Yesaya 6
6
Chiuta wakuchema Yesaya kuti waŵe nchimi
1Mu chirimika icho wakafwira Karonga Uziya, nkhawona Fumu yakhara pa chizumbe chakhe chitali chakukwezgeka, ndipo umaliro wa munjilira wakhe ukati waka mbyembyelere na kuzura Nyumba ya Chiuta.#2 Kar 15.7; 2 Mid 26.23 2Pachanya pa Fumu, pakimilira ŵaserafi awo ŵakamuteŵeteranga. Muserafi waliyose wakaŵa na mapapindo ghankhonde na limoza. Iyo wakabenekerera chisko chakhe na ghaŵiri, na ghaŵiriso wakabenekerera malundi ghakhe ndipo wakawurukanga na ghanyakhe ghaŵiri. 3Ŵaserafi ŵara ŵakacherezganga ku yumoza na munyakhe kuti,
“Mutuŵa, Mutuŵa, Mutuŵa
ndi Fumu Mwenenkhongono zose.
Charu chose chazura na uchindami wakhe.”#Uvu 4.8
4Kuchemerezga kwa mazgu ghawo kukachitiska kuti malufura gha chipata ghasunkhunyike ndipo Nyumba ya Chiuta yikazura na josi.#Uvu 15.8
5Ntheura ine nkhachemerezga nkhati, “Soka kwa ine. Ndafwa ine chifukwa ndine munthu uyo wakuyowoya vya ukazuzi, ndipo nkhukhara pamoza na ŵanthu awo ŵakuyowoya vya ukazuzi. Ndipouli ndamuwona Karonga, Fumu Mwenenkhongono zose.”
6Penepapo yumoza wa ŵaserafi ŵara wakawurukira kwa ine, wakaŵa na khara la moto leneilo wakalitora na mbano kufuma pa jochero. 7Wakakhwaska mlomo wane na khara la moto lira ndipo wakati, “Wona, khara ili lakhwaska mlomo wako. Ntheura uheni wawuskikako kwa iwe ndipo zakwananga zako nazo zagowokereka.”
8Penepapo nkhapulika mazgu gha Fumu ghakuti, “Kasi wangaŵa njani uyo ndingamutuma, ndipo ndi njani uyo wati warute mu malo ghithu?”
Ndipo ine nkhazgora nkhati, “Ndine pano, nditumani.”
9 Fumu yikati, “Rutanga, ukaŵaphalire ŵanthu aŵa kuti,
‘Kupulika muti mupulikenge nadi,
kweni muti mupulikiskenge chara,
kulaŵiska muti mulaŵiskenge nadi,
kweni muti muwonenge kanthu chara.’ ”#Mat 13.14-15; Mrk 4.12; Luk 8.10; Yoh 12.40; Mil 28.26-27
10Uyikurungazge mitima ya ŵanthu aŵa,
ughazotofye makutu ghawo,
ughaburumutizge maso ghawo,
mzire ŵawone na maso ghawo,
ŵapulike na makutu ghawo,
ŵamanyiske na mitima yawo,
ndipo ŵang'anamuke mu mtima na kuchizgika.
11Penepapo ine nkhazgora nkhati,
“Mwe Fumu, kasi mpaka pauli?”
Fumu yikandizgora yikati,
“Mpaka misumba yikhare mahami,
na yambula ŵanthu ŵakukharamo.
Mpaka nyumba zizakazgeŵe ŵanthu ŵakukharamo,
ndipo charu nacho chizakaŵe mapopa nkhanira.
12Mpaka Fumu yizakasezgere kutali munthu waliyose,
ndipo charu chizakaŵe cha mayiyi chambula ŵanthu.
13Nangauli munthu yumoza mu ŵanthu khumi wakhareko mu charu,
iyo nayo wamkukomekaso.
Kweni nga ndi umo chisinga cha muŵanga panji cha musoro,
chikukhalirira pa malo apo khuni latemeka,
ntheuraso ndimo mbuto yakupatulika
yamkuŵiraso chisinga mu charu.”
Currently Selected:
Yesaya 6: Tumbuka
Highlight
Share
Copy
Want to have your highlights saved across all your devices? Sign up or sign in
Bible Society of Malawi
