Yohane 17

Yesu wakujirombera

1 Yesu wakati wayowoya mazgu agha, wakalaŵiska kuchanya na kuti, “Ŵadada, nyengo yafika. Chindikani Mwana winu mwakuti Mwana wamuchindikani Imwe, 2pakuti muli kumupa mazaza pa ŵanthu wose, mwakuti wapereke umoyo wa muyirayira ku wose awo muli kumupa. 3Ndipo uwu ndi umoyo wa muyirayira kuti ŵamumanyani imwe, mwaŵeneimwe ndimwe Chiuta mwekha pera wa unenesko na Yesu Khristu uyo muli kumutuma. 4Ine ndamuchindikani pano pasi pakufiska mlimo uwo mukandipa kuti ndichite. 5Ndipo sono Ŵadada, mundichindike panthazi pinu na uchindami weneuwo nkhaŵa nawo pamoza na imwe pambere charu chindalengeke.

Yesu wakurombera ŵasambiri ŵakhe

6“Ine ndili kuvumbula zina linu ku ŵanthu awo mukandipa kufuma ku charu. Ŵakaŵa ŵinu, ndipo mukandipa ine ŵanthu aŵa. Iwo ŵali kusungilira mazgu ghinu. 7Sono ŵakumanya kuti vyose ivyo mukandipa vikafuma kwa imwe. 8Pakuti ndaŵapa mazgu ghinu agho mukandipa, ndipo ŵali kughapokerera. Ŵakumanya nadi kuti nchakuneneska kuti ine ndili kufuma kwa imwe, ndiposo ŵakupulikana kuti ndimwe muli kundituma.

9“Ine nkhuŵarombera. Kuti nkhurombera charu chara, kweni nkhurombera ŵanthu awo mukandipa chifukwa mbinu. 10Vyose ivyo ndili navyo nvyinu, ndipo vyose ivyo muli navyo nvyane, ndipo nkhuchindikikira mwa ivyo. 11Ndipo sono kuti ndiliso mu charu chara ndipouli aŵa ŵali mu charu ndipo nkhwiza kwa imwe Ŵadada Ŵatuŵa, ŵasungilirani mu zina linu wose awo mukandipa, mwakuti ŵaŵenge yumoza nga ndi umo imwe na ine tiliri yumoza. 12Apo nkhaŵa nawo mu charu, nkhaŵasungilira mu zina linu, nkhavikirira awo mukandipa ndipo na yumoza wa iwo ŵakatayikapo, kupatulako yumoza uyo ngwa Gehena kuti Malembo ghafiskike.#Mas 41.9; Yoh 13.18 13Kweni sono nkhwiza kwa imwe, ndipo nkhuyowoya vyeneivi apo ndili mu charu, mwakuti chimwemwe chane chifiskike mwa iwo. 14Ndili kuŵapa Mazgu ghinu, ndipo charu chikaŵatinkha chifukwa kuti mba charu chara, nga ndi umo ine ndiliri wa mu charu chara. 15Nkhuromba kuti muŵafumyemo mu charu ichi chara, kweni kuti muŵasungilire ku Muheni Yura. 16Kuti mba charu ichi chara, nga ndi umo ine nane kuti ndili wa mu charu ichi chara. 17Muŵatuŵiske mu unenesko, pakuti mazgu ghinu mbunenesko. 18Nga ndi umo imwe mukanditumira ine mu charu, ndimo nane ndaŵatumira mu charu. 19Chifukwa cha iwo, nkhujipatulira ku mlimo utuŵa mu unenesko, mwakuti iwo nawo ŵapatulikire ku mlimo utuŵa.

Yesu wakurombera wose awo ŵizamkumugomezga

20“Kuti nkhurombera aŵa pera chara, kweniso na awo ŵamkupulikana mwa ine chifukwa cha mazgu ghawo, 21mwakuti wose ŵaŵe yumoza. Nga ndi umo imwe Ŵadada muliri mwa ine, ndipo ine mwa imwe, nawoso ŵaŵe mwa ise, mwakuti charu chipulikane kuti ndimwe mukandituma. 22Uchindami uwo mukandipa ndiwo ndaŵapa, mwakuti ŵaŵenge yumoza, nga ndi umo ise nase tiliri yumoza, 23ine mwa iwo, ndipo imwe mwa ine, mwakuti ŵaŵe yumoza nkhanirankhanira, mwakutiso charu chimanyenge kuti ndimwe mukandituma, ndipo mukuŵatemwa nga ndi umo mukunditemwera ine.

24“Ŵadada, nkhukhumba kuti awo muli kundipa ine, ŵakaŵenge uko ndili ine, kuti ŵawone uchindami wane, uwo muli kundipa ine, mu kutemwa kwinu pa ine pambere charu chindalengeke. 25Mwa Ŵadada ŵarunji, charu chilije kumumanyani, kweni ine nkhumumanyani ndipo aŵa ŵakumanya kuti ndimwe muli kundituma. 26Ndaŵamanyiska zina linu, ndipo ndiŵamanyiskenge ndipera mwakuti kutemwa uko mukanditemwa nako, kuŵeso mwa iwo, ndipo ine nane ndiŵe mwa iwo.”

Currently Selected:

Yohane 17: Tumbuka

Highlight

Copy