Mat 26

Banɔtsitsi ba bɛbitɛ kutrɔtrɔ si biaye Yesu

1Agi Yesu agù yɛ bidɔbasɛbasɛ bɛ ya petee e, asi yɛ badɔkpasi ba si; 2“Ŋwisi kiliɛ gi mlete plɛ kinɛ ɛ, betráŋa kutseo lidɔzawe le ní ewe taʋa kede. Lipoe lɛ klɔ mɛ biakɔ Ɔnɔɛ Yebi ye kpɛ awla tɔ beku ye ní ose lo su.” 3Nite me si kusumu yo baka ba ni banɔtsitsi ba bɛtsa ní Kayafa gi yɛ onu kusumu yo ɔka ʋidi ye yɛ kepea mɛ ɛ, 4lɛ bɛbitɛ batrɔtrɔ níklɔ si biavu Yesu ní kikpokpo me tɔ biaye ye. 5Pɔ̀ bɛpani si “lima si kwiabitɛ lɛ ní liweŋaŋa lɛ mɛ” “xe aníte e banima biayɔ kedu.”

Ɔdzɛ ɔtɔ asra kumu akí Yesu ní Betania

6Yesu eze ní Betania ní onyime ɔtɔ gi bizɛxwa si, Simon gi anya kunya kyikyi yɔ kepea mɛ. 7Gi azɛɛŋa bidɔ mɛ ɛ, ɔdzɛ ɔtɔ aba yɛ klɔ gi evu alabasta keʋe gi kamɛ kumu flafla a gi kwizi kedzi i, kwize; lɛ ɔdzɛɛ ekyi kumu yɔ abali yɛ litukpo le. 8Yesu yɛ badɔkpasi ba beyeʋi isu gi bɛmɔ nite e, lɛ beʋi si “Ege lɛ loso ezizi kumu yɔ nite e?” 9“Nya biatani kumu liɔ kudà kedzi ʋidi gi biakɔ kibɔɛ ɔki bepiplinete ba xe e!” 10Yesu ete liboe lɛ gi bɛzɛ pani, lɛ eʋi ba si, “Ege kunugu mlɛkpɛ ɔdzɛ liɛ ya,? Kidɔ gbã gi ki gyeno e, kɛ abitɛ aki mɛ. 11Bepiplinete ba bali mlɔ kusi liwe kakaa, pɔ̀ mátraze mlɔ su lipoe kakaa. 12Kumu yɔ gi abali mɛ aʋa te e kɔ akɔ abla mɛ kisugyaɛ aki mɛ kuviveo. 13Sugba mɛsi mlɔ si ɔkɔ kakaa gi biapani Aya liboe le ni kelea mɛ ɛ, biapani ní kidiliɛ gi ɔdzɛ liɛ abitɛ su tɔ biakɔ lɛ plɛ aŋu ni yɛ aʋa a.”

Yuda azɛ kibɔ sì tɔ yibu Yesu i kɔ

14Lɛ kede e, Yesu yɛ badɔkpasi liɔfɔ ni tiaʋa ba bamɛ tole gi yɛ bizɛxwa si Yuda Iskariot i, atrɛ ní kusumu yo baka ba klɔ 15lɛ eʋi ba si, “Xe gi mebu Yesu akɔ kimlɔ ɛ, ege mlaki mɛ ɛ?” Lɛ bɛkla kibɔ pititi yɛ avitata kɔ ɛki yɛ. 16Dɔni lipoe lɛ klɔ aʋa ɛ, Yuda azaapɛ kudeonu gi akɔ Yesu kukpɛ awla ki ba ɛ.

Yesu aŋa Kutseo Lidɔzawe le bidɔ mɛ nì yɛ Badɔkpasi ba

17Ni Akla mɔnyasi na liwe tɔpu nɛ aʋa ɛ, badɔkpasi ba bɛba Yesu klɔ lɛ beʋi ye si, “Nifɔ wɔ̀pɛ si kululɔ plɛ ki kutse lidɔzawe le bidɔŋaŋa ʋɛ kí wɔ na a?”

