Yohane 16
16
1“Ndamuyowoyerani vyose ivi, kuti mureke kukhuŵaliskika. 2Ŵanthu ŵamkumusezgani mu nyumba zakusoperamo. Inya nadi, ora likwiza apo yose uyo wati wamukomaninge wamkughanaghana kuti wakuteŵetera Chiuta. 3Ŵamkumuchitirani vyeneivi chifukwa ŵalije kuŵamanya Ŵadada panji ine. 4Kweni ndamuphalirani vyeneivi mwakuti para ora likwiza, mwiza kakumbuke kuti ine nkhamuphalirani za ivi.
Mlimo wa Mzimu Mutuŵa
“Pakudanga kuti nkhamuphalirani vyeneivi chara, chifukwa nkhaŵa namwe pamoza. 5Kweni sono nkhuruta kwa uyo wakandituma. Palije na yumoza wa imwe uyo wakundifumba kuti, ‘Kasi mukuyankhu?’ 6Sono pakuti ndamuphalirani vyeneivi, mitima yinu yazura na chitima. 7Kweni nkhumuphalirani unenesko kuti chikumwandulirani imwe kuti ine ndirute. Usange ndareka kuruta, Msanguruski wati wizenge kwa imwe chara. Kweni para ndaruta ndamkumutuma kwa imwe. 8Para iyo wiza wati wapanikizgire ŵanthu ŵa mu charu kuti mbakupuvya pa za kwananga, pa za urunji, ndiposo na pa za weruzgi. 9Mbakupuvya pa za kwananga chifukwa chakuwura kupulikana mwa ine. 10Mbakupuvya pa za urunji, chifukwa nkhuruta ku Ŵadada ndipo kuti mwamkundiwonaso chara. 11Mbakupuvya pa za weruzgi, chifukwa uyo wakuwusa charu ichi weruzgika kale.
12“Ndipouli ndili na vinthu vinandi vyakumuphalirani, kweni sono kuti mungavipulikiska chara. 13Kweni para wiza iyo Mzimu wa unenesko, ndiyo wizamkumurongozgani mu unenesko wose. Chifukwa kuti wati wayowoye pa iyo yekha chara, kweni wati wayowoye vyose ivyo wakupulika. Ndipo wizamkumuphalirani vinthu ivyo vikwenera kwiza. 14Iyo wizamkundichindika pakuti wizamkutora ivyo nvyane na kumuphalirani imwe. 15Vyose ivyo Ŵadada ŵali navyo nvyane. Ndicho chifukwa ndanguyowoya kuti Mzimu wamkutora ivyo nvyane na kumuphalirani imwe.
Chitima chamkuzgoka chimwemwe
16“Pa kanyengo kachoko waka kuti mwamkundiwonaso chara. Ndiposo pa kanyengo kachoko waka, mwamkundiwona chifukwa nkhuruta ku Ŵadada.”
17Ŵanji mukati mwa ŵasambiri ŵakhe ŵakafumbana ŵakati, “Kasi nchivichi icho wakutiyowoyera kuti, ‘Pa kanyengo kachoko waka, kuti mwamkundiwonaso chara, ndiposo pa kanyengo kachoko waka, mwamkundiwona?’ Ndipo wakayowoya kuti, ‘Chifukwa nkhuruta ku Ŵadada.’ ” 18Ŵakafumbana ŵakati, “Pakuyowoya kuti, ‘Pa kanyengo kachoko waka’ kasi wakung'anamulachi? Tikuchimanya chara icho wakuyowoya.”
19Yesu wakamanya kuti ŵakukhumba kumufumba, sono wakati kwa iwo, “Kasi ichi ndicho mukufumbana pa icho nang'anamulanga pakuyowoya kuti, ‘Pa kanyengo kachoko waka, kuti mwamkundiwonaso chara, ndipo para kajumphapo kanyengo kachokoso waka mwamkundiwonaso?’ 20Inya, inya nadi nkhumunenerani kuti, imwe mwamkulira na kutengera, kweni ŵanthu ŵa mu charu ŵamkusekerera. Imwe mwamkuŵa na chitima, kweni chitima chinu chamkuzgoka chimwemwe. 21Para mwanakazi wali mu vyakuŵaŵa pakubaba mwana, wakuŵa na chitima chifukwa ora lakhe lafika. Kweni para mwana wababika, kuti wakukumbukaso urwirwi ura chara, chifukwa wali na chimwemwe pakuwona kuti munthu wababika mu charu. 22Ndimo kuliri na imwe wuwo. Sono muli na chitima, kweni ndamkumuwonaniso. Ndipo mitima yinu yamkuŵa na chimwemwe icho na yumoza wamkumupokani chara.
23“Pa zuŵa lira, kuti mwamkundifumbaso kanthu chara. Inya, inya nadi nkhumunenerani kuti, chose icho mukuromba Ŵadada mu zina lane ŵamkumupani. 24Mpaka sono mundarombepo kanthu mu zina lane. Rombani ndipo muti mupokerenge mwakuti chimwemwe chinu chiŵe chakufikapo.
Yesu wavivya charu
25“Ndamuyowoyerani vinthu ivi mu zintharika. Nyengo yikwiza apo kuti ndamkuyowoyeraso mu zintharika chara. Kweni ndamkumuvumbulirani pakweru nkhanira vya Ŵadada. 26Pa zuŵa lira, mwamkuromba mu zina lane. Ndipo nkhuyowoya kuti ndamkumuromberani ku Ŵadada chara. 27Pakuti Ŵadada iwoŵene ŵakumutemwani, chifukwa imwe mukunditemwa ine ndipo mwapulikana kuti ndili kufuma ku Ŵadada. 28Ine nkhafuma ku Ŵadada, ndipo ndiza mu charu. Sono nkhufumamo mu charu ndipo nkhuruta ku Ŵadada.”
29Ŵasambiri ŵakhe ŵakati kwa iyo, “Sono ndipo mukuyowoya pakweru nkhanira, kuti mukuyowoyeraso mu ntharika chara. 30Sono ndipo tikumanya kuti mukumanya vyose kuti kukukhumbikwa chara kuti munthu wamufumbani kanthu. Pa chifukwa ichi tikupulikana kuti muli kufuma kwa Chiuta.”
31 Yesu wakaŵazgora wakati, “Kasi mukupulikana sono? 32Nyengo yikwiza ndipo nadi yafika kale, apo imwe mose mwamkuparanyikana waliyose wa imwe wati wawerere ku ivyo wakachitanga na kundireka ine ndekha. Ndipouli kuti ndili ndekha chara, chifukwa Ŵadada ŵali nane. 33Ndamuphalirani vyeneivi, kuti muŵenge na mutende chifukwa cha ine. Mu charu muli suzgo, kweni khwimani mtima, chifukwa ine ndavivya charu.”
Currently Selected:
Yohane 16: Tumbuka
Highlight
Share
Copy
Want to have your highlights saved across all your devices? Sign up or sign in
Bible Society of Malawi
