Mateyu 27

Yesu wakutorekera panthazi pa Pilato

(Mrk 15.1; Luk 23.1-2; Yoh 18.28-32)

1Na mulenje machero ghakhe, ŵasofi ŵarara wose pamoza na ŵarara ŵa ŵaYuda, ŵakawungana pamoza kuti ŵapangane umo ŵangamukomera Yesu. 2Ŵakamukaka na kuruta nayo kwa Pilato mukuru wa chigaŵa.

Nyifwa ya Yudasi

(Mil 1.18-19)

3Para Yudasi uyo wakamwendera mphiska, wakawona kuti Yesu wakapika mrandu kuti wakomeke, wakajinyumwa ndipo wakawezga ndarama 30 za siliva kwa ŵasofi ŵarara na ŵarara ŵa ŵaYuda.#Mil 1.18-19 4Wakati, “Ndananga pakumwendera mphiska munthu wambula mrandu kuti wakomeke.”

Kweni iwo ŵakati, “Kasi tili nacho na kanthu ise? Manyi wekha.”

5Yudasi wakataya pasi ndarama zira mu Nyumba ya Chiuta, wakaruta, ndipo wakaya kajikaka.

6Ŵasofi ŵarara ŵakasora ndarama zira ŵakati, “Kwakuyana na dango, ichi nchambula kulangurika kuti tiŵike ndarama izi mu thumba la ndarama za Nyumba ya Chiuta, pakuti ndi ndarama za mrandu wa ndopa.” 7Ntheura ŵakati ŵazomerezgana ŵakatora ndarama zira na kugula munda wa muwuvi wa viŵiya kuti ghaŵe malo ghakusungapo ŵalendo. 8Sono munda ura ukuchemeka, “Munda wa Ndopa” na lero wuwo.

9Penepapo mazgu gha nchimi Yeremiya ghakafiskika agho ghakuti, “Ŵakatora ndarama za siliva 30, zeneizo ŵaIsraele ŵakazomerezgana kuŵa mtengo wa munthu,#Zak 11.12-13 10ndipo ŵakagura munda wa muwuvi wa viŵiya nga ndi umo Fumu yikandilangulira.”

Pilato wakumufumba Yesu

(Mrk 15.2-5; Luk 23.3-5; Yoh 18.33-38)

11Sono Yesu wakimilira panthazi pa mukuru wa chigaŵa uyo wakamufumba kuti, “Kasi ndiwe karonga wa ŵaYuda?”

Yesu wakazgora wakati, “Ndimwe mwayowoya.” 12Kweni para ŵasofi ŵarara na ŵarara ŵa ŵaYuda ŵakamupachanga, kuti wakazgorapo kanthu chara.

13Ntheura Pilato wakati kwa Yesu, “Asi ukuvipulika ivyo ŵakukupanikizga navyo?”

14Ndipo wakazgora kanthu chara, nanga ndi lizgu limoza pa ivyo ŵakamupachanga navyo. Ntheura mukuru wa chigaŵa wakazizwa.

Pilato wakudumula kuti Yesu wakomeke

(Mrk 15.6-15; Luk 23.13-25; Yoh 18.39—19.16)

15Pa nyengo ya Chiphikiro chilichose cha Paska, kakaŵa kaluso ka mukuru wa chigaŵa kuŵasutulira mukayidi yumoza mweneuyo ŵanthu ŵakakhumba. 16Pa nyengo iyo kukaŵa mukayidi yumoza wakumanyikwa chomene zina lakhe Baraba. 17Sono para ŵanthu ŵakawungana, Pilato wakaŵafumba wakati, “Ndi njani uyo mukukhumba kuti ndimusutulirani, Baraba panji Yesu uyo wakuchemeka Mesiya?” 18Pakuti wakamanya kuti ŵakamupereka Yesu chifukwa cha bina.

19Pa dera pa ichi, apo Pilato wakakhara pa chitengo cha kweruzgira, muwoli wakhe wakamutumira mazgu ghakuti, “Ureke kuchita nayo kanthu munthu murunji uyo pakuti ndasuzgika chomene usiku uno pakulota vya iyo.”

20Kweni ŵasofi ŵarara na ŵarara ŵa ŵaYuda ŵakakhuŵirizga mzinda wa ŵanthu kuti ŵarombe Baraba, kweni ŵamukome Yesu. 21Mkuru wa chigaŵa wakati kwa iwo, “Kasi ndi njani wa ŵaŵiri aŵa uyo mukukhumba kuti ndimusutulirani?”

Ŵakazgora ŵakati, “Mutisutulire Baraba!”

