Mika 7
7
Kwananga kwa ŵaIsraele
1Soka kwa ine!
Pakuti ndaŵa nga ndi munthu
uyo wakuwunganya vipambi vya pa chihanya,
uyo wakuvulura mu munda wa mpheska.
Mulije nanga ndi khunje la mpheska kuti ndirye.
Mulije nanga ndi chipambi cha chikuyu chakudanga kuphya,
cheneicho mtima wane ukudokera.
2Ŵanthu ŵakusopa Chiuta ŵamara mu charu cha pasi,
ndipo palije murunji mukati mwawo.
Wose ŵakukhazga kuti ŵathiske ndopa,
ndipo waliyose wakusaka munyakhe na ukonde.
3Mawoko ghawo ghakukora icho nchiheni,
na kuchichita na phamphu lose.
Karonga na mweruzgi ŵakufumba chibundi,
ndipo munthu wakuzirwa wakuyowoya
icho mtima wakhe ukukhumba.
Ntheura ŵakubendezga mrandu.
4Munthu muweme kwakuruska mukati mwawo
wali nga ndi nthura.
Wakunyoroka chomene mukati wawo
wali nga ndi luŵigho lwa minga.
Zuŵa la chilango lafika,
leneilo ŵalinda ŵawo, zinchimi, ŵakayowoya.
Sono kutimbanizgika kwawo kwaneng'enera.
5Ureke kugomezga muzengezgani wako,
nanga nkhuŵika chigomezgo mu mubwezi wako.
Ujikore mu mayowoyero ghako
nanga nkhwa muwoli wako wa pa mtima.
6Pakuti mwana mwanarume wakuwukira ŵawiske,
mwana mwanakazi nayo wakuwukira ŵanyina,
ndipo mukamwana nayo wakuwukira ŵanyinavyara.
Ŵarwani ŵa munthu ndi awo mba mu nyumba yakhe.#Mat 10.35-36; Luk 12.53
7Kweni ine, nditi ndilaŵiske kwa Fumu,
nditi ndimulindilire Chiuta kuti wandiponoske,
Chiuta wane wati wandipulike.
Fumu yikwiza na ungweru na uthaski
8Iwe wa murwani wane,
ungakondweranga pa ine chara.
Para ndawa, nditi ndiwuke,
para nkhukhara mu chisi,
Fumu yiti yiŵenge ungweru wane.
9Nditi ndipokerere ukari wa Fumu
chifukwa ndayinangira.
Yiti yindiyowoyere mrandu wane,
na kunderuzga.
Yiti yinditorere ku ungweru,
ndipo ndizamkuwona urunji wakhe.
10Ntheura murwani wane wizamkuwona,
ndipo soni zizamkumukora mweneuyo wakatenge kwa ine,
“Kasi Fumu, Chiuta wako wali nkhu?”
Ndamkuwona umo wamkukandirizgikira pasi,
nga ndi mathipa mu ŵagurwe ŵa mu msumba.
11Ndilo lamkuŵa zuŵa lakuzengeraso viliŵa vyako!
Mu zuŵa ilo mphaka yamkutandaukirako chomene.
12Mu zuŵa ilo ŵanthu ŵamkwiza kwa iwe
kufuma ku charu cha Asiriya
kuya kafika ku charu cha Eguputo,
ndiposo kufuma ku charu cha Eguputo
kuya kafika ku mronga wa Yufurate,
kufuma ku nyanja
kuya kafika na ku nyanja yinyakhe,
ndiposo kufuma ku phiri
kuya kafika ku phiri linyakhe.
13Kweni charu chamkukhara mapopa
chifukwa cha ŵanthu awo ŵakukharamo,
chifukwa cha vipambi vya milimo yawo.
Chiwuravi cha Fumu pa Israele
14Na ndodo yinu liskani ŵanthu ŵinu
ŵeneawo ndi mskambo wa chiharo chinu.
Iwo ŵakukhara pa ŵekha mu thengere,
mukatikati mu charu icho ncha utheka.
Ŵarekani ŵaryenge mu chigaŵa cha Bashani na cha Gileyadi
nga ndi umo ŵakachitiranga kale.
15 Fumu yikuti,
“Ndamkuŵarongora vinthu vya kuzizwiska
nga ndi mu mazuŵa agho mukafumiranga mu charu cha Eguputo.”
16Ŵamitundu ŵamkuwona na kukhozgeka soni
pakuŵavye nkhongono zose.
Ŵamkuŵika mawoko pa milomo yawo,
ndipo makutu ghawo ghamkuŵa ghakumangwa.
17Ŵamkumyanga fuvu nga ndi njoka,
nga ndi vinyama vyakukhwaŵa pasi.
Ŵamkufuma mu malinga ghawo
uku ŵakutenthema.
Mu chitenthe chikuru
ŵamkuzgokera kwa Fumu Chiuta withu,
ŵamkuŵa na wofi chifukwa cha iwe.
18Ndi Chiuta nju uyo wakuyana namwe,
uyo wakugowokera zakwananga?
Iyo wakujumphapo waka
pa majuvyo gha ŵanthu ŵakhe.
Kuti wakusungilira ukari wakhe kwa muyirayira chara,
chifukwa wakukondwera kurongora chisungusungu chakhe.
19Wamkuŵa na chiwuravi pa ise,
ndiposo wamkughakandirizgira pasi maubendezi ghithu.
Wamkutaya mauheni ghithu ghose
mu ndimba ya nyanja.
20Imwe mwamkujirongora kuŵa wakugomezgeka kwa Yakhobe
wa chisungusungu kwa Abrahamu,
nga ndi umo mukarapira ku ŵasekuru ŵithu
mu mazuŵa gha kale.
Currently Selected:
Mika 7: Tumbuka
Highlight
Share
Copy
Want to have your highlights saved across all your devices? Sign up or sign in
Bible Society of Malawi
