Čơdơ̆ng Phŭn 34

Sičem Mă Pơgŏ HʼDina

1Hmâo sa hrơi, HʼDina, ană đah kơmơi HʼLêa tơkeng brơi kơ Yakôp, tơbiă nao kiăng ngui hrŏm hăng ƀing ană đah kơmơi amăng čar anŭn. 2Sičem, ană đah rơkơi Hamôr, mơnuih Hiwit, khua čar anŭn, ƀuh HʼDina, mă pơgŏ gơ̆ laih anŭn ngă pơmlâo hĭ gơ̆. 3Pran jua Sičem khăp kơ HʼDina, ană đah kơmơi Yakôp. Ñu khăp kơ dra anŭn laih anŭn yua boh pơhiăp tơdu rơun kiăng alum plư kơ gơ̆. 4Sičem laĭ kơ Hamôr, ama ñu tui anai: “Rơkâo kơ ih mă đah kơmơi anŭn brơi jing bơnai kâo.”

5Tơdang Yakôp hmư̆ Sičem hmâo ngă pơgrĭ kơ HʼDina, ană đah kơmơi ñu, hlăk anŭn ƀing ană đah rơkơi ñu ăt dŏ pơ hmua kiăng wai rơmo triu ƀing gơñu, hnŭn yơh Yakôp dŏ rơiăt hĭ tơl ƀing gơñu wơ̆t glaĭ.

6Hamôr, ama Sičem, nao bưp Yakôp kiăng kơ pơhiăp hăng ñu. 7Ƀing ană đah rơkơi Yakôp glaĭ mơ̆ng hmua. Tơdah gơñu hmư̆ tơlơi anŭn, gơñu rơngot laih anŭn hil biă mă yua kơ Sičem hmâo ngă laih tơlơi soh amăng ƀing Israel, yua kơ ñu đih laih hăng ană dra Yakôp, jing tơlơi arăng ƀu phiăn ngă ôh. 8Samơ̆ Hamôr laĭ hăng ƀing gơñu: “Pran jua Sičem, ană đah rơkơi kâo, khăp biă mă laih kơ ană dra ƀing gih. Rơkâo ƀing gih brơi bĕ dra anŭn dŏ kơ ană đah rơkơi kâo. 9Dŏ rơkơi bơnai hăng ƀing gơmơi bĕ. Brơi bĕ ană đah kơmơi ƀing gih kơ ƀing gơmơi dŏ, laih anŭn mă dŏ bĕ ană đah kơmơi ƀing gơmơi kơ gih pô. 10Ƀing gih či dŏ hrŏm hơbĭt hăng ƀing gơmơi, lŏn čar anai hơ̆k mơak tŭ jum ƀing gih. Brơi ƀing gih dŏ bĕ pơ anai, sĭ mia laih anŭn pơdơ̆ng pơjing kong ngăn ƀing gih ƀơi anih anai.”

11Sičem laĭ hăng ama laih anŭn ƀing ayŏng adơi đah kơmơi anŭn tui anai: “Brơi kâo dưi hmâo tơlơi pap ƀơi anăp ƀing gih, hơgĕt tơlơi ƀing gih rơkâo, kâo ăt či ngă yơh. 12Rơkâo bĕ mơ̆ng kâo gơnam pŭ mơnŭ yom laih anŭn gơnam pơyơr prŏng, kâo či brơi kơ ƀing gih tui hăng tơlơi ƀing gih rơkâo; kơnơ̆ng rơkâo ƀing gih brơi bĕ dra anŭn jing hĭ bơnai kâo.”

13Ƀing ană đah rơkơi Yakôp yua hăng tơlơi mơneč kiăng laĭ glaĭ kơ Sičem laih anŭn Hamôr, ama ñu, yua kơ Sičem hmâo ngă pơgrĭ laih kơ HʼDina, adơi đah kơmơi ƀing gơñu. 14Gơñu laĭ: “Brơi adơi đah kơmơi ƀing gơmơi dŏ kơ mơnuih aka ƀu khăt klĭ anŭn jing bruă ƀu dưi ngă ôh, yua kơ tơlơi anŭn či jing sa tơlơi pơmlâo kơ ƀing gơmơi. 15Ƀing gơmơi či tŭ ư yơh tơlơi ƀing gih rơkâo tơdah ƀing gih khŏm jing hĭ kar hăng ƀing gơmơi, abih bang ƀing đah rơkơi khŏm tŭ tơlơi khăt klĭ mơ̆n. 16Tơdah hrup anŭn, ƀing gơmơi či brơi yơh kơ ƀing gih dŏ kơ ană đah kơmơi ƀing gơmơi, laih anŭn gơmơi či mă dŏ ană đah kơmơi ƀing gih kơ ƀing gơmơi pô. Ƀing gơmơi či dŏ hrŏm hơbĭt hăng ƀing gih, laih anŭn ƀing ta či jing sa ƀing ană plei pla. 17Samơ̆ tơdah ƀing gih ƀu hmư̆ ôh hiăp ƀing gơmơi, laih anŭn ƀu tŭ tơlơi khăt klĭ ôh, tui anŭn gơmơi či mă glaĭ hĭ ană đah kơmơi ƀing gơmơi laih anŭn đuaĭ nao pơ anih pơkŏn.”

