Zakariya 9
9
Weruzgi wa ŵarwani ŵa charu cha Israele
1Agha ndi mazgu gha Fumu ghakuchima
vya charu cha Hadiraki na msumba wa Damaseko.
Kuti ndi mafuko gha Israele pera chara,
kweni na msumba ukuru wa Aramu nawo ngwa Fumu.#Yes 17.1-3; Yer 49.23-27; Amo 1.3-5#Yes 23.1-18; Eze 26.1—28.26; Yoy 3.4-8; Amo 1.9-10; Mat 11.21-22; Luk 10.13-14
2Ghakuchimaso vya Hamati, uyo wakupakana na Hadiraki,
ndiposo na misumba ya Ture na Sidoni,
nangauli nja vinjeru chomene.
3Ture wajizengera malinga,
ndipo wajiwunjikira siliva nga fuvu,
na golide nga ndi mathipa gha mu ŵagurwe ŵa mu msumba.
4Kweni wonani, Fumu yiwupoke mphango zakhe
na kuponya usambazi wakhe mu nyanja,
ndipo msumba umyangulikenge na moto.
5Ashikeloni wizamkuchiwona ichi
ndipo wizamkopa.
Gaza nayo wizamkunyongozeka na urwirwi;
na Ekuroni wuwo chifukwa chigomezgo chakhe chamkulengeskeka.
Karonga wamkufwa mu msumba wa Gaza,
ndipo msumba wa Ashikeloni wamkuŵavye ŵakukharamo.#Yes 14.29-31; Yer 47.1-7; Eze 25.15-17; Yoy 3.4-8; Amo 1.6-8; Zef 2.4-7
6Ŵamitundu yakupambanapambana
ndiwo ŵamkukharamo mu Ashidodi,
ndipo ndamkumara kujikuzga kwa ŵaFilisiti.
7Ndamkuwuskamo nyama ya ndopa mu mlomo wakhe
na vyakuseruska mu mino ghakhe.
Icho nacho chamkuŵa na ŵanthu ŵakukharako ŵa Chiuta withu,
ŵamkuŵa ŵarongozgi nga ndi ŵaYuda,
ndipo msumba wa Ekuroni nawo wamkuŵa nga ndi wa ŵaYebusi.
8Ndipo ndizengenge msasa na kuŵa mulinda pa nyumba yane.
Kwamkuŵavye na munthu wakwenda uku na uku
kuŵayuzga kuti waŵathereskeso
pakuti sono nkhuŵavikirira.
Karonga wa kunthazi
9Kondwerani, sekererani
imwe ŵanthu ŵa mu Ziyoni!
Chemerezgani na chimwemwe
imwe ŵanthu ŵa mu Yerusalemu!
Wonani, karonga winu wakwiza kwa imwe,
watonda na kuvivya,
ngwa kuzika ndipo wakwera pa mbunda,
inya wakwera pa kamwana ka mbunda.#Mat 21.5; Yoh 12.15
10Ndiwuskeko magareta ghakufumira ku charu cha Efurayimu
na mahachi gha nkhondo kufuma ku Yerusalemu.
Ndiphyorenge mauta gha nkhondo,
ndipo iyo wamkupharazga mutende ku mafuko ghose.
Mazaza gha ufumu wakhe ghaŵenge
kufuma ku nyanja kuya kafika ku nyanja yinyakhe,
kufuma ku mronga wa Yufurate
na kuya kafika ku mphererekezgo za charu.#Mas 72.8
Kuwezgekeraso kwa ŵanthu ŵa Chiuta
11 Fumu yikuti,
“Chifukwa cha ndopa za phangano lane na iwe,
ndamkuŵafumiskamo ŵakayidi ŵako,
mu chisimi chambula maji.”#Kuf 24.8
12Wererani ku linga, imwe ŵakayidi,
mwaŵeneimwe mukulindizga mu chigomezgo.
Muhanya uno nkhumuphalirani nkhuti,
“Ndamkumupani njombe
ndipo ndamkuwezgerani kaŵiri.”
13Pakuti Yuda ndamukweŵa nga ndi uta wane,
Efurayimu ndamuzgora kuŵa muvwi wakhe.
Ŵanthu ŵa mu Ziyoni
ŵaŵenge nga ndi lupanga lwa chinkhara,
lwakutimbira ŵa charu cha Grisi.
14 Fumu yamkuŵawonekera,
ndipo muvwi wakhe wamkumwetuka nga ndi leza.
Fumu Chiuta wamkulizga mbata
na kwenda mu ŵakavuruvuru kufuma ku mwera.
15 Fumu Mwenenkhongono zose yamkuŵavikirira ŵanthu ŵakhe,
ndipo yamkuŵamara na kuŵakandira pasi
awo ŵakaŵaponya na mawe.
Ŵamkumwa ndopa zawo
nga ndi para ŵakumwa vinyo.
Ŵamkuzura na ndopa nga ndi ŵadira
na kuzumbwa na ndopa
nga ndi masengwe gha jochero.
16Pa zuŵa ilo Fumu, Chiuta wawo wizamkuŵathaska
chifukwa ndi mskambo wa ŵanthu ŵakhe.
Iwo ŵati ŵang'azimenge mu charu
nga ndi vitowelo pa mphumphu.
17Charu chira chizamkuŵa chiweme
ndiposo na chakutowa.
Vyakurya vyamkuŵapa nkhongono ŵanyamata,
vinyo liphya lamkuŵapa nkhongono ŵamwali.
Currently Selected:
Zakariya 9: Tumbuka
Highlight
Share
Copy
Want to have your highlights saved across all your devices? Sign up or sign in
Bible Society of Malawi
