Zakariya 10
10
Fumu yikupangana kuŵathaska
1Rombani vura ya nyambwani kwa Fumu,
pa nyengo ya kwenerera.
Rombani kwa Fumu
iyo yikupanga maŵingu gha chimphupuru.
Iyo yikuŵapa ŵanthu vura ya muswera
ndipo yikumupaso waliyose mumera mu munda.
2Pakuti ŵangoza ŵakuyowoya vya wakawaka,
ŵaroski nawo ŵakuroska vya utesi.
Awo ŵakulota ŵakuphara maloto gha utesi
na kupereka chisangurusko cha waka.
Pa chifukwa ichi ŵanthu ŵakuyinga
nga ndi mberere zakusoŵa.
Iwo ŵali mu suzgo
chifukwa ŵalije mliska.
3Ukari wane ukugolera kususkana na ŵaliska,
ndipo nditi ndiŵalange ŵarongozgi aŵa.
Pakuti Fumu Mwenenkhongono zose
yikupwererera mskambo wakhe, uwo mbaYuda.
Yiti yiŵazgore kuŵa mahachi
agho ŵakujikuzga nagho mu nkhondo.
4Mwa iwo mwizamkufuma ŵanthu
awo ŵali nga ndi mawe gha nkhorezgero ya chingodya,
awo ŵali nga ndi chikhomo cha hema
awo ŵali nga ndi uta wa nkhondo.
Mwizamkufuma wose awo ŵakuwusa.
5Wose pamoza ŵamkuŵa
nga ndi vinkhara mu nkhondo,
kukandira pasi ŵarwani
mu mathipa gha mu misewu.
Ŵamkurwa, chifukwa Fumu yili nawo,
ndipo ŵamkuŵatonda awo ŵakukwera pa mahachi.
6Ndamkuyikhozga mbumba ya Yuda,
na kuyithaska mbumba ya Yosefe.
Ndamkuŵawezga chifukwa ndili nawo na chiwuravi.
Ŵamkuŵa nga ndi para nkhaŵavye na kuŵataya.
Pakuti ndine Fumu, Chiuta wawo,
ndamkupulika kuromba kwawo.
7Ntheura ŵaEfurayimu ŵamkuŵa
nga ndi chinkhara cha nkhondo.
Ŵamkukondwa mu mitima yawo
nga mbanthu awo ŵamwa vinyo.
Ŵana ŵawo ŵamkuchiwona na kusekerera,
mitima yawo yamkukondwera mwa Fumu.
8“Ndamkuŵarizgira kaluvi kuti ŵize
chifukwa ndaŵawombola
ndipo ŵamkuŵa ŵanandi
nga ndi umo ŵakaŵira kale.
9Nanga nkhaŵambininiskira mu ŵamitundu,
ndipouli ŵizamkundikumbuka mu vyaru vya kutali.
Iwo na ŵana ŵawo ŵizamkuŵa na umoyo,
wose ŵizamkuwerako.
10Ndamkuŵatorera ku kwawo
kufuma nawo ku charu cha Eguputo
na kuŵawunganya
kufuma mu charu cha Asiriya.
Ndamkwiza nawo ku charu cha Gileyadi na cha Lebanoni
ŵasuke ŵazure mu charu.
11Ŵamkuporota nyanja ya visuzgo,
ndipo majigha gha nyanja ghamkukanizgika,
ndipo ndimba zose ya mronga wa Nayelo, zamkukamuka.
Kujikuzga kwa charu cha Asiriya kwamkukhizgikira pasi,
ufumu wa charu cha Eguputo wamkuwuskikako.
12Ndamkuŵakhozga mwa ine Fumu,
ndipo ŵamkuthumbwira mwa ine.”
Ntheura ndimo yikuyowoyera Fumu.
Currently Selected:
Zakariya 10: Tumbuka
Highlight
Share
Copy
Want to have your highlights saved across all your devices? Sign up or sign in
Bible Society of Malawi
