Luka 17

Gin ame mio jo poto i bal

(Neŋ daŋ Matayo 18.6-7, 21-22; Marako 9.42)

1Yecu okobo baŋ jo mere a lube ni, “Gin ame mio jo poto i bal mom bino geŋere; cite dano ame kela gin a mio jo poto i bai bino neno can! 2Twara ame otweo kidi rego i ŋute, ocore kede i nam, kato ame en omio ŋat acelloro i akina jo magi atinoni opoto i bal. 3#Mat. 18.15Gwokere wunu kenwu! Ka ominni obalo bal, juke; ka oŋut, time kica. 4Ka otimo bal baŋi tyen abiro i nino acel, ka olokere baŋi tyen abiro kun kobo ni, ‘Doŋ aŋut,’ myero itime kica.”

Med iyee mewa

5Okwena okobo baŋ Rwot ni, “Med iyeewa!” 6Rwot okobo ni, “Kono itye wunu kede iyee a rom kede nyig koti dek karadali, kono ikobbi wunu yat-ti ni, ‘Putte keni, ipitte keni iyi nam,’ kono owinyo dogwu.

Tic amiro

7“Ŋa i akinawu ka tye kede amiro mere a puro kede dyaŋ, onyo a kwao rommi, ame ka odwogo i poto te kobbe ni, ‘ru bino oyot, ibed piny, icem?’ 8En mom bino kobbe ni, ‘Yikka cem me otyeno, itwe pyeri, ikella cem ituno ka an acemo, amato, icennere yin ibino cem, ibino mato?’ 9En pwoo amiro pien otimo gin ame ocike ni etim? 10Wun daŋ amannono, ka doŋ ityeko wunu timo gin ducu ame ocikowu tiyo, myero ikob wunu ni, ‘Wan omiro a mom konyo ginnoro, pien otio ka gin a myero oti keken.’ ”

Yecu olonyo odobo apar

11Ame en awot Jerucalem, opello i waŋ apokki me Camaria kede Galilaya. 12Odonyo i paco moro, orwatte kede odobo apar, ame kun gin ocuŋ kan abor. 13Gin oredo ni, “Amaa, Yecu, Adwoŋ, timwa kica!” 14#Olev. 14.1-32Ka onenogi, okobbigi ni, “Wotu giwu, nyutte kenwu baŋ olamdog.” Ame pwod otye ka wot, komgi te lony oko. 15Ŋat acel i akinagi, ka oneno ni etyeko caŋ oko, odok cen a kun pako Obaŋa kede dwon aloŋo. 16Oryebere piny i te tyen Yecu, opwoe. En onwoŋo Acamaria. 17Yecu openyo ni, “Nwaŋ mom olonyo jo apar? Kara jo aboŋwen tye kwene? 18Mom tye ŋattoro ame odwogo cen ka pako Obaŋa, kono ka arok-ki keken?” 19Te kobbe ni, “Ya, iwot giri, iyee meri ocaŋi.”

Bino me loc Obaŋa

(Neŋ daŋ Matayo 24.23-28, 36-41)

20Oparicayo nwaŋ openye ni, “Loc Obaŋa bino tuno awene?” Okobbigi ni, “Loc Obaŋa mom bino ame oneno i waŋ. 21Dok mom obino kobo ni, ‘Neno, tye kan!’ aŋar ni, ‘En i ca!’ Pien, nen, loc Obaŋa doŋ tye i akinawu.”

22Eka te kobo baŋ jo a lube ni, “Kare bino romo ame ibino paro wunu me neno nino a Wot Obaŋa moro acel, cite mom ibino neno wunu. 23Obino kobbiwu ni, ‘Neno, en i ca!’ onyo ni, ‘Neno, tye kan!’ Kur iwotu iye, daŋ kur ilubgi wunu. 24Pien acalo lutkot meny, caro polo tuŋ cel tuno kede naka tuŋ ocele, Wot a dano daŋ bino bedo amannono nino mere. 25Ento myero koŋ otek kanyo can apol, kun jo me kare man bino kwere. 26#Age. 6.5-8Acalo rik otimere i kare a Nua, bino timere amannono i kare a Wot a dano daŋ. 27#Age. 7.6-24Jo nwaŋ ocamo, omato, awobe kede anyira onyomere, ituno a nino-nono ame Nua odonyo kede i yee, eka abwal pii te poŋ, te tyekogi ducu. 28#Age. 18.20–19.25Acalo otimere i kare a Lot daŋ. Jo rik ocemo, omato, ocato wil, opito koti, ogero udi, 29cite i nino ame Lot oya oko i Codom, mac kede gweŋ calufa ame mac olio ocwe kun ya i polo, te tyekogi ducu. 30Bino bedo amannono daŋ i nino ame Wot a dano bino nen iye. 31#Mat. 24.17-18; Mar. 13.15-16I nino-nono dano ame tye malo i wi ot kun jami mere tye iyi ot, kur dok oyitto piny ni ebino kwanyogi. I kite acel-lu, dano ame tye i poto kur dok cen. 32#Age. 19.26Koŋ ipo wunu i kom cik a Lot. 33#Mat. 10.39; 16.25; Mar. 8.35; Luk. 9.24; Lak. 12.25Dano ame mito laro kwo mere bino rwenyo kwo mere arwenya; ento ŋat ame rwenyo kwo mere, en bino gwoko. 34Atittiwu ni, i dyeworrono jo aryo bino buto i wi tanda acel; obino kwanyo ŋat acel, ŋat acel te doŋ. 35Mon aryo bino bedo karacel i rego; obino kwanyo ŋat acel, ŋat acel te doŋ. [36Jo aryo bino bedo i poto; obino kwanyo ŋat acel, ŋat acel te doŋ.]” 37Gin openye ni, “Rwot, kara kwene?” En okobbigi ni, “Kan a kom oto tye iye, acut daŋ cokere kuno.”

Currently Selected:

Luka 17: Lango

Highlight

Copy