Mika 6
6
Fumu yikupereka mrandu ku ŵanthu ŵa charu cha Israele
1Pulikani icho Fumu yikuyowoya.
Wukani, pataurani mrandu winu panthazi pa mapiri,
tumapiri tupulike mazgu ghinu.
2Pulikani, imwe mapiri,
na imwe malufura ghakukhora gha charu cha pasi,
makani gha mrandu kwa Fumu.
Pakuti Fumu yili na mrandu na ŵanthu ŵakhe,
ndipo yimikanenge na Israele.
3Imwe ŵanthu ŵane, kasi ndachitachi kwa imwe?
Kasi ndamuvuskani mu vichi? Ndizgorani!
4Pakuti nkhamufumyani mu charu chira cha Eguputo,
na kumuwombolani imwe kufuma ku nyumba ya uzga.
Nkhamutumirani Mozesi kumurongozgani
ndipo nkhatumaso Aroni na Miriyamu.#Kuf 4.10-16, 12.50-51, 15.20
5Imwe ŵanthu ŵane, kumbukani
icho Balaki karonga wa Mowabu wakapanga,
na umo Balaamu mwana wa Beyoro wakamuzgolera iyo,
na ivyo vikachitika kufuma ku Shitimu kuya kafika ku Giligala,
mwakuti mumanye kugomezgeka kwa Fumu.#Kup 22.2—24.25; Yos 3.1—4.19
Icho Fumu yikukhumba
6“Nchichi icho ndiperekenge panthazi pa Fumu,
na kwiza kajikama nacho ndekha panthazi pa Chiuta wa kuchanya?
Kasi ndizenge panthazi pakhe na sembe zakocha,
na ŵana ŵa ng'ombe ŵa chirimika chimoza?
7Kasi Fumu yikondwerenge na mberere zanarume vikwivikwi,
panji na mafuta ghakuzura viŵiya vinandinandi?
Kasi ndipereke mwana wane wa uŵere
chifukwa cha majuvyo ghane,
chipambi cha thupi lane
chifukwa cha zakwananga zane?”
8Iwe wa munthu, Fumu yakurongora icho nchiweme.
Ivyo Fumu yikukhumba ndi ivi:
Kuchita icho nchakunyoroka,
kutemwa kuchita lusungu,
na kuŵa na umoyo wakujiyuyura,
mu wenenawene na Chiuta wako.
9Lizgu la Fumu likuchemerezga ku msumba.
Munthu wakopa Fumu ngwa vinjeru.
Pulikani imwe fuko na wumba wa mu msumba!
10Kasi ndingaruwa vyuma vya uheni mu nyumba ya ŵaheni,
panji miyeso yakupimira iyo njakupusika pakuguliska?
11Kasi ndimupimenge wambula mrandu
uyo wali na thumba la miyeso yiheni
na vyakupimira vyakupusika?
12Ŵasambazi winu ŵazura na mbembe.
Awo ŵakukhara mukati mwinu ŵakuyowoya mautesi,
na lulimi lwawo ŵakuyowoya maboza pera.
13Pa chifukwa ichi ndambako kumutimbani
kumuzgorani pharaniko chifukwa cha zakwananga zinu.
14Mwamkurya, kweni mwamkukhuta chara.
Mupulikenge njara mukati mwinu.
Mwamkuwunjika vinthu,
kweni vyamkusungika chara.
Icho mwasungilira
chamkumalira ku nkhondo.
15Mwamkuseŵa, kweni kuti mwamkuvuna chara.
Mwamkuponda maolive,
kweni mwamkuphakara mafuta ghakhe chara.
Mwamkuponda mpheska,
kweni mwamkumwako vinyo lakhe chara.
16Pakuti mwarondezga vilayizgo vya Karonga Omuri,
na milimo yose ya mbumba ya Ahabu mwana wa Omuri.
Mwarutirizga maluso ghawo.
Ntheura ndimuparanyaninge,
ndipo ŵanthu ŵinu ŵahoyekenge.
Mwamkuŵa chisunjizgo cha ŵamitundu.#1 Kar 16.23-34, 21.25-26
Currently Selected:
Mika 6: Tumbuka
Highlight
Share
Copy
Want to have your highlights saved across all your devices? Sign up or sign in
Bible Society of Malawi
