Malaki 1
1
1Agha ndi mazgu gha Fumu ghakuchima ku ŵaIsraele kwizira mwa nchimi Malaki.
Kutemwa kwa Fumu pa Israele
2 Fumu yikuti, “Ine ndamutemwani imwe.”
Kweni imwe mukuti, “Kasi mwatitemwa uli?”
Fumu yikuti “Asi Esau ndi mukuru wa Yakhobe? Ndipouli ine ndamutemwa Yakhobe.#Rom 9.13#Yes 34.5-17, 63.1-6; Yer 49.7-22; Eze 25.12-14, 35.1-15; Amo 1.11-12; Oba 1-14 3Kweni Esau ndamutinkha. Charu chakhe cha mapiri ndachizgora kuŵa chiparamba ndipo chiharo chakhe ndachireka kuŵa malo ghakukharamo ŵakambwe ŵa mu mapopa.” 4Usange ŵaEdomu awo mba fuko la Esau ŵangayowoya kuti, “Nangauli ise taparanyika, kweni titi tizenge mahami agha.”
Kweni Fumu Mwenenkhongono zose yikuti, “Nangauli ŵangazenga, kweni ndibwangandulenge ndipera, ŵasuke ŵanthu ŵaŵacheme kuti, ‘Ichi ndi charu cha ubendezi, ŵanthu awo Fumu yili kuŵakwiyira kwa muyirayira.’ ” 5Maso ghinu ghamkuchiwona ichi, ndipo mwizamkuyowoya kuti, “Fumu njikuru, yikujumpha na mphaka za charu cha Israele!”
Fumu yikuchenya ŵasofi
6 Fumu Mwenenkhongono zose yikuti kwa imwe, “Mwana wakuchindika ŵawiske, ndipo muteŵeti wakuchindika sekuru wakhe. Ntheura usange ine ndine wiskemwe, kasi nchindi zane zili nkhu? Ndipo usange ndili sekuru, kasi wofi kwa ine uli nkhu? Imwe ŵasofi, mukupepura zina lane. Kweni imwe mukuti, ‘Kasi tikupepura uli zina linu?’
7“Imwe mukupereka chakurya chakwanangika pa jochero. Kweni imwe mukufumba kuti, ‘Kasi tikunanga uli?’ Imwe mukughanaghana kuti jochero la Fumu lingayuyurika. 8Usange imwe mukupereka vyakuŵeta vya chiburumutira kuŵa sembe kwa ine, kasi uku nkhwananga chara? Usange mukupereka vyakuŵeta vyakupendera panji vya kurwara, kasi uku nkhwananga chara? Usange mungayezga kupereka kwa ŵarongozgi ŵinu ŵa mu charu, kasi ŵangakondwa namwe, panji kumuchitirani vya lusungu?”
Ntheura ndimo yikuyowoyera Fumu Mwenenkhongono zose.#Mar 15.21
9“Kweni sono ŵeyererani kwa Chiuta, kuti watichitire lusungu. Chifukwa na chawanangwa cha ntheura mu mawoko ghinu, kasi wangachitira lusungu nanga njumoza wa imwe?” Ntheura ndimo yikuyowoyera Fumu Mwenenkhongono zose. 10“Mwe, mphanyi wanguŵapo munthu yumoza mukati mwinu uyo wakujara ku miryango ya nyumba yane, mwakuti mureke kupemba moto pa jochero lane kwambula kwenerera! Ine kuti nkhukondwa namwe chara. Sembe zinu izo mukupereka kwa ine kuti ndipokerenge kufuma kwa imwe chara.” Ntheura ndimo yikuyowoyera Fumu Mwenenkhongono zose. 11“Pakuti kufuma ku mafumiro gha dazi kuya kafika ku manjiliro ghakhe, zina lane ndikuru mukati mu ŵamitundu. Ndipo mu malo ghose, vyakununkhira na vyawanangwa vyakufikapo, vikuperekeka kwa ine. Ichi chamkuŵa ntheura chifukwa zina lane ndikuru mukati mu ŵamitundu.”
Ntheura ndimo yikuyowoyera Fumu Mwenenkhongono zose.
12 Fumu yikuti, “Kweni mukuyuyura zina lane para mukuti, ‘Jochero la Fumu ndakukazuzgika’. Ntheura mungapereka chakurya pa jochero icho nchakukazuzgika. 13Ndipo imwe mukuti, ‘Mlimo uwu ngwa kuvuska chomene, ndipo mukwamba kundinyoza. Imwe mukwiza na icho mwiba, panji chakupunduka, panji chakurwara, ndipo ichi ndicho mukwiza nacho kuŵa chakupereka! Kasi cha ntheura ndicho ndipokerenge kufuma mu mawoko ghinu?’ ”
Ntheura ndimo yikuyowoyera Fumu Mwenenkhongono zose.
14“Watembeke munthu uyo wakupusika, mweneuyo wali na chakuŵeta chanarume mu mskambo wakhe, icho wakupangana kuchipereka, ndipouli wakupereka kwa Fumu icho nchiheni. Pakuti ine ndine Karonga mukuru, ndipo zina lane likopeka mukati mu ŵamitundu.”
Ntheura ndimo yikuyowoyera Fumu Mwenenkhongono zose.
Currently Selected:
Malaki 1: Tumbuka
Highlight
Share
Copy
Want to have your highlights saved across all your devices? Sign up or sign in
Bible Society of Malawi
