Zakariya 4
4
Mboniwoni ya chakwimapo nyali
1 Mungelo uyo wakayowoyanga nane wakizaso, na kundiwuska nga ndi para nkhaŵa munthu uyo wakagona tulo twa kafwe na kafwe. 2Ndipo wakandifumba wakati, “Kasi ukuwonachi?” Ine nkhati, “Nkhuwona, chakwimapo nyali icho chose chikaŵa cha golide, na dira uyo wali pachanya pakhe, kweniso na nyali zinkhonde na ziŵiri papo, ndipo nyali yose yili na tumilomo tunkhonde na tuŵiri. 3Pafupi pakhe pali makuni gha maolive ghaŵiri, limoza ku dera la maryero la dira, linyakhe ku dera la mazere.”#Uvu 11.4
4Ndipo nkhamufumba mungelo uyo wakayowoyanga nane nkhati, “Kasi nvivichi ivi, sekuru wane?”
5Penepapo mungelo nayo wakandifumbaso ine wakati, “Kasi ulije kuvimanga ivi?”
Nkhati, “Chara, sekuru wane.”
Phangano la Fumu kwa Zerubabele
6Ntheura mungelo yura wandiphalira wakati, “Agha ndi mazgu gha Fumu kwa Zerubabele. Ukuruskira na nkhondo chara, nesi na nkhongono, kweni na Mzimu wane.”
Ntheura ndimo yikuyowoyera Fumu Mwenenkhongono zose.#Ezira 5.2
7“Kasi ndiwe kanthu uli, iwe phiri likuru. Panthazi pa Zerubabele, uti udirimukenge kuzgoka dambo. Iyo wati wize nalo libwe ilo ndi nkhorezgero ya chingodya uku ŵanthu ŵakuchemerezga kuti, ‘Nako nkhutowa! Nako nkhutowa!’ ” 8Penepapo mazgu gha Fumu ghakizaso kwa ine ndipo ghakati, 9“Zerubabele ndiyo ghakakhazika lufura lwa nyumba iyi, ndiposo ndiyo wayimarizgenge. Penepapo mwamkumanya kuti Fumu Mwenenkhongono zose yandituma kwa imwe.”
10“Pakuti yose uyo wakupepura zuŵa la kuchitira tunthu tuchoko wamkusekerera ndipo wamkuwona Zerubabele wakorera chingwe chakupimira.”
Mungelo yura wakati kwa ine, “Nyali zinkhonde na ziŵiri izi ndi maso gha Fumu, agho ghakwendendeka uku na uko mu charu chose cha pasi.”#Uvu 5.6
11Penepapo nkhafumba nkhati, “Kasi ghakung'anamulachi makuni ghaŵiri gha olive, agho ghali ku woko la maryero na la mazere la chakuŵikapo nyali?”#Uvu 11.4
12Nkharutilira kufumba nkhati, “Kasi yikung'anamulachi minthavi yiŵiri iyi ya makuni gha olive, iyo yili pafupi na tumilomo tuŵiri twa golide umo mukunjirira mafuta gha golide.”
13Iyo nayo wakandifumbaso wakati, “Kasi ulije kuvimanya ivi?” Nkhati, “Chara, sekuru wane.”
14Penepapo wakati, “Aŵa mbakuphakazgika ŵaŵiri awo ŵakwima pafupi na Fumu ya charu chose cha pasi.”
Currently Selected:
Zakariya 4: Tumbuka
Highlight
Share
Copy
Want to have your highlights saved across all your devices? Sign up or sign in
Bible Society of Malawi
