Mika 4
4
Fumu yamkuwusa mu mutende charu chose
(Yes 2.2-4)
1Mu mazuŵa ghakumalira phiri la Nyumba ya Fumu yizamkukhazikika,
kuŵa phiri litali chomene ku mapiri ghose,
ndipo lizamkukwezgeka pachanya pa mapiri ghose.
Mafuko ghanandi ghamkundonda kuruta kwa ilo.
2Ndipo mafuko ghanandi ghamkwiza, na kuti:
“Zaninge, tiyeni tirute ku phiri la Fumu,
ku Nyumba ya Chiuta wa Yakhobe.
Iyo watisambizgenge nthowa zakhe
mwakuti tendenge mwenemumo.”
Pakuti dango lifumirenge ku Ziyoni,
ndipo mazgu gha Fumu ghafumirenge ku Yerusalemu.
3Iyo wizamkweruzga pakati pa ŵanthu ŵanandi,
na kudumula mphindano pakati pa mafuko gha pafupi na gha kutali.
Iwo ŵizamkufura malupanga ghawo kuŵa mayembe,
ndiposo mikondo yawo kuŵa zimphopo.
Mitundu yizamkuwukirana chara kuti yirwe nkhondo
nanga nkhusambiraso vya nkhondo.#Yoy 3.10
4Munthu yose wizamkukhara
musi mu mpheska yakhe
ndiposo na musi mwa khuni lakhe la chikuyu.
Pamkuŵavye munthu wakuŵawofya,
chifukwa Fumu Mwenenkhongono zose ndiyo yayowoya.#Zak 3.10
5Pakuti ŵanthu wose ŵakwenda
wose kwakuyana na ŵachiuta wawo.
Kweni ise tendenge mu zina la Fumu,
Chiuta withu kwa muyirayira.
ŴaIsraele ŵati ŵawereko ku umikori
6 Fumu yikuti,
“Mu zuŵa ilo
ndamkuŵika pamoza ŵakupendera.
Ndamkuŵawunganya ŵakuchimbizgika,
ndiposo na awo ndili kuŵaŵika mu visuzgo.
7Ine Fumu ndamkuŵazgora ŵakupendera
kuŵa ŵanthu ŵane.
Ŵakuchimbizgika ndamkuŵazgora
kuŵa mtundu wa nkhongono.
Ine Fumu ndamkuŵawusa iwo mu Phiri la Ziyoni,
kufuma nyengo iyi mpaka muyirayira.
8Ndipo iwe, We chigongwe cha mskambo wa mberere,
linga la ŵanthu ŵa mu Ziyoni,
ivyo nkhapangana nawe vizamkuchitika.
Ufumu wako wakale wizamkukuwereraso
ufumu wa ŵanthu ŵa mu Yerusalemu wizamkwizaso.
9Kasi ukulirirachi mwakuchemerezga ntheura?
Kasi ulije karonga mwa iwe?
Kasi movwiri wako wali kufwa,
mwakuti urwirwi wakusanga
nga ndi mwanakazi para wali pafupi kubaba?
10Imwe ŵanthu ŵa mu Ziyoni,
vivirani pasi na kutampha,
nga ndi mwanakazi para wali pafupi kubaba.
Pakuti sono mufumengemo mu msumba
na kukhara mu thengere,
ndipo mwizamkuruta ku Babuloni.
Kwenekura mwamkuthaskika,
kwenekura Fumu yamkumuwombolani
kufuma mu mawoko gha ŵarwani ŵinu.
11Sono mafuko ghanandi ghawungana
kuti ghimikane namwe.”
Iyo yikuti, “Yerusalemu wakazuzgike,
ndipo tiwone kumara kwa msumba wa Ziyoni.”
12Kweni ŵakumanya chara
maghanoghano gha Fumu.
Ŵakumanyiska chara unozgero wakhe,
kuti waŵawunganya kuŵalanga
nga ndi mikukwe pa luwugha iyo yabulika.
13Wukani na kubula,
imwe ŵa mu Ziyoni.
Ndimuzgoraninge ŵankhongono nga nkhambako
ya lusengwe lwa chisulo na vikandiro vya mkuŵa.
Ŵanthu ŵanandi muti muŵaphwanye tuchokotuchoko,
na kupereka ivyo ŵakaviskogha kwa Fumu
ndiposo chuma chawo kwa Fumu ya charu chose cha pasi.
Currently Selected:
Mika 4: Tumbuka
Highlight
Share
Copy
Want to have your highlights saved across all your devices? Sign up or sign in
Bible Society of Malawi
