Mateyu 13

Ntharika ya mumiji

(Mrk 4.1-9; Luk 8.4-8)

1Pa zuŵa lenelira Yesu wakafuma mu nyumba, ndipo wakaya kakhara mu mphepete mwa nyanja. 2Mizinda yikuru ya ŵanthu yikawungana na kumuzingirizga. Ntheura wakanjira mu ngaraŵa na kukhara pasi, ndipo ŵanthu wose ŵakimilira pa mtunda.#Luk 5.1-3 3Yesu wakaŵayowoyera ŵanthu vinthu vinandi mu ntharika.

Wakati, “Mumiji wakaruta kuya kaseŵa mbuto. 4Ndipo apo wakaseŵanga, mbuto yinyakhe yikawa mu mphepete mwa nthowa, ndipo tuyuni tukiza tukayisora. 5Mbuto yinyakhe yikawa pa lusokorowe, penepapo pakaŵavye dongo linandi. Ndipo yikamera luŵiro chifukwa pakaŵavye dongo linandi. 6Kweni dazi likati lakwera, yikaŵawuka na komira pakuti yikaŵavye nkhorozi. 7Mbuto yinyakhe yikawa mukati mu minga, ndipo minga yikakura na kuyifyoronganiska. 8Mbuto yinyakhe yikawa mu dongo liweme, yikapambika vipambi, yinyakhe 100 yinyakhe 60, yinyakhe 30. 9Uyo wali na makutu ghakupulikira, wapulike.”

Urato wa zintharika

(Mrk 4.10-12; Luk 8.9-10)

10Ŵasambiri ŵakiza kwa Yesu, ŵakamufumba ŵakati, “Chifukwa uli mukuŵayowoyera ŵanthu mu zintharika?”

11Iyo wakaŵazgora wakati, “Imwe muli kupika mwaŵi wakumanyira vya muchindindi vya Ufumu wa kuchanya, kweni ŵanji ŵalije kupika mwaŵi wa kamanyiro ka ntheura. 12Pakuti yose uyo wali na kanthu ŵati ŵamupenge vinandi, ndipo wati waŵenge na vyakuzara. Kweni yose uyo walije kanthu, nanga ndi ako wali nako ŵamupokenge.#Mat 25.29; Mrk 4.25; Luk 8.18, 19.26 13Ndicho chifukwa nkhuŵayowoyera mu zintharika. Pakuti nanga ŵakuwona, kuti ŵakuwoneska chara, nanga ŵakupulika kuti ŵakupulikiska chara nesi kumanyiska. 14Na iwo uchimi wa Yesaya ukufiskika uwo ukuti,

‘Kupulika muti mupulikenge nadi,

kweni kuti mupulikiskenge chara.

Kulaŵiska muti mulaŵiskenge nadi,

kweni kuti muwonenge kanthu chara.#Yes 6.9-10 (LXX)

15Pakuti mtima wa ŵanthu aŵa uli kukurungara,

ndipo makutu ghawo ngazitu kupulika,

ndiposo ŵali kujara maso ghawo,

mzire ŵawone na maso ghawo,

na kupulika na makutu ghawo,

ndipo ŵamanyiske na mahara ghawo,

ndipo ŵawerere kwa ine

kuti ine ndiŵachizge.’

16“Kweni imwe ndimwe ŵakutumbikika chifukwa maso ghinu ghakuwona, ndipo makutu ghinu nagho ghakupulika.#Luk 10.23-24 17Nadi nkhumuphalirani kuti, nchimi zinandi na ŵanthu ŵarunji ŵakadokanga kuwona ivyo imwe mukuviwona, ndipo kuti ŵakaviwona chara. Ŵakadokanga kupulika vyeneivyo imwe mukupulika, kweni kuti ŵakavipulika chara.”

