Mika 3
3
Mika wakususka ŵarongozgi ŵa ŵaIsraele
1Ndipo ine nkhati,
“Pulikani, imwe mukurongozga ŵaYakhobe,
imwe mukuwusa ŵaIsraele!
Asi imwe ndimwe mukwenera kumanya
weruzgi wakunyoroka?
2Ndipouli imwe mukutinkha uweme na kutemwa uheni,
mukuyuwura chikumba cha ŵanthu ŵane,
ndipo mukucheka munofu ku viwangwa vyawo.
3Mukurya nyama ya ŵanthu ŵane,
na kufuŵa chikumba chawo.
Mukumemena viwangwa vyawo,
na kuŵachekacheka nga ndi para mukazingenge,
nga ndi nyama ya mu mphika.”
4Pamanyuma mwizamkulirira kwa Fumu,
kweni kuti yizamkumuzgorani chara.
Fumu yizamkubisa chisko chakhe kwa imwe,
chifukwa ŵachita uheni.
5Ntheura Fumu yikuti,
“Kwakuyana na imwe nchimi
mwaŵeneimwe mukupuruska ŵanthu ŵane,
imwe mukuchemerezga kuti, ‘Mutende’
apo ŵamupani chakurya,
kweni mukuwuska nkhondo
kwa uyo wakureka kumupani chakurya.
6Kwa chifukwa ichi kwizamkuŵa usiku kwa imwe
kwambula kuŵa na mboniwoni.
Kwizamkuŵa chisi kwa imwe
kwambula uroski.
Dazi lizamkunjira waka pa nchimi,
ndipo zuŵa lizamkuŵa la mdima pa iwo.
7Ŵawoni ŵakhozgekenge soni,
ndipo ŵaroski nawo ŵalengeskekenge.
Wose ŵamkuŵavye chakuyowoya,
pakuti Chiuta wakuŵazgora chara.
8Kweni ine, ndazuzgika na nkhongono,
na Mzimu wa Fumu,
ndiposo na weruzgi, na mazaza,
kuti ndimuphalire Yakhobe majuvyo ghakhe,
na Israele kwananga kwakhe.
9Pulikani ichi, imwe mukurongozga ŵaYakhobe
imwe mukuwusa ŵaIsraele,
mwaŵeneimwe mukukana unenesko
na kubendezga urunji wose,
10imwe mukuzenga Ziyoni na ndopa
ndipo Yerusalemu na ubendezi.
11Ŵarongozgi ŵakhe ŵakweruzga
para ŵapoka chimbundi.
Ŵasofi ŵakhe ŵakulipirika
pambere ŵandasambizge.
Nchimi zakhe zikulipirika ndarama
pambere zindaroske.
Ndipouli ŵakweghamira kwa Fumu na kuti,
‘Asi Fumu yili pakati pithu?
Palije kaheni ako kangatisanga ise.’
12Ntheura chifukwa cha imwe,
Msumba wa Ziyoni uti ulimike nga ndi munda,
Yerusalemu wati wazgoke kuŵa mulu wa mahami,
ndipo phiri la Nyumba ya Chiuta,
liti lizgoke kuŵa phiri la thengere.”#Yer 26.18
Currently Selected:
Mika 3: Tumbuka
Highlight
Share
Copy
Want to have your highlights saved across all your devices? Sign up or sign in
Bible Society of Malawi
