Mateyu 14

Nyifwa ya Yohane Mubapatizi

(Mrk 6.14-29; Luk 9.7-9)

1Pa nyengo yira, Herode, uyo wakawusanga mu Galileya, wakapulika na za lumbiri lwa Yesu. 2Ndipo wakati ku ŵateŵeti ŵakhe, “Uyu ndi Yohane Mubapatizi yura! Wali kuwuskika ku ŵakufwa. Ndicho chifukwa nkhongono izi zikuchita nchito mwa iyo.”

3Pakuti Herode wakalangula kale kuti Yohane wakoreke, wakakike na kuŵikika mu gadi. Wakachita ichi chifukwa cha Herodiya muwoli wa Filipu munung'una wakhe.#Luk 3.19-20 4Pakuti Yohane wakamuphalira Herode kuti, “Nchambula kulangurika kuti umutore Herodiya muwoli wa munung'una wako kuti waŵe muwoli wako.”#Lev 18.16, 20.21 5Herode wakakhumbanga kumukoma Yohane, kweni wakopanga ŵanthu, pakuti ŵakamupima kuti ndi nchimi.

6Pa zuŵa lakukumbukira kubabika kwa Herode, mwana msungwana wa Herodiya wakavina panthazi pa awo ŵakachemeka ku chiphikiro ndipo wakamukondweska chomene Herode. 7Penepapo Herode wakapangana wakati, “Nkhurapa, nditi ndikupe chilichose icho ungaromba.”

8Kweni msungwana yura, pakukhuŵirizgika na ŵanyina, wakaromba wakati, “Mundipe pa ngwembe sono apa, mutu wa Yohane Mubapatizi.”

9Karonga wakaŵa na chitima. Kweni chifukwa cha virapo vyakhe na chifukwa cha awo ŵakachemeka pa chiphikiro, wakalangula kuti ŵamupe mutu wa Yohane. 10Wakatuma ŵanthu kuya kadumula mutu wa Yohane mu gadi. 11Mutu wakhe ŵakawutorera pa ngwembe na kumupa msungwana yura, ndipo iyo wakaruta nawo ku ŵanyina. 12Ŵasambiri ŵa Yohane ŵakiza, ŵakatora thupi lakhe ndipo ŵakaya kasunga. Ntheura ŵakaruta kuya kamuphalira Yesu.

Yesu wakuryeska ŵanthu vikwi vinkhonde

(Mrk 6.30-44; Luk 9.10-17; Yoh 6.1-14)

13Para Yesu wakapulika icho chikachitika, wakafumako kura, wakanjira mu ngaraŵa na kuruta ku malo ghambula ŵanthu pa yekha. Para ŵanthu ŵakapulika, ŵakenda pasi kufuma ku mizi yawo na kumurondezga. 14Yesu wakati wafuma mu ngaraŵa na kuwona mzinda ukuru wa ŵanthu, wakaŵa na chiwuravi na iwo ndipo wakachizga ŵarwari ŵawo.

15Apo kukafipanga waka, ŵasambiri ŵakhe ŵakiza kwa iyo, ŵakamuphalira ŵakati, “Kuno ndi malo ghambula ŵanthu, zuŵa nalo laruta. Muŵawezge ŵanthu mwakuti ŵarute ku vikaya kuya kajigulira vyakurya.”

16Yesu wakaŵazgora wakati, “Nchakwenerera chara kuti ŵarute, ŵapani ndimwe chakurya.”

17Ŵasambiri ŵakhe ŵakati, “Pano tili na vingwa vinkhonde na somba ziŵiri pera.”

18Yesu wakati, “Zani navyo kwa ine.” 19Ntheura wakaŵalangula ŵanthu kuti ŵakhare pasi pa utheka. Ndipo wakati watora vingwa vinkhonde vira na somba ziŵiri zira, wakalaŵiska kuchanya, wakawonga Chiuta, ndipo wakati wamenya wakapereka vingwa ku ŵasambiri awo ŵakagaŵira ŵanthu. 20Ŵanthu wose ŵakarya na kukhuta. Ndipo ŵasambiri ŵakasora vimenyu ivyo vikakharapo, ndipo vikazura vidunga 12. 21Awo ŵakarya ŵakaŵa ŵanarume vikwi vinkhonde kwambula kusazgako ŵanakazi na ŵana.

Yesu wakwenda pa maji

(Mrk 6.45-52; Yoh 6.15-21)

22Mise yeneyira Yesu wakaŵaphalira ŵasambiri ŵakhe kuti ŵanjire mu ngaraŵa na kudangirako ku sirya linyakhe la nyanja, apo iyo wakawezganga mizinda ya ŵanthu. 23Wakati wawezga mizinda yira, wakakwerera mu phiri kuya karomba pa yekha. Kweni apo kukafipanga waka, wakakhara yekha ku phiri. 24Ndipo pa nyengo iyi ngaraŵa yikaŵa pa nyanja pakati, yikalimbananga na majigha chifukwa mphepo yikaŵajandizganga.

25Ndipo ku matandakucha na nyengo ya 4 koloko, Yesu wakafika pa iwo wakwenda pa nyanja. 26Ŵasambiri ŵakati ŵamuwona Yesu wakwenda pa nyanja, ŵakofiwa ŵakati, “Ndi muzguka!” Ndipo ŵakachemerezga chifukwa cha wofi.

27Kweni maluŵiro Yesu wakayowoya nawo wakati, “Khwimani mtima, ndine, mungopanga.”

28 Petrosi wakazgora wakati, “Fumu, usange ndimwe, mundilangure nane ndiyende pa maji kwiza kwa imwe.”

29Yesu wakati, “Zanga!” Petrosi wakafuma mu ngaraŵa na kwenda pa maji kuya kwa Yesu. 30Kweni wakati wawona mphepo wakopa, ndipo apo wakambanga waka kubira, wakachemerezga wakati, “Fumu, ndiponoskani!”

31Luŵiro Yesu wakanyoroska woko lakhe na kumukora, ndipo wakayowoya nayo wakati, “Okwe, wa munthu wa chipulikano chichoko! Chifukwa uli wakayikanga?”

32Para ŵakanjira mu ngaraŵa, mphepo yikareka. 33Awo ŵakaŵa mu ngaraŵa ŵakamulambira Yesu, ŵakati, “Nadi, ndimwe Mwana wa Chiuta!”

Yesu wakuchizga ŵarwari ku Mutezarete

(Mrk 6.53-56)

34Ndipo para Yesu na ŵasambiri ŵakhe ŵakati ŵambuka nyanja ŵakafika ku Mutezarete. 35Ŵanthu ŵa mu malo ghara ŵakati ŵamupanikizga Yesu, ŵakatuma mazgu kosekose mu charu chira ndipo ŵanthu ŵakiza kwa iyo na wose awo ŵakaŵa ŵarwari. 36Ndipo ŵakamuŵeya Yesu kuti ŵarwari ŵakhwaske ku mphonje pera za laya lakhe. Ntheura wose awo ŵakakhwaska laya lakhe ŵakachira.

Currently Selected:

Mateyu 14: Tumbuka

Highlight

Copy