18Boh pơhiăp ƀing gơñu ngă bơmơak pran jua Hamôr laih anŭn Sičem, ană đah rơkơi ñu. 19Pô tơdăm anŭn ƀu dŏ tơguan sui ôh kiăng ngă tơlơi anŭn, yua kơ ñu khăp biă mă kơ ană dra Yakôp. Hloh kơ anŭn dơ̆ng, Sičem jing pô hmâo tơlơi pơpŭ hloh kơ abih bang mơnuih amăng sang ama ñu.

Simêôn hăng Lêwi Pơdjai Mơnuih Plei Sičem

20Hnŭn yơh, Hamôr laih anŭn Sičem, ană đah rơkơi ñu, nao pơ amăng jang plei laih anŭn laĭ hăng ƀing ană plei pla tui anai: 21“Ƀing mơnuih anai dŏ rơnŭk rơnua biă mă hăng ƀing ta. Brơi bĕ ƀing gơñu dŏ laih anŭn sĭ mia amăng čar anai, yua kơ lŏn čar anai ăt dŏ hmâo djŏp anih brơi kơ ƀing gơñu mơ̆n. Ƀing ta či mă dŏ ană đah kơmơi ƀing gơñu laih anŭn brơi gơñu mă dŏ ană đah kơmơi ƀing ta. 22Samơ̆ ƀing gơñu či tŭ ư dŏ hrŏm hơbĭt hăng ƀing ta kiăng dưi jing sa ană plei pla, kơnơ̆ng tơdah rĭm čô đah rơkơi amăng ƀing ta ăt khŏm tŭ tơlơi khăt klĭ kar hăng ƀing đah rơkơi gơñu mơ̆n. 23Khul hlô mơnơ̆ng, dram gơnam laih anŭn abih bang hlô mơnơ̆ng rong ƀing gơñu ƀu či lơ̆m hĭ kơ ƀing ta ôh hă? Kơnơ̆ng brơi ƀing ta tŭ ư bĕ hăng ƀing gơñu, tui anŭn gơñu či dŏ hrŏm hơbĭt hăng ƀing ta yơh.” 24Abih bang hlơi pô tơbiă nao pơƀŭt ƀơi amăng jang plei leng kơ gưt tui boh pơhiăp Hamôr laih anŭn Sičem, ană đah rơkơi ñu, laih anŭn abih bang ƀing đah rơkơi amăng plei anŭn leng kơ tŭ hĭ tơlơi khăt klĭ.

25Truh hrơi tal klâo, tơdang abih bang mơnuih hlăk dŏ ruă, dua čô ană đah rơkơi Yakôp jing Simêôn laih anŭn Lêwi, ayŏng HʼDina, mă đao gưm, klĕ mŭt amăng plei anŭn, pơdjai hĭ abih bang ƀing đah rơkơi. 26Gơñu yua đao gưm pơdjai hĭ Hamôr laih anŭn Sičem, ană đah rơkơi ñu, ba tơbiă HʼDina mơ̆ng sang Sičem laih anŭn đuaĭ hĭ. 27Ƀing ană đah rơkơi Yakôp juă lin ƀing mơnuih djai laih anŭn plah mă hĭ mơnơ̆ng mơnuă amăng plei anŭn, yua kơ arăng hmâo ngă pơgrĭ laih adơi đah kơmơi ƀing gơñu. 28Ƀing gơñu mă khul triu, rơmo, aseh kle laih anŭn mă tŭ hĭ abih bang mơnơ̆ng hmâo amăng plei laih anŭn amăng hmua ƀing gơñu. 29Gơñu plah mă laih anŭn ba pơđuaĭ hĭ abih bang dram gơnam, ƀing đah kơmơi, ƀing čơđai laih anŭn hơgĕt mơnơ̆ng hmâo amăng sang.

30Yakôp laĭ hăng Simêôn laih anŭn Lêwi: “Ƀing gih pơjing rai tơlơi rŭng răng kơ kâo yơh, ngă brơi ană plei pla čar anai, jing ƀing mơnuih Kanaan laih anŭn mơnuih Pêrisit, bơrơmŭt kơ kâo. Kâo kơnơ̆ng hmâo ƀiă mơnuih đôč, tơdah ƀing gơñu pơgop hrŏm hơbĭt pơkơdơ̆ng glaĭ laih anŭn kơsung pơblah hăng kâo, tui anŭn kâo wơ̆t hăng sang kâo či răm rai yơh.” 31Samơ̆ gơñu laĭ glaĭ tui anai: “Hyư̆m ngă, lui brơi hĭ kơ ƀing gơñu ngă kơ adơi đah kơmơi ƀing gơmơi kar hăng sa čô đah kơmơi rih răm hă?”

Currently Selected:

Čơdơ̆ng Phŭn 34: JRA2016

Highlight

Copy