Čơdơ̆ng Phŭn 33

Yakôp bưp Êsâo

1Yakôp angak mơta lăng đĭ, laih anŭn anai nê, Êsâo hrŏm hăng pă rơtuh čô mơnuih hlăk rơbat rai pơ ñu. Yakôp pơpha hĭ ană brơi kơ HʼLêa, HʼRačel, laih anŭn dua čô ding kơna đah kơmơi. 2Ñu dă dăp brơi dua čô ding kơna đah kơmơi hăng ƀing ană gơñu rơbat nao hlâo, tŏ tui jing HʼLêa hăng ƀing ană ñu, tuč rơnuč jing HʼRačel hăng Yôsep. 3Ñu pô nao hlâo kơ ƀing gơñu, bon kŭp ƀơi lŏn tơjuh wơ̆t, tơl ñu truh pơ ayŏng ñu.

4Samơ̆ Êsâo đuaĭ nao čơkă, kwar mă Yakôp, kwar mă tơkuai gơ̆ laih anŭn čŭm. Abih dua gơñu leng kơ hia soh sel. 5Tơ ñu angak mơta, ñu ƀuh ƀing đah kơmơi hăng ƀing čơđai, Êsâo tơña: “Ƀing mơnuih nao hơbĭt hăng ih anai jing hlơi?” Yakôp laĭ glaĭ: “Anŭn jing ƀing ană bă Ơi Adai pô hmâo pha brơi laih kơ ding kơna ih hăng tơlơi pap.” 6Dua čô ding kơna đah kơmơi hăng ƀing ană gơñu nao jĕ pơ Êsâo laih anŭn bon kŭp ƀơi lŏn. 7Giơ̆ng anŭn HʼLêa hăng ƀing ană ñu nao jĕ, bon kŭp ƀơi lŏn, laih anŭn tuč rơnuč, HʼRačel hăng Yôsep ăt nao jĕ laih anŭn bon kŭp ƀơi lŏn mơ̆n. 8Êsâo tơña: “Hơgĕt ih či ngă hăng khul hlô mơnơ̆ng kâo hmâo ƀuh laih anŭn?” Yakôp laĭ glaĭ: “Kiăng dưi hmâo tơlơi pap drap ƀơi anăp ih.” 9Êsâo laĭ: “Ơ adơi, kâo hmâo lu laih, hơgĕt lơ̆m kơ ih, brơi ih djă pioh bĕ.” 10Yakôp pơđur kơ ñu: “Ư ưh, kâo kơwưh kơ ih. Tơdah kâo hmâo tơlơi pap ƀơi anăp ih, rơkâo kơ ih mă tŭ bĕ gơnam pơyơr mơ̆ng tơngan kâo. Dưi ƀuh ƀô̆ mơta ih ƀu phara ôh hăng dưi ƀuh ƀô̆ mơta Ơi Adai, yua kơ ih hmâo hơ̆k mơak tŭ jum kâo laih. 11Rơkâo kơ ih mă tŭ bĕ gơnam kâo pơyơr kơ ih anŭn, yua kơ Ơi Adai hmâo pap drap kơ kâo laih anŭn pha brơi kâo djŏp mơta mơnơ̆ng.” Ñu pơđur lu đơi anŭn yơh Êsâo mă tŭ hĭ.

12Êsâo laĭ: “Ră anai, nao bĕ ƀing ta! Kâo či nao hlâo kơ ih.” 13Yakôp laĭ glaĭ: “Kar hăng ih hmâo thâo laih, ƀing čơđai anai dŏ tơdu biă mă, kâo pô ăt khŏm wai lăng dơ̆ng mơ̆n khul triu laih anŭn rơmo ania hlăk brơi ană gơñu mĕm. Tơdah pơgŏ gơñu rơbat hơmăr, wơ̆t dah kơnơ̆ng sa hrơi đôč, abih khul ăt či djai abih yơh. 14Rơkâo ih nao hlâo kơ ding kơna ih bĕ, kâo či nao hăng tơlơi rơnang blang, tui klon ƀing čơđai anĕt laih anŭn khul hlô mơnơ̆ng tơl dưi bưp ih pơ Sêir.” 15Êsâo laĭ: “Tui anŭn, kâo či pioh glaĭ kơ ih ƀiă ding kơna kâo hŏ.” Yakôp laĭ glaĭ: “Pioh ngă gĕt lĕ? Kâo kơnơ̆ng kiăng dưi hmâo tơlơi pap ƀơi anăp ih đôč!” 16Amăng hrơi anŭn, Êsâo wơ̆t glaĭ pơ Sêir. 17Samơ̆ Yakôp rơbat nao pơ Sukôt, pơdơ̆ng sa boh sang kơ ñu pô laih anŭn hơdôm boh anih brơi kơ khul hlô mơnơ̆ng. Yua kơ anŭn yơh, ñu pơanăn anih anŭn jing Sukôt.#33:17 Sukôt: Anăn anai amăng tơlơi Hêbrơ kiăng laĭ jing “anom”.

18Giơ̆ng kơ Yakôp glaĭ mơ̆ng Padan Aram, ñu nao pơ plei Sičem, čar Kanaan, rơnŭk rơnua hlom ƀom. Ñu pơdơ̆ng sang khăn pơklă anăp hăng plei, 19laih anŭn blơi glaĭ mơ̆ng ană tơčo Hamôr, ama Sičem,#Yôs 24:32; Yô 4:5. anih lŏn ñu hlăk pơdơ̆ng sang khăn, hăng nua sa rơtuh prăk. 20Ƀơi anih anai, Yakôp ngă sa boh kơƀang ngă yang laih anŭn pơanăn jing Êl Êlôhê Israel.#33:20 Êl Êlôhê Israel: kiăng laĭ: “Ơi Adai jing Ơi Adai kơ ƀing Israel”.

Currently Selected:

Čơdơ̆ng Phŭn 33: JRA2016

Highlight

Copy