ʋa mɛ. Asia gɔgɔa la ya anyani sani atɔpu na.” 65Lɛ Pilato asi ba si, “Mlatsini ɔnɔpe; tɔ mlazeetsi ɔdrɔ lɔ onu niteme gi mlaatanɔ ɛ.” 66Lɛ bɛsɛ xe bɛzɛtsi ɔdrɔ lɔ onu i, lɛ bedu ɔnɔpe ye si ozeope ɔdrɔ lɔ ɛ.

Currently Selected:

Mat 27: avn

Highlight

Copy