18Lɛ asi ba si, “Mlatrɛ ní onyime ɔtɔ klɔ ní ɔma ʋidi no me, tɔ mlasi yɛ si; ‘Ɔdɔbasɛ yɛ apani si, Mɛ ɔnyɔsasa nɔ ɛna; mɛ ni mɛ badɔkpasi ba kwiaŋa Kutse lidɔzawe le bidɔŋaŋa ʋɛ ní wɔ́ kepea mɛ ɛ.’ ” 19Lɛ badɔkpasi ba bɛbitɛ ŋwisi kiliɛ gi Yesu asi ba kinɛ ɛ, lɛ bɛbla Kutseo lidɔzawe le bidɔŋaŋa ʋɛ plɛ ɛ. 20Gi kulagɔ kwina ɛ Yesu ni yɛ badɔkpasi liɔfɔ ni tiaʋa ba beple eze ní kezia ese e. 21Gi bɛzɛŋa bidɔ mɛ ɛ, Yesu apani si “mɛsi mlɔ anukwarɛɛ si, mlɔ mɛ tole atrákpɛ mɛ awla.” 22Liki si yɛ badɔkpasi ba bɛpisa, lɛ bekpese ye kuʋí tole tole si, “Ɔkaɛ, maka si aní mɛ wɔɛsɛ ɛ?” 23Lɛ Yesu ebu le onu si, “Mlɔ mɛ liɛ gi ɛkpɛ awla kezia mɛ ni mɛ ɛ, yɛ atrábu me kɔ. 24Ɔnɔɛ Yebi ye atrátse ŋwisi kiliɛ gi Aya liboe le lipani i kinɛ ɛ. Pɔ̀ líaze gagla ki ɔniliɛ klɔ gi aabu Ɔnɔɛ Yebi ye kukɔ ɛ. Xegi baxà ɔniliɛ klɔ apɔ kura ɛ, liapɛ ki yɛ sanɔ ɔ!” 25Lɛ Yuda gi yɛ atrákpɛ yɛ awla ɛ, eʋi ye si, “Ɔdɔbasɛ yɛ, dani aní mɛ ɛ?” Lɛ Yesu ebu le onu si, “Wɔ́ wɔɛpani nite.”

26Agi bɛzɛɛŋa bidɔ mɛ ɛ, Yesu akɔ lìklã nɛ, lɛ edo Aya ɖase e, xe ayaʋi lɛ ɛ. Lɛ akɔ lɛ aki yɛ badɔkpasi ba ɛ, lɛ asi ba si, “Mlazɛ atà; lɛ lìnu mɛ kisugyaɛ.” 27Lɛ kede e, akɔ kaŋwɛpliʋia lɛ edo ɖase e ní ka aʋa xe, akɔ ka aki ba si, “Mlɔ pɔ́ mlaŋwɛ ní ka onu.” 28“Bɛ ya binu mɛ ika lɛ gi bɛkɔ e du kunyanya vuvu yɔ ní Aya ni yɛ banima kusi, mɛ ika lɛ gi bɛbali ní banɔ glegle ba eboe zimizi na kukɔkyɛ litukpo o. 29Mɛsi mlɔ si, Mátraŋwɛ wain liɛ tɔɔ kɔzɛna nì liwe lɛ gi maaŋwɛ wain yɛ dzɛ nì mlɔ ní Mɔka Kaʋaŋaa mɛ ɛ.” 30Lɛ gi bɛza ɔdzi tole e, bedo etrɛ ní Olif ye ise le ketokpa aʋa a.

Yesu edo aplɛ si Petro aanada yɛ

31Lɛ Yesu apani asi ba si, “Omono elesi ala ya ɛ, mlɔ pɔ́ mlaase yurɔ mɛ ɛ, lɛ ese linu si Aya liboe le lipani si:

“ ‘Aya aaye oʋesi gbanɔɛ,

kɔ iʋesi le isehle e.’