22Pilato wakaŵafumba wakati, “Kasi sono ndichitechi nayo Yesu uyo wakuchemeka Mesiya?”

Wose ŵakazgora ŵakati, “Mupayikani pa mphinjika!”

23Pilato wakaŵafumba, “Chifukwa? Kasi wanangachi?”

Penepapo wose ŵakachemerezga chomene ŵakati, “Mupayikani pa mphinjika!”

24Para Pilato wakawona kuti chikumwandulirapo kanthu chara, kweni chivulupi pera ndicho chikuwuka, wakatora maji na kugeza mu mawoko panthazi pa mzinda wakati, “Ndilije mrandu pa nyifwa ya munthu uyu murunji, manyani mwekha.”#Mar 21.6-9

25Ŵanthu wose ŵakazgora ŵakati, “Mrandu wa nyifwa yakhe uŵenge pa ise na pa ŵana ŵithu.”

26Penepapo Pilato wakaŵasutulira Baraba, ndipo wakati wamuthyapula Yesu, wakamupereka kuti ŵamupayike pa mphinjika.

Ŵasilikari ŵakumugoska Yesu

(Mrk 15.16-20; Yoh 19.2-3)

27Ntheura ŵasilikari ŵa mukuru wa chigaŵa ŵakamutorera Yesu ku baraza la nyumba ya mukuru wa chigaŵa, ndipo ŵakawunganyiska ŵasilikari ŵanyawo wose na kumuzingirizga Yesu 28Ŵakamuvura malaya ghakhe na kumuvwarika laya liswesi. 29Ŵakaruka mphumphu ya minga na kumuvwarika pa mutu wakhe, ndipo ŵakamukorezga ndodo mu woko lakhe la maryero. Ntheura ŵakajikama panthazi pakhe na kumugoska ŵakati, “Muwonire Karonga wa ŵaYuda!” 30Ŵakamufunyira mata na kumupoka ndodo yira ndipo ŵakamutimba nayo pa mutu. 31Ŵakati ŵamugoska ŵakamuvura laya liswesi lira na kumuvwarika malaya ghakhe ndipo ŵakaruta nayo kuya kamupayika pa mphinjika.

Yesu wakupayikika pa mphinjika

(Mrk 15.21-32; Luk 23.26-43; Yoh 19.17-27)

32Apo ŵakarutanga, ŵakakumana na munthu wa ku Kurene zina lakhe Simoni. Ndipo ŵasilikari ŵakamuchichizga kuyegha mphinjika ya Yesu. 33Ŵakati ŵafika pa malo agho ghakuchemeka kuti Gologota gheneagho ghakung'anamula kuti, “Malo gha Bwaza,” 34ŵakamupa vinyo kuti wamwe ilo ŵakasazgako nduru. Kweni wakati walicheta, wakakana kumwa.#Mas 69.21

35Ŵakati ŵamupayika Yesu pa mphinjika, ŵakagaŵana vyakuvwara vyakhe pakuchita mphenduzgo.#Mas 22.18 36Ndipo ŵakakhara pasi na kumulindirira penepara. 37Pachanya pa mutu wakhe, ŵakaŵikapo malembo gha mrandu wakhe ghakuti, “Uyu ndi Yesu Karonga wa ŵaYuda.” 38Ndipo ŵankhungu ŵaŵiri ŵakapayikika nayo pamoza, yumoza ku maryero, munyakhe ku la mazere.

39Ndipo awo ŵakajumphangapo ŵakamutukanga na kupukunya mitu yawo,#Mas 22.7, 109.25 40ŵakati, “Iwe ukatenge ukumanya kubwangandula Nyumba ya Chiuta na kuyizenga mu mazuŵa ghatatu, usange ndiwe nadi Mwana wa Chiuta, jiponoska na kukhira pa mphinjika.”#Mat 26.61; Yoh 2.19

41Ntheura pera ŵasofi ŵarara na ŵamanyi-marango na ŵarara ŵa ŵaYuda ŵakamugoskanga ŵakati, 42“Wakaponoska ŵanthu ŵanyakhe, kweni kuti wakumanya kujiponoska yekha chara. Usange ndi karonga wa Israele, wakhire sono pa mphinjika ndipo titi tipulikane nayo. 43Wakugomezga mwa Chiuta, sono Chiuta wamuthaske, usange wakumukhumba. Pakuti iyo wakatenge, ‘Ndine Mwana wa Chiuta.’ ”#Mas 22.8

44Ŵankhungu nawo, awo ŵakapayikika pamoza na Yesu, ŵakamutombozganga ntheura pera.

