Čơdơ̆ng Phŭn 15

Ơi Adai Pơjing Kơnol Pơgop Hăng Abram

1Tơdơi kơ tơlơi anŭn, amăng tơlơi pơƀuh Abram hmư̆ hiăp Yêhôwa laĭ kơ ñu: “Ơ Abram, anăm hwĭ ôh! Kâo jing khiơl pơgang ih, gơnam bơni kơ ih jing prŏng biă mă.” 2Samơ̆ Abram laĭ glaĭ: “Ơ Khua Yang Yêhôwa, hơgĕt tơlơi Ih či pha kơ kâo? Kâo ăt aka hmâo ană bă ôh, laih anŭn pô či mă tŭ dram gơnam kâo anŭn jing Êliêser, mơnuih Damas.” 3Abram laĭ dơ̆ng: “Anai nê, Ih ƀu brơi kâo hmâo ană ôh, laih anŭn pô hlŭn tơkeng rai amăng sang kâo či jing hĭ pô tŭ mă kong ngăn kâo.” 4Yêhôwa laĭ kơ Abram: “Pô anŭn ƀu jing pô či tŭ mă kong ngăn ih ôh, samơ̆ pô tơkeng mơ̆ng kian pruăi ih pô yơh či jing pô tŭ mă kong ngăn ih.” 5Khua Yang ba ñu tơbiă gah rơngiao laih anŭn laĭ: “Angak lăng đĭ bĕ pơ adai adih laih anŭn tơdah dưi yap khul pơtŭ amăng adai, brơi ih yap bĕ.” Giơ̆ng anŭn Khua Yang laĭ hăng ñu dơ̆ng: “Kơnŭng djuai ih ăt či kar hăng anŭn mơ̆n.”#Rôm 4:18; Hêb 11:12. 6Abram đaŏ kơ Yêhôwa, yua kơ anŭn Ơi Adai yap ñu jing mơnuih tơpă hơnơ̆ng.#Rôm 4:3; Gal 3:6; Yak 2:23.

7Yêhôwa laĭ kơ Abram dơ̆ng: “Kâo jing Yêhôwa, Pô hmâo ba tơbiă ih mơ̆ng plei Ur čar Kaldê, kiăng brơi kơ ih lŏn čar anai ngă kong ngăn.” 8Samơ̆ Abram laĭ: “Ơ Khua Yang Yêhôwa, ngă hyư̆m pă kâo dưi thâo kâo či mă tŭ lŏn čar anai?” 9Khua Yang laĭ glaĭ: “Mă brơi Kâo sa drơi rơmo ania klâo thŭn, sa drơi bơbe ania klâo thŭn, sa drơi triu tơno klâo thŭn, sa drơi čĭm bơrơgơ̆m laih anŭn sa drơi ană čĭm kơtrâo.” 10Abram pơyơr đĭ kơ Ñu abih bang khul mơnơ̆ng pơyơr anŭn, blah pơpha dua laih anŭn pioh sa gah ha mơkrah pơklă anăp, samơ̆ ƀu blah pơpha ôh khul čĭm. 11Čĭm grư̆ pơr trŭn ƀơi khul hlô mơnơ̆ng djai, samơ̆ Abram puh pơđuaĭ hĭ gơñu.

12Tơdang yang hrơi čơdơ̆ng lĕ, Abram pĭt hĭ; laih anŭn anai nê, tơlơi kơnăm mơmŏt tĭt, tơlơi hwĭ bral laih anŭn kơpal biă mă klŭp ƀơi ñu.#Jôp 4:13-14. 13Yêhôwa laĭ kơ Abram: “Brơi ih thâo klă rơđah bĕ kơnŭng djuai ih či dŏ amăng lŏn čar ƀing tuai, gơñu či jing hlŭn kơ ƀing mơnuih amăng čar anŭn, laih anŭn arăng či kơtư̆ juă gơñu amăng pă rơtuh thŭn.#Tơb 1:1-14; Bruă 7:6. 14Samơ̆ Kâo či phat kơđi kơ kơnŭng djuai hmâo mă kơnŭng djuai ih ngă hlŭn kơ gơñu, laih anŭn gơñu či tơbiă đuaĭ mơ̆ng anŭn hăng lu dram gơnam gơñu.#Tơb 12:40-41; Bruă 7:7. 15Gah kơ ih, ih či hmâo thŭn tha mơak mơai, giơ̆ng anŭn či rơnŭk rơnua wơ̆t glaĭ hăng ƀing ơi adon ih amăng pơsat hiam rŏ. 16Truh kơ rơnŭk tal pă, kơnŭng djuai ih či wơ̆t glaĭ pơ anai, yua kơ tơlơi soh sat kơ ƀing Amôrit aka truh krip yip đơi ôh.”

17Tơ yang hrơi lĕ laih anŭn tơlơi kơnăm mơmŏt gom, anai nê, hmâo sa boh tơpur apui hlăk dŏ bluh asăp đĭ, laih anŭn sa ƀĕ apui arok jă kơtang rơbat găn tơ̆ng krah khul hlô mơnơ̆ng arăng hmâo blah pơpha laih. 18Amăng hrơi anŭn, Yêhôwa pơjing kơnol pơgop hăng Abram: “Kâo či brơi kơ kơnŭng djuai ih lŏn čar anai, mơ̆ng ia krong Êjip#15:18 Kiăng laĭ jing ia krong Nil. hlŏng truh pơ ia krong prŏng adih, jing ia krong Ơphrat,#Bruă 7:5. 19jing lŏn kơ ƀing Kênit, Kênisit, Katmônit 20Hitit, Pêrisit, Rêphaim, 21Amôrit, Kanaan, Girgasit laih anŭn kơ ƀing Jêbusit.”

Currently Selected:

Čơdơ̆ng Phŭn 15: JRA2016

Highlight

Copy