32“Pɔ̀ xegi mayɔ ádɔ ní bekpo ʋa mɛ ɛ, maaku mlɔ ɔtɔ trɛ ní Galilea.”

33Lɛ Petro ebu le onu aki Yesu si, “Xe banima pɔ́ bese yurɔ wɔ kura kyɛ ɛ, mátradzi kede ní wɔ su liwewe e!” 34Yesu asi Petro si, “Sugba ɛ, katsaa gi ɔkukɔ lɔ si loeme elesi la ɛ, wɔanada tatá si wote me.” 35Lɛ Petro ebu le onu si, “Xe liaze si beye me apɔni wɔ kyɛ ɛ, mátranada si mete wo!” Lɛ badɔkpasi gɔgɔ ba kyɛ bɛpani nite ke e.

Yesu axwa Aya ní Getsemane

36Lɛ Yesu ni yɛ badɔkpasi ba bɛtrɛ ní ɔkutɔ gi bizɛxwa si Getsemane e, lɛ asi ba si, “Mleze ní ya tɔ mitrɛ ní ɔtɔ nɔ kɔlɔ tɔ mizɛɛxwa Aya.” 37Agba ni Petro ni Zebedeo yɛ bebinyime tiaʋa ba evu. Enu kuyeʋiyeʋi lɛ isu ikpese yɛ asigaga la kuga ɛ, 38lɛ asi ba si, “mɛ esobo la ɛxixa gbɛgbɛ nite si míhatse. Mleze nì aŋu nì mɛ ní ya.” 39Agi atrɛ ni ɔtɔ nɔ taʋɛ ɛ, adɔ nì yɛ aŋu na mɛ ní kesea. Lɛ aki Aya litukpo si, “Mɔka, xe liapɛ ɛ, tɔ ti ɔzia nɔ kaŋwɛpliʋia lia ní mɛ aʋa! Pɔ̀ aní kiliɛ gi mapɛ pɔ̀ bitɛ ní wɔ kupɛ́pɛɔ onu u.” 40Lɛ gi edzi aba ní badɔkpasi tiata ba klɔ ɛ, amɔ si bɛdɔ sra, lɛ eʋi Petro si “kɔ mlɔ tiata mlatrátani aŋu kuze ni mɛ ɔnyɔsasa tole kpoo na a? 41Mlezè ni aŋu tɔ mlaxwa Aya tɔ mlakíku ní kufekedi me. Nya Ɔfuɛfuɛ nɔ ɛɛdimɛ xe e pɔ̀ kisugyaɛ kibotso o.” 42Yesu azɛɛxwa Aya kuʋla si, “Mɔka, xe lítrasɔnɔ si wɔati ɔzia nɔ kepliʋia ní mɛ aʋa a, sani si maŋwɛ ka ɛ, lɛ kɔ ɛ bitɛ ní wɔ kupɛpɛɔ aʋa a.” 43Gi Yesu edzi aba ɛ, amɔ si badɔkpasi ba bɛdɔ sra dzɛ; bátani ba bimbi ʋe kudra. 44Dzɛ ɛ, Yesu ayurɔ ba, lɛ asɛ atrɛ xe azɛɛxwa Aya kutanɛ nì eboa la klɔ ke e. 45Lɛ edzì atrɛ ní badɔkpasi ba klɔ ɛ, xe eʋi ba si “Sra sɛ ko mlafini idɔ xe mlɛyɔ isu ya mɛ na a? Mledi ɔnyɔsasa nɔ ɛna! Bɛtra bu Ɔnɔɛ Yebi ye kpɛ awla ɛki banɔ zimizi ba. 46Mlayɔ! Mlaki tɔ kusɛ! Imɔ ɔniliɛ gi eebu me kɔ ɛ.”

