Yesaya 1
1
1Iyi ndi mboniwoni ya Yesaya mwana wa Amozi, yeneiyo yikuphara vya charu cha Yuda na msumba wa Yerusalemu mu nyengo ya kuwusa kwa Uziya, Yotamu, Ahazi na Hezekiya mu charu cha Yuda.#2 Kar 15.1-7, 15.32—16.20, 18.1—20.21; 2 Mid 26.1—32.33
Chiuta wakususka ŵanthu ŵakhe
2Pulika iwe mtambo, tegherezga iwe charu cha pasi,
pakuti Fumu yayowoya kuti,
“Ine nkhababa ŵana na kuŵalera,
kweni ŵandigarukira.
3Nkhambako yikumanya sekuru wakhe,
mbunda nayo yikumanya icho yikuryeramo.
Kweni ŵaIsraele kuti ŵakumanya chara,
ŵanthu ŵane kuti ŵakupulikiska chara.”
4Mbaya mwe, fuko lakwananga,
ŵanthu ŵakuzura na zakwananga,
ŵa mphapu ya ŵanthu awo ŵakuchita uheni,
ŵana awo ŵakuchita vya ubendezi!
Iwo ŵali kupata Fumu,
ŵali kuyuyura Mutuŵa Yura wa Israele,
ndipo ŵarazgira nkhonyoro zawo kwa Fumu yawo.
5Kasi nchifukwa uli mukukhumba kutimbikaso?
Kasi nchifukwa uli mukurutilira kundigarukira?
Mutu winu wose uli na vilonda,
ndipo mtima winu wose waropwa.
6Kufuma ku chitende cha lundi mpaka ku mutu,
palije apo pali makora.
Pose pali mathuvya, vilonda na kuchekeka.
Vilonda vyakhe vyambula kusukika nesi kukakika,
palije mafuta agho ghathirikapo kuti ghawombeskepo.
7Charu chinu chakhara mapopa,
misumba yinu yocheka na moto,
minda yinu yikutoreka na ŵalendo,
apo imwe mukulaŵiska,
Nadi, charu chinu chakhara mapopa,
nga ndi para chathereskeka na ŵalendo.
8Msumba wa Ziyoni ndiwo wakharako wambula chivikiriro,
nga ndi msasa mu munda wa mpheska,
nga ndi chilindo mu munda wa vinkhaka,
ndiposo nga ndi msumba uwo wazingilizgika na nkhondo.
9 Fumu Mwenenkhongono zose yirekenge kutisidira
ŵachoko waka kuŵa ŵamoyo,
mphanyi ise tili nga ndi Sodomu, na kuŵa nga ndi Gomora.#Mut 19.24; Rom 9.29
10Pulikani sono icho Fumu yikuyowoya,
imwe ŵarongozgi ŵa mu Sodomu.
Tegherezgani ku ivyo Chiuta withu wakusambizga,
imwe ŵanthu ŵa mu Gomora!
11 Fumu yikuti,
“Sembe zakukoma zinandinandi izo mukupereka,
kasi nkhanthu uli kwa ine?
Ine ndavuka nazo sembe zakocha mburuma
za mberere zanarume,
na sembe za mafuta za vyakuŵeta vyakututuŵa.
Ine kuti nkhukondwa na ndopa za nkhambako,
nesi za ŵana-mberere panji za mbuzi.#Amo 5.21-22
12Para mukwiza kawoneka panthazi pane,
kasi ndi njani wamulangulani kuti mudyakemo mu mphara zane?
13Mureke kwiza nazo sembe zawakawaka.
Vyakununkhira vyinu mbukazuzi kwa ine,
ndiposo na maungano gha pa kuthwasa kwa mwezi
na gha maSabata, na agho mukuchema.
Ine kuti ndingazizipizga chara
uheni pamoza na maungano ghakupatulika.
14Viphikiro vyinu vya kuthwasa kwa mwezi,
na viphikiro vinyakhe sono nkhuvitinkha.
Viphikiro vyinu vyazgoka mphingo kwa ine,
ndiposo vyandilemera kuzizipizga.