Yesu wakurongosora ntharika ya mumiji

(Mrk 4.13-20; Luk 8.11-15)

18“Tegherezgani sono ku ntharika ya mumiji. 19Para munthu waliyose wakupulika mazgu gha Ufumu wa kuchanya, ndipo wakureka kughapulikiska, Muheni Yura wakwiza na kukwapura icho chaseŵeka mu mtima wakhe. Iyi ndi mbuto iyo yikaseŵeka mu mphepete mwa nthowa. 20Mbuto iyo yikaseŵeka pa lusokorowe, yikulingana na munthu uyo wakupulika mazgu gha Chiuta, maluŵiro wakughapokera na chimwemwe. 21Kweni mazgu kuti ghakujintha nkhorozi chara. Nga kanyengo kachoko waka, ndipo para visuzgo vikwiza panji kuzikizgika chifukwa cha mazgu, wakuwa luŵiro. 22Mbuto iyo yikaseŵeka mu minga, yikulingana na munthu mweneuyo wakupulika mazgu gha Chiuta. Kweni vyakwenjezga vya umoyo na upusikizgi wa usambazi wa mu charu, vikughafyoronganiska mazgu ndipo munthu yura wakuŵa wambula vipambi. 23Ndipo iyo yikaseŵeka pa dongo liweme yikulingana na munthu uyo wakupulika mazgu gha Chiuta na kughapulikiska ndipo nadi wakupambika vipambi, munyakhe 100 na munyakhe 60, ndiposo munyakhe 30.”

Ntharika ya duru

24 Yesu wakaŵatayira ntharika yinyakhe wakati, “Ufumu wa kuchanya uli nga ndi munthu uyo wakaseŵa mbuto yiweme mu munda wakhe. 25Kweni apo ŵanthu ŵakaŵa mu tulo, murwani wakhe wakiza na kuseŵamo duru mukati mu tirigu, ndipo wakaruta. 26Para mbuto yikamera na kupambika vipambi, ndipera duru nayo wakawoneka. 27Ŵateŵeti ŵa mwene-munda yura ŵakiza kwa iyo na kumufumba kuti, ‘Sekuru, asi mukaseŵa mbuto yiweme pera mu munda winu? Kasi duru wafumankhu?’ 28Iyo wakati kwa iwo, ‘Ndi murwani uyo wachita ichi.’ Ndipo ŵateŵeti ŵakhe ŵakamufumba ŵakati, ‘Kasi mukukhumba kuti timuchese duru?’ 29Iyo wakazgora wakati, ‘Chara, mzire pakuchesa muzgulire kumoza na tirigu. 30Rekani vikulenge pamoza kufikira pa nyengo ya vuna. Pa nyengo ya vuna ndamkuŵaphalira ŵakuvuna kuti ŵachese danga duru na kumukaka mu zimphundwe ndipo ŵamoche, kweni tirigu ndiyo ŵamuronge mu nthamba yane.’ ”

Ntharika ya njere la matubeni

(Mrk 4.30-32; Luk 13.18-19)

31 Yesu wakaŵatayira ntharika yinyakhe wakati, “Ufumu wa kuchanya uli nga ndi njere la matubeni ulo munthu wakatora na kupanda mu munda wakhe. 32Mbuto iyi njichoko chomene kuruska zose. Kweni para yamera yikukura na kuŵa yikuru kuruska vivwati vyose, ndipo yikuzgoka kuŵa khuni. Ntheura viyuni vya mudera vikwiza na kuzenga vivimbo mu minthavi yakhe.”

Ntharika ya chirungo

(Luk 13.20-21)

33 Yesu wakaŵatayira ntharika yinyakhe wakati, “Ufumu wa kuchanya ukulingana na chirungo icho mwanakazi wakatora na kusazga na ufu wa vidunga vitatu mpaka ufu wose ukarungika.”

Umo Yesu wakachitiranga na zintharika

(Mrk 4.33-34)

34 Yesu wakayowoya vyose ivi ku mzinda wa ŵanthu mu zintharika. Kuti wakayowoyapo kanthu chara kwambula kuti wayowoyere mu zintharika. 35Wakachita ntheura mwakuti ghafiskike mazgu gha nchimi agho ghakuti,

“Nditi ndiyowoye nawo mu zintharika.

Nditi ndiyowoye ivyo vili kubisika

kufuma ku mutendeko wa charu.”#Mas 78.2

Yesu wakurongosora ntharika ya duru

36Yesu wakati wawezga mizinda ya ŵanthu wakanjira mu nyumba. Ndipo ŵasambiri ŵakhe ŵakiza kwa iyo ŵakati, “Mutirongosorere ntharika ya duru wa mu munda.”