Kusɔliɔ baka ba bevu Yesu

47Agi Yesu aze gu kunugu yo e, Yuda, badɔkpasi liɔfɔ ni tiaʋa ba mɛ tole e, aba eku ni ba kusi i. Linɔkpi ʋidi itɔ gi kusumu yo baka ba ni banɔtsitsi ba bɛkpɛ ɛ, xe livu ihɛ piɔpiɔ ʋa ni kusekpeo, lize ni yɛ kude e. 48Yuda gi yɛ ɛkpɛ Yesu awla ɛ, abitɛ kutrɔtrɔ ni linɔkpi le si; “Ɔniliɛ gi yɛ lidzɔ lɛ maamu i, yɛ onu ɔniliɛ gi mlɛpɛ ɛ, mlevu ye!” 49Lɛ Yuda eti apɔni Yesu kyɔŋ, lɛ apani yɛ si, “Kusuyɔ ki wɔ, Ɔdɔbasɛ yɛ.” Lɛ amu yɛ lidzɔ lɛ ɛ. 50Lɛ Yesu ebu le onu si, “Kɔsi ni lɛ su, ɔʋia!” Lɛ linɔkpi le liga xe liba evu Yesu gagla ɛ. 51Banama gi beze nì Yesu kude e, bamɛ tole etso yɛ ihɛ piɔpiɔ yɛ lɛ ati kusumu yo ɔka ʋidi ye yɛ ɔnɔdzidzi ye yɛ kutukpa ɛ. 52Lɛ Yesu asi ɔdɔkpasi liɛ klɔ si, “Dzini wɔ ihɛ piɔpiɔ yɛ kpɛ ní yɛ ozeklɔ,” “Banama petee gi bizeetso ihɛ ɛ, biatse ní ihɛ onu. 53Kite wóte si maatani kupɔnɔ kuʋi dɔni mɔka awla gi aatsisi yɛ baxwɛdzɛ baguta sani ahakpɔ liɔfɔ ni taʋa na a? 54Pɔ̀ xe mabitɛ nite e, kɔ kitɛ liboe lɛ gi bɛŋwlimi plɛ ni Aya liboe le me e liaba lɛ mɛ?” 55Lɛ Yesu apani aki linɔkpi le si, “Liziã si mlaba nì ihɛ piɔpiɔ ʋa nì kusekpeo si mlévu me ŋwisi ɔnɔ zimizi gi ayɔ kedu u, xe ɔʋíbitɛ ni isã nɛ aʋa kinɛ na a? Mazɛɛbasɛ bidɔ ní Yerusalem lisɔligba lɛ mɛ, liwe kakaa pɔ̀ mlevu me e. 56Pɔ̀ eboa la pɔ́ eba la mɛ tɔ eboa la gi Aya yɛ beboedoplɛ ba bɛŋwlimi plɛ ní Aya liboe le me e, aba la mɛ.” Lɛ badɔkpasi ba petee bese e, xe bɛsɛ yɛ su i.

