Sumu Yikuru 8
8
1Mbaya mwe, ukareka kuŵa mudumbu wane,
uyo wakonkha bere pamoza na ine kwa amama!
Ndikumanenge nawe kuwaro,
mphanyi ndakukufyofyontha pakweru,
mphanyi panguŵavye wakundiyuyura.
2Mphanyi ndakukutora na kukunjizga,
mu nyumba ya amama,
ku chipinda cha uyo wakandibaba.
Mphanyi ndakukupa vinyo,
wakusazgako vyakununkhira kuti umwe,
maji gha vipambi kufuma ku magalagadeya ghane.
3Woko lako la mazere,
mphanyi liri kusi kwa mutu wane,
woko lako la maryero undifukatire nalo.
4Nkhumurombani, mwa ŵamwali ŵa mu Yerusalemu,
kuti chitemwa ichi mureke kuchisunkhunya panji kuchiwuska,
mpaka apo icho chikhumbirenge.
Sumu ya chinkhonde na chimoza
Ŵanakazi ŵakuyowoya
5Kasi ndi njani uyo wakwiza, kufumira ku mapopa,
uyo weghamira pa wakutemweka wakhe?
Mwanakazi wakuyowoya
Musi mu khuni la mararanje, nkhawuska iwe.
Penepara ndipo ŵanyoko,
ŵakaŵira mu vyakuŵinya vya pakukubaba iwe.
Inya, penepara uyo wakaŵa mu vyakuŵinya,
ŵakakubaba iwe.
6Undiŵike mu mtima wako kuŵa nga ndi chidindo,
nga ndi chidindo pa woko lako,
pakuti kutemwa nkhwa nkhongono nga ndi malo gha ŵakufwa,
sanje nja nkhaza nga ndi nyifwa.
Kocha kwakhe kuli nga ndi makara gha moto,
kuli ndi dimi lakofya chomene.
7Maji ghanandi kuti ghangazimya kutemwa chara,
nanga ndi mironga yakuzura, kuti yingakukura chara.
Usange munthu wangapereka vyuma vyose vya mu nyumba yakhe,
kuti wagule kutemwa, iyo wangasekeka chomene.
Ŵadumbu ŵa mwanakazi wakuyowoya
8Ise tili na mudumbu withu muchoko,
uyo maŵere ghakhe ghachali ghachoko.
Kasi tizamkumuchitira vichi mudumbu withu,
pa nyengo iyo wizamkujalirika?
9Usange iyo wali nga ndi chiliŵa,
titi timugulire sindiriya wakuŵa nga msonjo wa siliva.
Kweni usange wali nga ndi muryango,
titi timujalire na makuni gha milanje.
Mwanakazi wakuyowoya
10Ine nkhaŵa chiliŵa,
maŵere ghane ghakaŵa nga ndi vigongwe vya siliva.
Ntheura panthazi pa wakutemweka wane,
nkhaŵa nga ndi uyo wakwiza na mutende.
Mwanarume wakuyowoya
11 Solomoni wakaŵa na munda wa mpheska,
ku Baala Hamoni.
Munda wa mpheska ura
wakawubwerekeska ku ŵalimi.
Waliyose wakenera kupereka ndarama 1,000 za siliva,
kufuma ku vipambi vyakhe.
12Iwe Solomoni, ungaŵa na ndarama 1,000 za siliva,
ŵalimi ŵa vipambi ŵangaŵa na ndarama 200.
Kweni munda wa mpheska ngwane na wane,
ngwa ine ndekha.
13Iwe ukukhara mu minda,
ŵabwezi ŵane ŵakutegherezga
kuti ŵapulike lizgu lako.
Rekani ine ndilipulike.
Mwanakazi wakuyowoya
14Endeska, wakutemweka wane,
uŵe nga ndi mbaŵara,
panji nga ndi kana ka nyiska,
pachanya pa mapiri gha vyakununkhira.
Currently Selected:
Sumu Yikuru 8: Tumbuka
Highlight
Share
Copy
Want to have your highlights saved across all your devices? Sign up or sign in
Bible Society of Malawi