37Wakazgora wakati, “Uyo wakuseŵa mbuto yiweme ndi Mwana wa Munthu. 38Munda ndi charu, ndipo mbuto yiweme ndi ŵana ŵa Ufumu. Duru ndi ŵana ŵa Muheni Yura. 39Murwani uyo wakuseŵa duru ndi Satana. Vuna ndi umaliro wa charu.#13.39 umaliro wa charu: Ŵanji ŵakuti “umaliro wa mgonezi”. Ndipo ŵakuvuna ndi ŵangelo. 40Nga ndi umo ŵakuchesera duru na kocha mu moto, ntheura ndimo kwamkuŵira pa umaliro wa charu ichi. 41Mwana wa Munthu wamkutuma ŵangelo ŵakhe ndipo ŵamkufumyamo mu Ufumu wakhe wose awo ŵakukhuŵazga ŵanyawo na awo ŵakuchita uheni. 42Ŵamkuŵaponya ŵanthu aŵa mu ng'anjo ya moto, mwenemumo ŵamkulira na kuska mino. 43Penepapo ŵarunji ŵamkuŵala nga ndi dazi mu Ufumu wa Ŵawiskewo. Uyo wali na makutu ghakupulikira, wapulike.”

Ntharika ya chuma chakubisika

44“Ufumu wa kuchanya uli nga ndi chuma chakubisika mu munda. Para munthu wachisanga, wakuchibisaso. Ndipo na chimwemwe wakuruta na kuguliska vinthu vyose ivyo wali navyo na kuya kagula munda wenewura.”

Ntharika ya ngale ya mtengo wa patali

45“Ndiposo Ufumu wa kuchanya uli nga ndi munthu wa malonda, uyo wakapenjanga ngale zakuzirwa. 46Para wakati wasanga yimoza ya mtengo wa patali, wakaruta kuya kaguliska vinthu vyose ivyo wakaŵa navyo, ndipo wakayigula ngale yira.”

Ntharika ya mukwawu

47“Ndiposo Ufumu wa kuchanya ukulingana na mukwawu, uwo ukuponyeka mu nyanja na kukora somba za mitundu yose. 48Para wazura, ŵanthu ŵakuwuguzira pa mlima. Ndipo ŵakukhara pasi ndipo ŵakusolera somba ziweme mu vidunga, kweni ziheni ŵakutaya. 49Ndimo kwamkuŵira pa umaliro wa charu. Ŵangelo ŵamkwiza na kupatula ŵaheni ku ŵarunji, 50na kuŵaponya mu ng'anjo ya moto, mwenemumo ŵamkulira na kuska mino.”

Usambazi uphya na wakale

51Yesu wakaŵafumba wakati, “Kasi mwapulikiska vyose vyeneivi?”

Iwo ŵakazgora ŵakati, “Inya.”

52Ndipo wakati kwa iwo, “Mumanyi-marango yose uyo wali kusambizgika vya Ufumu wa kuchanya, wali nga ndi mwene-nyumba uyo wakufumiskamo vinthu ivyo nviphya na vinthu ivyo nvidala mu usambazi wakhe.”

Yesu wakuyuyurika ku Nazarete

(Mrk 6.1-6; Luk 4.16-30)

53 Yesu wakati wamara ntharika izi, wakawukako kura. 54Ndipo wakati wafika mu msumba wa kwawo, wakamba kuŵasambizga ŵanthu mu nyumba ya kusoperamo. Ndipo ŵanthu ŵakazizwa, ŵakafumba ŵakati, “Kasi munthu uyu wali kusanga nkhu mahara agha na milimo iyi ya nkhongono? 55Asi uyu ndiyo mwana wa muŵaji wa mathabwa? Asi nyina ndi Mariya? Ndipo asi ŵanung'una ŵakhe ndi Yakhobe, Yosefe, Simoni, na Yudasi? 56Ndipo asi ŵadumbu ŵakhe wose ŵali na ise? Kasi sono munthu uyu wali kuvitora nkhu vyose ivi?” 57Ntheura ŵakakhuŵazgika mwa iyo.

Kweni Yesu wakati kwa iwo, “Nchimi njakuchindikika kosekose, kweni mu charu cha ku kwakhe na mu nyumba yakhe ndimo yikuchindikika chara.”#Yoh 4.44 58Ntheura Yesu kuti wakachitako milimo ya nkhongono chara, chifukwa chakuwura kupulikana kwawo.

Currently Selected:

Mateyu 13: Tumbuka

Highlight

Copy