Luka 18

Aŋolkop gin kede dako moro a cware oto

1Obolligi carokop ame pwonyogi ni, myero okwa Obaŋa dikdik, kur ool. 2Okobo ni, “I boma moro rik tye aŋolkopporo ame mom lworo Obaŋa, kadi woro dano. 3Cen tye dako moro a cware oto ame obedo lonyo baŋe dikdik kun kobbe ni, ‘Ŋol kop i kom ŋat a an apidde.’ 4En obedo ka kwero oko gire pi kare alac; ento icennere en okobo kene kene ni, ‘An ba, kadi bed mom alworo Obaŋa kadi woro dano, 5cite dako a cware oto-ni doŋ lola wok; myero koŋ doŋ aŋol kop i kom ŋat a en apidde, me i agikki mere bino mere dikdik kur tima rac.’ ”

6Rwot okobo ni, “Winy wunu kop ame aŋolkop a kite mere mom atir okobo. 7Obaŋa mom bino Ŋolo kop atir ame bino konyo jo mere ame eyero, ame kok baŋe dyeceŋ kede dyewor? En bino gal aboŋo timo ginnoro i komgi? 8Akobbiwu ni, en bino Ŋolo kop atir oyot me konyogi. Ento Wot a dano ka bino dwogo, bino nwoŋo i yee i lobo ateni?”

Aparicayo gin kede ara-ocoro

9Dok obolo carokop baŋ jo mogo ame genne kengi ni gin kitegi atir, kun ocao jo ocele. 10“Jo aryo rik owoto ka kwac i ot Obaŋa, dano acel Aparicayo, dano ocele ara-ocoro. 11Aparicayo ocuŋ kun kwao gire kene ni, ‘Obaŋa, apwoi, kom an mom acalo jo ocele ame oyak, a mom genne, ocod cot, daŋ mom arom kede ara-ocoro-ni. 12Akanyo kec nino aryo i cabit acel acel, amio daŋ dul acel me apar i kom jami luŋ ame anwoŋo.’ 13Cite ara-ocoro ocuŋ i teŋe, mom otiŋo waŋe malo i polo, ento obapo kore kun kwao ni, ‘Obaŋa, tima ber, an abalo gira!’ 14#Mat. 23.12; Luk. 14.11Akobbiwu ni mano, dano ca odok tuŋe ame okwane ni kite atir kato dano ocele ca oko; pien dano acel acel ame kette kene ni etye malo, obino dwoke piny, ento dano a mwolle kene obino tiŋe malo.”

Yecu omio itino winyo

(Neŋ daŋ Matayo 19.13-15; Marako 10.13-16)

15Jo okelle anaka itino atino-gu, ni en mulgi. Ka jo a lube oneno, te jukogi oko. 16Cite Yecu ocwanogi baŋe, te kobo ni, “Wek wunu itino bin baŋa, kur igeŋgi wunu; pien loc Obaŋa tye pi jo acalo gin. 17Ateni akobbiwu ni mano, dano a mom jolo Ioc Obaŋa acalo atin, mom bino donyo iye kadi atidi moro.”

Awobi alonyo ame aloc

(Neŋ daŋ Matayo 19.16-30; Marako 10.17-31)

18Aloccoro openye ni, “Apwony aber, atim ŋo me anwoŋ kwo a perakino nakanaka?” 19Yecu te penye ni, “Kara piŋo ilwoŋa ni aber? Dano moro aber mom tye, kono ka Obaŋa keken. 20#Yaa 20.12-16; Lodo 5.16-20Iŋeo cik, ‘Kur icod cot, Kur inek, Kur ikwal, Kur ikel kop goba i pido, Wor pappi kede totti.’ ” 21En te gamo ni, “Kom kop magu ducu amako con cakere i tinona.” 22Yecu ka owinyo okobbe ni, “Ginnoro acel pwod orem i baŋi. Wot icat jami luŋ ame itye kede, ite poko oko baŋ ocan, eka ite bedo kede lonyo ame ikano i polo; yin doŋ ibin, iluba.” 23Lo-nu ka owinyo kodi kop-pu, okumu meicel, pien onwoŋo rik en alonyo meicel.

24Ame Yecu tye ka nene, okobo ni, “Tek meicel olonyo idonyo i loc Obaŋa! 25Pien twara donyo inaga i waŋ pico yot, kato alonyo idonyo i loc Obaŋa.” 26Jo ame owinyo okobo ni, “Kara ŋa a twero larre?” 27En okobo ni, “Gin a mom twerre baŋ dano, ibaŋ Obaŋa twerre.” 28Petero okobo ni, “Aco wan oweko pacciwa, olubi.” 29Yecu okobbigi ni, “Ateni akobbiwu ni mano, mom tye ŋattoro ame oweko ode, onyo cege, onyo omego mere, onyo jo onywale, onyo itino mere, pi loc Obaŋa, 30ame mom bino nwoŋo jami akato mano tyen apol i kare man; kede i kare a bino anyim bino nwoŋo kwo a perakino odoco.”

Yecu dok otito pi to mere tyen me adek

(Neŋ daŋ Matayo 20.17-19; Marako 10.32-34)

31Otero jo mere apar wie aryo, okobbigi ni, “Nenu, wan doŋ otye okwaro tur me wot i Jerucalem. Kop luŋ ame odwarpiny rik ocoo i kom Wot a dano bino cobere kakare. 32Pien obino miye baŋ Orok, obino ŋale, obino miye lewic, obino ŋulo lao i kome; 33obino pwode kede del, obino neke, cite i nino me adek en bino cer oko.” 34Ento gin mom oniaŋ i kop magi kadi acelloro; kop ame en okobo owumere oko i baŋgi, mom gin omako kop ame okobo.

Yecu ocaŋo atowaŋ kan a ceggi kede Jeriko

(Neŋ daŋ Matayo 20.29-34; Marako 10.46-52)

35Ka Yecu doŋ onoko ceggi kede Jeriko, atowanŋoro onwoŋo obedo piny i ŋet yo kun kwao lim. 36Ka owinyo lwak tye a kato i laŋete, en openyo ni, “Kara mano ŋo dok i?”

37Otitte ni, “Yecu me Najaret en a kato-nono.” 38En oredo ni, “Yecu, Akwar Daudi, tima kica, ba!” 39Jo ame tye i nyime ojuke ni, “Liŋ lo-ni!” En omedo redo mere amede ni, “Akwar Daudi, tima kica ba!” 40Yecu ocuŋ, te ciko ni kel lo-nono baŋe. Ka obino onoke a ceggi, openye ni, 41“Kara imito ni atimi nadi?” Okobo ni, “Rwot, amito anen piny.” 42Yecu okobbe ni, “Nen giri piny oŋ; iyeeni ocaŋi.” 43Cucuttono te cako neno piny oko, olubo Yecu kun mio kwogo baŋ Obaŋa, jo luŋ daŋ ka oneno, opako Obaŋa.

Currently Selected:

Luka 18: Lango

Highlight

Copy