Nyifwa ya Yesu

(Mrk 15.33-41; Luk 23.44-49; Yoh 19.28-30)

45Kufuma pa 12 koloko kufika pa 3 koloko kukaŵa chisi pa charu chose. 46Pafupi na nyengo ya 3 koloko, Yesu wakachemerezga na mazgu ghakuru wakati, “Eli, Eli, Lamasabakatani!” Ndiko kuti, “Chiuta wane, Chiuta wane, kasi mwandisidirachi?”#Mas 22.1

47Awo ŵakimilira penepara ŵakapulika ndipo ŵakati, “Munthu uyu wakuchema nchimi Eliya.” 48Penepapo yumoza wa iwo wakachimbira wakaya katora sipanje na kuyibizga mu vinyo lakusasa, wakayiweska ku thete ndipo wakapereka kwa Yesu kuti wamwe.#Mas 69.21

49Ŵanji ŵakayowoya ŵakati, “Reka danga, tiwone usange Eliya wati wize kwiza kamuponoska.”

50Yesu wakati wachemerezgaso na mazgu ghakuru, wakapereka mzimu wakhe.

51Penepapo chisalu chakuchinga cha mu Nyumba ya Chiuta chikaparuka pakati, kufuma kuchanya kufikira pasi. Charu chikandindima, ndipo majarawe ghakasweka.#Kuf 26.31-33 52Madindi ghakajurika ndipo ŵanthu ŵarunji awo ŵakafwa kale, ŵakawuka. 53Ŵakafuma mu madindi ndipo Yesu wakati wawuka ku ŵakufwa, ŵakaya kanjira mu msumba wakupatulika mwenemumo ŵanthu ŵanandi ŵakaŵawona.

54Kweni murara wa ŵankhondo pamoza na awo ŵakalondanga Yesu, ŵakati ŵawona chindindindi na ivyo vikachitika, ŵakopa chomene. Ndipo ŵakati, “Nadidi, Munthu uyu wakaŵa Mwana wa Chiuta!”

55Ndipo ŵakaŵapo ŵanakazi ŵanandi awo ŵakalaŵiriranga patali, ŵeneawo ŵakamurondezganga na kumuteŵetera Yesu kufuma ku Galileya.#Luk 8.2-3 56Mu ŵanakazi aŵa mukaŵa Mariya wa ku Magadala, Mariya nyina wa Yakhobe na Yosefe, ndiposo na nyina wa ŵana ŵa Zebediya.

Kusungika kwa Yesu

(Mrk 15.42-47; Luk 23.50-56; Yoh 19.38-42)

57Apo kukafipanga waka, kukiza munthu musambazi wakafumira ku Arimatiya, zina lakhe Yosefe. Iyo nayo wakaŵa musambiri wa Yesu. 58Munthu uyu wakaruta kwa Pilato kuya karomba thupi la Yesu. Ndipo Pilato wakalangula kuti ŵamupe. 59Yosefe wakatora thupi la Yesu na kulivungirizga mu sanda yituŵa ya kutowa. 60Wakaŵika thupi mu dindi lakhe liphya ilo wakazonga mu jarawe. Wakakunkhuzgirapo libwe likuru pa muryango wa dindi lira na kuruta. 61Mariya wa ku Magadala pamoza na Mariya munyakhe ŵakaŵapo, ŵakakhara pasi kuthyana waka na dindi.

Ŵalinda pa dindi

62Kweni na machero ghakhe pa zuŵa la Sabata ŵasofi ŵarara na ŵaFarisi, ŵakiza panthazi pa Pilato. 63Ŵakati, “Fumu, tikukumbuka kuti mupusikizgi yura apo wakaŵa wachali wamoyo wakayowoya kuti, ‘Pa mazuŵa ghatatu ndamkuwuka ku ŵakufwa.’#Mat 16.21, 17.23, 20.19; Mrk 8.31, 9.31, 10.33-34; Luk 9.22, 18.31-33 64Ntheura mulangure kuti ŵalinda ŵaronde dindi kufikira zuŵa la chitatu, mwakuti ŵasambiri ŵakhe ŵareke kuya kamwiba na kuphalira ŵanthu kuti wali kuwuka ku ŵakufwa. Ntheura utesi wa pamanyuma wamkuŵa uheni kuruska wa pakudanga.”

65Pilato wakaŵaphalira wakati, “Asi ŵalinda muli nawo, rutaninge mukalilinde dindi nga umo mukumanyira.”

66Ntheura ŵakaruta ŵakaya kalikhozga dindi na kuzighilira libwe la pa muryango wa dindi na kuŵikapo ŵalinda.

Currently Selected:

Mateyu 27: Tumbuka

Highlight

Copy