Zakariya 3

Nchimi yikuwona mboniwoni ya musofi mukuru

1Penepapo wakandirongora musofi mukuru Yoshuwa, wakwimilira panthazi pa mungelo wa Fumu, na Satana wakwimilira ku woko lakhe la maryero kumupacha.#Ezira 5.2; Uvu 12.10 2Ndipo mungelo wa Fumu wakati kwa Satana, “Fumu yikulange iwe Satana! Fumu iyo yikusankha Yerusalemu ndiyo yikulange! Asi Yoshuwa waŵa nga ndi chisinga chakuphurika mu moto?”#Yud 9 3Sono Yoshuwa wakimilira panthazi pa mungelo wa Chiuta, wakavwara vyakuvwara vya kubinkha. 4Ndipo mungelo yura wakaŵaphalira awo ŵakimilira panthazi pakhe wakati, “Muvurani vyakuvwara vya kubinkha.” Penepapo Yoshuwa wakati, “Wona, ndawuskako zakwananga zako, ndipo nditi ndikuvwarike vyakuvwara vyakuzirwa.” 5Ndipo nkhati, “Muvwarikani mphumphu pa mutu wakhe.” Ntheura ŵakamuvwarika mphumphu yakutowa pa mutu na kumuvwarika vyakuvwara viphya, ndipo mungelo wa Fumu wakimilira pafupi nayo.

6Mungelo wa Fumu wakamuchenjezga Yoshuwa wakati, 7“Fumu Mwenenkhongono zose yikuti, ‘Usange uti wendenge mu nthowa zane na kusunga marango ghane, uti uwusenge nyumba yane na kuŵa wa mazaza pa mphara zane. Ndipo nditi ndikupenge mazaza ghakuŵira mukati mu aŵa ŵimilira pano.’ ”

8“Pulika sono, Yoshuwa musofi mukuru, iwe na ŵasofi ŵanyako awo ŵali panthazi pako, chifukwa ndimwe chimanyikwiro cha vinthu viweme ivyo vikwiza. Wonani nditi ndize nayo muteŵeti wane uyo ndi Munthavi.#Yer 23.5, 33.15; Zak 6.12 9Pakuti wonani, pa libwe limoza pera ili, ndaŵika panthazi pa Yoshuwa, ilo liri na visko vinkhonde na viŵiri, nditi ndizongepo mazgu. Ndipo nditi ndifumyengepo kwananga kwa charu ichi mu zuŵa limoza pera.”

Ntheura ndimo yikuyowoyera Fumu Mwenenkhongono zose.

10“Mu zuŵa ilo, yikuti Fumu Mwenenkhongono zose, munthu yose wa imwe wamkuchemera muzengezgani wakhe musi mu khuni lakhe la mpheska na musi mu khuni lakhe la chikuyu kuti ŵafwase mu mutende.”#Mik 4.4

Currently Selected:

Zakariya 3: Tumbuka

Highlight

Copy