Zakariya 2

Mboniwoni ya chingwe cha kupimira

1Nkhinuska maso ghane, ndipo wonani, nkhawona munthu wali na chingwe chakupimira mu woko lakhe! 2Penepapo nkhati, “Kasi ukuyankhu?” Wakandizgora wakati, “Ndamkupima Yerusalemu, kuti ndimanye utali wakhe na usani wakhe.” 3Ndipo wonani, mungelo uyo wakayowoyanga nane wakasenderera kwa ine, ndipo mungelo munyakhe wakiza na kukumana nayo. 4Iyo wakamuphalira wakati, “Chimbira, uyowoye na munyamata yura uti, ‘Yerusalemu wamkuŵavye mphaka mwakuti ŵanthu ŵanandi na ng'ombe zinandi zamkuŵa mwenemumo.’ 5Pakuti ine ndiŵenge linga la moto kuwuzingirizga, ndipo ndiŵenge uchindami mukati mwakhe.” Ntheura ndimo yikuyowoyera Fumu.

Ŵamikori ŵakuchemeka kuwerera ku kaya

6 Fumu yikuti, “Imwe! Imwe! Chimbiraniko ku charu cha ku mpoto, pakuti ndamumbininiskirani ku madera ghose ghanayi gha mphepo za kuchanya.” Ntheura ndimo yikuyowoyera Fumu.

7“Chimbilirani ku Ziyoni, imwe mukukhara mu charu cha Babuloni.” 8Pakuti Fumu Mwenenkhongono zose iyo yikandirongora uchindami wakhe na kundituma ine, pa vya ŵamitundu awo ŵakamuskoghani imwe, yikuti, “Yose uyo wakukhwaska ŵanthu ŵane, wakundijoka mu jiso. 9Wonani nditi ndendeske woko lane la weruzgi pachanya pawo, ndipo ŵazga awo ŵakaŵateŵeteranga, ŵati ŵazgoke ŵaskoghi kwa iwo.” Penepapo mwamkumanya kuti Fumu Mwenenkhongono zose ndiyo yandituma.

10 Fumu yikuti, “Yimbani, sekererani, imwe ŵa mu Ziyoni. Pakuti, wonani, nkhwiza, ndipo ndizamkukhara mukati mwinu. 11Mu zuŵa leneilo, mafuko ghanandi ghamkujibatika kwa Fumu, ndipo ŵamkuŵa ŵanthu ŵane. Ndamkukhara mukati mwinu, ndipo mwamkumanya kuti Fumu Mwenenkhongono zose ndiyo yandituma kwa imwe. 12Fumu yamkuhara charu cha Yuda nga ndi phande lakhe mu charu chakupatulika, ndipo yamkusankhaso msumba wa Yerusalemu. 13Kharani chete panthazi pa Fumu, imwe mwa ŵanthu mose, pakuti yajiwuska yekha kufuma mu chikhazi chakhe chakupatulika.”

Currently Selected:

Zakariya 2: Tumbuka

Highlight

Copy