Mika 2
2
Kulangika kwa awo ŵakunyekezga ŵakavu
1“Soka ku awo ŵakunozgera ubendezi,
kunozgekera uheni pa vitara vyawo.
Para na mulenje kukuŵara,
ŵakufiska icho ŵanozgera,
pakuti chili mu mazaza ghawo.
2Para ŵakudokera minda, ŵakupoka waka.
Para ŵakudokera nyumba, ŵakuphanga waka.
Ŵakuyuzga munthu na mbumba yakhe,
muzengezgani wakhe na chiharo chakhe.”
3Pa chifukwa ichi Fumu yikuti,
“Wonani nkhunozgera suzgo kulimbana na mtundu uwu,
ilo mwamkutondeka kuwuskamo mu singo zinu.
Mwamkwenda mwakujikuzga chara
pakuti yamkuŵa nyengo yinonono.
4Pa nyengo iyo, ŵanthu ŵamkwimba sumu yakumutombozgani,
ndipo ŵamkutengera chomene.
Iwo ŵamkuti, ‘Tapankhuka nkhanira.
Charu chithu chapokeka kwa ise,
minda yithu yagaŵika kwa awo ŵatikora.’ ”
5“Ntheura para nyengo yafika,
yakuwezgera charu ku ŵanthu ŵa Fumu,
kwamkuŵavye na yumoza wa imwe
uyo wamkupoka chiharo.
6Ŵanthu ŵakundiyowoyera kuti,
‘Ungapharazganga chara.
Munthu wareke kupharanga vinthu ivi.
Ise tikhozgekenge soni chara.’
7Kasi imwe ŵa mbumba ya Yakhobe cha ntheura tiyowoyenge?
Kasi Mzimu wa Fumu ngwambula kujikora?
Kasi machitiro agha ngakhe?
Kasi mazgu ghane ngambula kuchita uweme
kwa uyo wakwenda mu urunji?”
8 Fumu yikuti,
“Kweni imwe mukuŵawukira ŵanthu ŵane nga mbarwani.
Mukuŵavura minjilira ŵanthu ŵa mutende,
awo ŵakuwera kufuma ku nkhondo
kugomezgeka kuti mbanangwa.
9Ukuviwuskamo ŵawoli ŵa ŵanthu ŵane
mu nyumba zawo zakukondweska,
ukuwuskako ku ŵana ŵawo ŵachoko
vitumbiko vyane kwa muyirayira.
10Wukani ndipo rutaninge
pakuti malo agha ngakupumulirapo chara,
chifukwa cha ukazuzi uwo mwachita,
weneuwo ukuparanya nkhanira.
11“Usange munthu wendendekenge
kupharazga vyawaka na utesi kuti,
‘Ndipharazgenge kwa imwe za vinyo na moŵa,’
ndiyo wakwenera kuŵa mupharazgi mwa ŵanthu aŵa!
12Nadi, nditi ndimuwunjikani mose, imwe ŵa Yakhobe
nditi ndiŵawunganye ŵakukharako mu ŵaIsraele.
Nditi ndiŵaŵike pamoza
nga ndi mberere na mbuzi mu chitupa,
nga ndi mskambo uwo uli mu luhari lwakhe.
Malo ghizamkupoma na ŵanthu ŵanandi chomene.
13“Uyo wakujula muryango wamkuŵadangirira,
ndipo wose ŵamkuswa chijaro cha pa chipata na kufumira penepapo.
Karonga wawo wamkuŵadangirira,
Fumu ndiyo yamkuŵa panthazi pawo.”
Currently Selected:
Mika 2: Tumbuka
Highlight
Share
Copy
Want to have your highlights saved across all your devices? Sign up or sign in
Bible Society of Malawi