Yudanɛ ma betsixwa ba bɛxwa litsi ni Yesu

57Banama gi bevu Yesu i, bɛtsini yɛ ní Kayafa gi onu Kusumu yo Ɔka ʋidi ye kepea mɛ, níklɔ ɔsã nɔ badɔbasɛ ba nì banɔtsitsi ba bɛtsa. 58Petro fɛ eze ní ba kedea ke. Agà riɖiɖi eti eku ní kusumu yo ɔkaɛ kepea mɛ. Eze kesea ní kepea mɛ kɔpɔni kepea bepepe ba tɔ yimɔ kiliɛ gi eboe la aatrɛ ɛ. 59Kusumu yo baka ba ni Yudanɛ ma betsixwa ba petee bɛpɛ asia tɔ bɛkɔ ɛbu Yesu lipɔ atɔ biaye ye; 60pɔ̀ bátani litɔtɔ kumɔ ɔ, linyaze lɛ mɛ si, banɔ glegle bedo bɛba ɔtɔ nɔ lɛ bɛsɛ asia na ɛkpɛ yɛ awla a, gɔgɔɛ benyime tiaʋa bedo bɛba ɔtɔ nɔ, 61lɛ bɛpani si, “Onyime liɛ ya apani si, ‘Maatani Aya yɛ lisɔligba lɛ kuyaʋi lɛ ní ewe tata mɛ ɛ, maadzini lɛ kuwa.’ ” 62Kusumu yo Ɔka ʋidi ye ayɔ alɛɛ, lɛ eʋi Yesu si, “Kunububu kutɔtɔ kúma ní wɔ awla gi wɔakɔ ki liboe lɛ gi bɛkɔ ni wɔ su na a?” 63Pɔ̀ Yesu ɔfuɛ, nì yɛ ɛ. Kusumu yo Ɔka ʋidi ye asi Yesu dzɛ si “Maka kitamu akí wɔ ní Aya linyi ne me, si blɔ xe wɔ wonu Kristo ye gi onu Aya Yebi ye e?” 64Lɛ Yesu ebu le onu akí yɛ si, “lilɛ ní lɛ mɛ kiliɛ gi wɔpani i.” Pɔ̀ mɛsi mlɔ si: Lipoe le litrába gi mlɛtramɔ Ɔnɔɛ Yebi ye gi odi i ní Aya kigagla ɛ petee onetee yɛ kaŋawla mɛ ɛ, xe atrába dɔni lifunu ne ní aplɛ la mɛ ɛ. 65Lɛ kusumu yo Ɔka ʋidi ye akyì yɛ ɔtutɔ yɛ liwu le tɔ yikɔ ɛbasɛ yɛ kusuyeʋio, lɛ apani si, “Libusioboe! kúdzi uzia ɔnɔ gi eze liboe le katsalia tɔɔ. Mlenu yɛ libusioboe le gi apani i. 66Lɛ eʋi ba si, ege kinu mlɔ begyodi ʋa ɛ?” Bebu le onu si “Aŋa lipɔ lɛ loso e egyeni ni kutse.” 67Banɔatɔ bɛɛtsí sita sɛ kpɛ Yesu aŋu na mɛ, batɔ bekusi ye xe batɔ kyɛ bɛbɔ yɛ isumu ne e 68lɛ bɛsi yɛ si, “Do liboe plɛ ki blɔ Kristo! Nyaŋwɛ asa wɔ bidɔ mɛ na a?”

Petro Anada si yéte Yesu

69Lɛ gi Petro eze ní kusumu yo ɔka ʋidi ye yɛ kepea kuka mɛ ɛ, ɔdzɛ osumubi ɔtɔ eti apɔni Petro lɛ asi yɛ si, “Wɔfɛ woze ni Yesu Galilea ɔnɛ kude.” 70Pɔ̀ Petro anada ní ba petee aŋu na mɛ si, “Méte liboe lɛ su gi wɔɛpani i.” 71Lɛ edo atrɛ ní kepea kevunu ya, níklɔ ɔnɔsumu ɔdisami dzedze ɛmɔ yɛ lɛ ɛsi banɔaklɔ gi beze níklɔ si i, “onyime liɛ eze ni Yesu gi ádɔ Nazaret kude e.” 72Petro anada dzɛ si, “Maka kitamu si méte onyime liɛ klɔ!” 73Lidze xe banama a gi bɛlɛɛ niklɔ ʋa ɛ, bɛsi Petro si, “Lilɛ lɛ mɛ si bamɛ tole wɔfɛ wonu, wɔ kipaniɛ kibu wɔ ɛkɔ!” 74Petro apani dzɛ si, Maka kitamu si sugba mɛɛsɛ! Aya ohe kutu kí mɛ faã xe lima lɛ mɛ ɛ! “Méte onyime liɛ klɔ ɔ!” Ní lipoe lɛ klɔ mɛ ɖi i, ɔkukɔ lɔ eme e. 75Lɛ Petro aplɛ aŋu ní liboe lɛ klɔ gi Yesu asi yɛ aʋa a si: “Xe ableke ɔkukɔ lɔ aame e, wɔanada tatá si wote me.” Edo lɛ aze bemi tiitiiti i.

Currently Selected:

Mat 26: avn

Highlight

Copy