Čơdơ̆ng Phŭn 14

Tơlơi Pơblah Tơ̆ng Krah Ƀing Pơtao

1Amăng rơnŭk Amraphel ngă pơtao čar Sinar#14:1 Sinar anŭn jing Babilôn. Ariôk ngă pơtao čar Êlasar, Kêdôrlômer ngă pơtao čar Êlam, laih anŭn Tidal ngă pơtao čar Gôim, 2gơñu pơgop tơdruă kiăng pơblah hăng ƀing pơtao Bêra čar Sôđôm, pơtao Birsa čar Gômôrơ, pơtao Sinap čar Atma, pơtao Sêmêber čar Sêbôim, laih anŭn pơtao kơ čar Bêla, kiăng laĭ Sôar. 3Abih bang ƀing pơtao anai pơƀŭt ƀing tơhan gơñu amăng klŭng Sidim, anŭn jing Ia Rơsĭ Djai#14:3 Boh hră phŭn hơđăp: Ia Rơsĭ Hra. 4Rơma čô pơtao anai hmâo dŏ gah yŭ kơ pơtao Kêdôrlômer wai lăng amăng pluh dua thŭn, samơ̆ truh thŭn tal pluh klâo gơñu tơgŭ pơkơdơ̆ng glaĭ hăng pơtao Kêdôrlômer. 5Amăng thŭn tal pluh pă, Kêdôrlômer hăng ƀing pơtao gah kơ ñu djă tơhan nao pơblah laih anŭn gơñu dưi hĭ hăng ƀing mơnuih Rêphaim amăng plei Astarôt Karnaim, hăng ƀing mơnuih Susim amăng plei Ham, hăng ƀing mơnuih Êmim amăng plei amăng plei Sawê Kiriathaim, 6laih anŭn hăng ƀing mơnuih Hôrit amăng čar Sêir, truh pơ plei Êlparan ƀơi guai tơdrŏn tač. 7Giơ̆ng anŭn gơñu wơ̆t glaĭ pơ Ia Krong Phat Kơđi,#14:7 Boh hră phŭn: Ênmispat. jing plei Kadês, laih anŭn gơñu pơblah dưi hăng ƀing Amalek laih anŭn hăng ƀing Amôrit dŏ amăng plei Hasasôn Tamar. 8Ƀing pơtao Sôđôm, Gômôrơ, Atma, Sêbôim laih anŭn pơtao Bêla, jing plei Sôar, nao laih anŭn dăp dă tơhan gơñu ƀơi dơnŭng Sidim 9kiăng pơkơdơ̆ng glaĭ hăng pơtao Kêdôrlômer čar Êlam, pơtao Tidal čar Gôim, pơtao Amraphel čar Sinar, laih anŭn hăng pơtao Ariôk čar Êlasar, pă čô pơtao pơblah hăng rơma čô pơtao. 10Klŭng anŭn hmâo lu boh hlŭng kơsu čai; tơdang đuaĭ kơdŏp yua kơ thuơ amăng tơlơi pơblah, pơtao Sôđôm laih anŭn pơtao Gômôrơ lĕ trŭn amăng anŭn, samơ̆ ƀing dŏ glaĭ đuaĭ kơdŏp amăng khul čư̆. 11Pă čô pơtao anŭn mă hĭ abih bang dram gơnam wơ̆t hăng gơnam ƀơ̆ng huă kơ ƀing Sôđôm laih anŭn Gômôrơ, laih anŭn gơñu đuaĭ hĭ. 12Gơñu ăt mă mơ̆n Lot amon Abram, pô hlăk dŏ amăng Sôđôm, ba pơđuaĭ ñu hrŏm hăng dram gơnam ñu mơ̆n.

Abram Pơklaih Lot

13Samơ̆ hmâo sa čô klaih mơ̆ng anih pơblah, ñu rai laĭ pơthâo kơ Abram, mơnuih Hêbrơ. Abram hlăk dŏ giăm jĕ kơyâo mơyang Mamrê, mơnuih Amôrit, ayŏng kơ Êskôl laih anŭn Aner; abih klâo čô anai leng kơ hmâo lir pơgop laih hăng Abram. 14Tơ Abram hmư̆ arăng hmâo mă laih amon ñu, Abram iâu pơƀŭt abih bang ƀing đah rơkơi hmâo pơhrăm laih kơ tơlơi pơblah, abih bang jing klâo rơtuh pluh sapăn čô, laih anŭn kiaŏ tui ƀing pơtao anŭn truh pơ Đan. 15Abram pơpha ƀing mơnuih ñu, amăng mlam ñu brơi ƀing ding kơna ñu kơsung blah hăng kiaŏ tui tơhan ƀing ayăt truh pơ Hôba, dŏ gah kơdư kơ Damas. 16Ñu mă glaĭ abih bang dram gơnam, laih anŭn ba amon ñu Lot hrŏm hăng dram gơnam, ƀing đah kơmơi laih anŭn ƀing ană plei pla wơ̆t glaĭ.

Mêlkisadek

17Tơdơi kơ Abram pơblah dưi hăng Kêdôrlômer laih anŭn ƀing pơtao pơkŏn wơ̆t glaĭ, pơtao Sôđôm tơbiă nao čơkă ñu ƀơi klŭng Sawê, kiăng laĭ klŭng Pơtao.

18Mêlkisadek, pơtao Salem, ăt jing khua ngă yang kơ Ơi Adai Glông Hloh, djă ba ƀañ hăng tơpai nao čơkă,#Hêb 7:1-10. 19laih anŭn hơơč tơlơi mơyun kơ Abram. Ñu laĭ:

“Rơkâo kơ Ơi Adai Glông Hloh, Pô hrih pơjing adai hăng lŏn tơnah,

Brơi tơlơi mơyun hiam kơ Abram!

20Bơni hơơč kơ Ơi Adai Glông Hloh

Pô hmâo jao laih ayăt amăng tơngan ih!”

Abram pơyơr kơ pơtao sa črăn amăng pluh kơ gơnam ñu hmâo sua mă mơ̆ng tơlơi pơblah. 21Pơtao Sôđôm laĭ kơ Abram: “Ih ƀơ̆ng jao glaĭ mơnuih kơ kâo đôč, bơ kơ dram gơnam ih djă pioh bĕ.” 22Samơ̆ Abram laĭ: “Kâo hmâo yơr laih tơngan gah anăp kơ Yêhôwa Ơi Adai Glông Hloh, Pô hrih pơjing adai hăng lŏn tơnah laih anŭn ƀuăn rơ̆ng tui anai 23kâo ƀu či mă sa mơta tơlơi hơgĕt lơ̆m kơ ih ôh, wơ̆t dah kơnơ̆ng sa ară hrĕ brai đôč, ƀôdah sa roh hrĕ čơkhŏ ih, hwĭ dah ih či laĭ: ‘Kâo ngă pơdrŏng brơi kơ Abram’. 24Kâo ƀu mă tŭ hơgĕt gĕt ôh, kơnơ̆ng hơdôm mơnơ̆ng ƀing tơhan kâo hmâo ƀơ̆ng laih. Hơgĕt mơnơ̆ng lơ̆m kơ ƀing mơnuih nao hrŏm hăng kâo, Aner, Êskôl, laih anŭn Mamrê; brơi bĕ gơñu mă tŭ črăn kơ gơñu pô.”

Currently Selected:

Čơdơ̆ng Phŭn 14: JRA2016

Highlight

Copy