Yesaya Maronje
Maronje
Buku la Yesaya likuchemeka na zina la nchimi yakumanyikwa chomene iyo yikakharanga mu Yerusalemu kufuma pa chirimika cha 750 kufika pa chirimika cha 700 pambere Khristu wandababike. Buku ili lingagaŵika mu vigaŵa vitatu mwa ntheura:
(1) Chipaturo 1 mpaka 39: Mu chigaŵa ichi muli uthenga uwo ukapharazgika pa nyengo iyo ŵaYuda ŵakawofyekanga na karonga wa charu cha Asiriya. Nchimi Yesaya wakaŵapharazgira ŵanthu ŵara kuti icho ŵakenera kopa pa umoyo wawo kuti chikaŵa nkhongono ya karonga wa charu cha Asiriya chara. Kweni ŵakenera kopa kwananga, kureka kupulikira kwawo kwa Chiuta, ndiposo na kureka kugomezga kwawo mwa iyo. Yesaya wakachiska ŵarongozgi na ŵanthu ŵawo kuti ŵazgoke mtima na kwamba kuchita viweme na kuŵa ŵakugomezgeka. Iyo wakaŵachenjezga kuti charu chawo chiti chimarenge usange ŵarekenge kupulikira Chiuta. Yesaya wakachimaso kuti kunthazi kwizamkuŵa mutende mu charu chose cha pasi ndipo yumoza wa ŵazukuru ŵa Davide ndiyo wizamkuŵa karonga wambula kalema.
(2) Chipaturo 40 mpaka 55: Mu chigaŵa ichi muli uthenga uwo ukapharazgika pa nyengo iyo ŵaYuda ŵakaŵira ku umikori mu charu cha Babuloni. Iwo ŵakasuzgika ndipo ŵakaŵa ŵambula chigomezgo. Nchimi Yesaya wakapharazga kuti Chiuta wati waŵawombole ku umikori wawo ndipo wati waŵawezgere ku Yerusalemu mwakuti ŵakambe umoyo uphya. Uthenga ukuru ngwa kuti Chiuta ndiyo wakurongozga vinthu vyose pa umoyo wa munthu. Urato wa Chiuta ngwa kuti ŵaIsraele ŵatandazge khumbo la Fumu ku ŵanthu wose awo nawo ŵangatumbikika kwizira mwa iwo. Mazgu ghakuti “Muteŵeti wa Fumu” ndigho ghakumanyikwa chomene mu buku ili ndiposo na mu Phangano lose la Kale.
(3) Chipaturo 56 mpaka 66: Mu chigaŵa ichi muli uthenga uwo ukapharazgika ku ŵanthu awo ŵakawerako ku umikori na kwiza ku Yerusalemu. Ŵanthu aŵa ŵakakhumbanga kuŵa na chipanikizgo chakuti Chiuta wati wafiskenge mapangano ghakhe ku charu cha Israele. Kweni ŵanthu ŵakwenera kuchita icho nchiweme na kuŵa ŵakugomezgeka kwa Chiuta. Ŵasungenge zuŵa la Sabata na kupereka sembe ndiposo na kuromba chomene. Mazgu ghakumanyikwa chomene nga Yesaya 61.1-2 gheneagho Yesu wakiza kaŵazga apo wakambiranga mlimo wakhe wakupharazga na kusambizga.
Ndondomeko ya vya mukati
Mazgu ghakuchenjezga na gha phangano 1.1—12.6
Chiuta wizamkulanga ŵanthu wose 13.1—23.18
Chiuta wizamkweruzga charu cha pasi 24.1—27.13
Mazgu ghanyakhe ghakuchenjezga na gha phangano 28.1—35.10
ŴaAsiriya ŵakumofya Hezekiya karonga wa charu cha Yuda 36.1—39.8
Mazgu gha phangano na gha chigomezgo 40.1—55.13
Mazgu ghanyakhe ghakuchenjezga na gha phangano 56.1—66.24
Currently Selected:
Yesaya Maronje: Tumbuka
Highlight
Share
Copy
Want to have your highlights saved across all your devices? Sign up or sign in
Bible Society of Malawi