15Para mukuwuska mawoko ghinu muchanya pakuromba,
ine kuti ndilaŵiskengeko chara.
Nangauli mungaromba kanandinandi waka,
kuti nditi ndimupulikani chara,
chifukwa mawoko ghinu nga ndopa pera.
16Gezani kuti mujitozge.
Wuskanipo uheni panthazi pane,
mureke kuchita uheni.
17Sambirani kuchita uweme.
Yezgani kupereka weruzgi wakunyoroka.
Chenya awo ŵakunyekezga ŵanyawo.
Vikirirani ŵalanda,
ŵeyererani vyokoro.”
18 Fumu yikuti,
“Zaninge sono, tidumbiskane.
Nanga zakwananga zinu zingaŵa ziswesi,
ziti ziŵenge zituŵa nga ndi nyathutwe,
nanga zingaŵa zichesamu,
ziti ziŵenge zituŵa nga ndi thonje.
19Usange mukukhumba kupulikira,
muti muryenge viweme vya mu charu.
20Kweni usange mukukana na kugaruka,
muti mumarenge na nkhondo,
pakuti ntheura ndimo yikuyowoyera Fumu.”
Msumba wakuzura na kwananga
21Wonani, msumba wa ŵanthu ŵakugomezgeka,
sono ndi msumba wa ŵazaghali.
Msumba uwo mukachitanga weruzgi wakunyoroka,
urunji ndiwo ukaŵa mu msumba uwu,
kweni sono ndimo muli ŵanthu ŵakukoma.
22Iwe Yerusalemu, ukaŵa nga ndi siliva,
kweni sono uli nga ndi murosko,
ukaŵa nga ndi vinyo liweme,
kweni sono uli nga ndi maji waka.
23Ŵakaronga ŵako ŵandigarukira ine,
ŵaŵa ŵabwezi ŵa ŵankhungu,
wose ŵakutemwa vimbundi,
ndipo ŵakuchimbilira kuromba vyawanangwa.
Ŵalanda kuti ŵakuŵavikirira chara,
nanga nkhutegherezga ku madandaulo gha vyokoro.
24Ntheura Chiuta, Fumu Mwenenkhongono zose,
Chikurukuru Yura wa Israele wakuti,
“Nditi ndipungulire ukari wane pa ŵarwani ŵane,
na kuwezgera nduzga pa iwo.
25Nadi nditi ndinyoroske woko lane kulimbana nawe,
nditi ndikukweske zakwananga zako,
nga ndi umo ŵakukweskera murosko ku visulo.
26Ŵeruzgi ŵako nditi ndiŵawezgeremoso,
nga ndi pakudanga para.
Ŵarongozgi ŵako nawo nditi ndiŵawezgeremoso,
nga ndi pakudanga para.
Pamanyuma uti uchemekeso,
Msumba wa Urunji,
Msumba Wakugomezgeka.”
27 Ziyoni wati wawomboleke
na weruzgi ŵakunyoroka,
ndipo awo ŵakurapa zakwananga zawo,
ŵati ŵawomboleke pakuchita vya urunji.
28Kweni ŵachigaruka na ŵakwananga,
ŵati ŵamalirenge pamoza.
Ndipo awo ŵakuyireka Fumu,
ŵati ŵalangike.
29Muti mukhozgekenge nagho soni makuni gha musoro,
agho mukakondwanga nayo pakusoperamo vikozgo,
ndipo muti mulengeskekenge nayo minda
iyo mukasankha kusoperamo vikozgo.
30Mwizamkuŵa nga ndi khuni la musoro
ilo mahamba ghakhe ghakufota,
nga ndi munda wambula maji.
31Munthu wankhongono waŵenge
nga ndi nkhuni lakomira,
ndipo milimo yakhe yiŵenge
nga ndi swatu.
Ntheura vyose viti viphyire pamoza,
kwambula na yumoza wakuvizimyizga.
Currently Selected:
Yesaya 1: Tumbuka
Highlight
Share
Copy
Want to have your highlights saved across all your devices? Sign up or sign in
Bible Society of Malawi
