Yesaya 5
5
Sumu yakwimbira munda wa mpheska
1Sono nditi ndimwimbire uyo nkhumutemwa,
sumu ya munda wakhe wa mpheska.
Wakutemweka wane wakaŵa na munda wa mpheska,
pa phiri la nyata yiweme.#Mat 21.33; Mrk 12.1; Luk 20.9
2Wakatipura na kuwuskamo mawe,
ndipo wakapandamo mpheska ziweme chomene.
Wakazenga chigongwe cha ŵalinda mukati mwakhe,
ndipo wakajimamo chakukamiramo vinyo mu munda ura.
Mwenecho wakagomezganga kuti mufumenge mpheska yiweme,
kweni mukafuma mpheska zakuŵaŵa.
3Sono imwe mukukhara mu Yerusalemu,
na imwe ŵaYuda,
ndaŵeya kuti mweruzge ndimwe
pakati pa ine na munda wane.
4Kasi mphanyi nkhawuchitira vichi munda uwu,
kuruska icho ndili kuwuchitira kale?
Ine nkhagomezganga kuti upambikenge mpheska ziweme,
kasi nchifukwa uli ukapambika mpheska zakuŵaŵa?
5“Sono nditi ndimuphalirani,
icho ndichitenge ku munda wane wa mpheska.
Nditi ndiwuskengepo luŵigho lwakhe,
mwakuti vipambi vyakhe viryeke.
Nditi ndiwiskirenge pasi chiliŵa chakhe,
mwakuti ŵanthu ŵawukandirizgire pasi.
6Nditi ndiwuzgore kuŵa thengere.
Ine kuti ndiwuphatilirenge chara nesi kulimamo,
ndipo nthura na minga viti vimerengemo.
Nditi ndilangule maŵingu,
kuti ghareke kurokweskamo vura.”
7Charu cha Israele ndicho munda wa mpheska
wa Fumu Mwenenkhongono zose.
ŴaYuda ndiwo mpheska
izo Fumu yikucha nazo.
Fumu yikagomezganga
kuti paŵenge weruzgi wakunyoroka,
kweni pakaŵa kuthiska ndopa pera.
Yikagomezganga kuti paŵenge urunji
kweni yikapulikanga kulira kwa ŵanthu ŵakusuzgika.
Uheni uwo ŵanthu ŵakuchita
8Soka kwa imwe mukubamphika nyumba na nyumba,
mwaŵeneimwe mukusazgirako minda ku minda,
mpaka paŵavye malo gha munthu munyakhe,
kweni imwe pera mu charu.
9Ndapulika Fumu Mwenenkhongono zose,
yikurapa, yikuti,
“Nadi nyumba zinandi
zizamkuzgoka mahami,
nyumba zikuruzikuru na zakutowa,
zizamkuŵa zambula ŵanthu ŵakukharamo.
10Munda wa mpheska wa mahekitala khumi,
vinyo lakhe lizamkuzura chiŵiya chimoza pera.
Ndipo homeri limoza la mbewu,
lizamkupambika debe limoza pera.”
11Soka ku awo ŵakuwuka na macherochero chomene,
kuchimbilira kuya kamwa moŵa.
Iwo ŵakutandara kwenekura kumwa vinyo usiku wose,
ŵasuke ŵaroŵere betubetu.
12Kwenekura ŵakulizga bango, chiding'indi, chimbitiku na fyoliro,
uku ŵakumwa vinyo pa viphikiro vyawo.
Kweni kuti ŵakupwererako za milimo ya Fumu chara,
nesi kuwona nchito za mawoko ghakhe.
13Pa chifukwa ichi ŵanthu ŵane ŵati ŵayorekerenge ku umikori,
chifukwa cha kureka kupulikiska.
Ŵarongozgi ŵawo ŵakuzirwa ŵati ŵafwenge na njara,
ndipo ŵanthu ŵanyakhe wose ŵati ŵafwenge na nyota.
14Pa chifukwa ichi malo gha ŵakufwa ghajula mlomo wakhe,
nadi mlomo wakhe ngwa kujurika.
Ŵakuzirwa ŵa mu Yerusalemu,
pamoza na ŵanthu waka ŵanyakhe,
ndiposo na awo ŵakupoma na uloŵevu wawo
ŵati ŵawiremo mu malo gha ŵakufwa.
15Munthu yose wati wakhizgikire pasi.
Nadi, munthu yose wati wayuyurike,
ndipo awo ŵakujikuzga ŵati ŵakhozgeke soni.
16Kweni Fumu Mwenenkhongono zose yiti yichindikike
chifukwa cha weruzgi wakhe,
ndipo Chiuta Mutuŵa wati warongore utuŵa wakhe
pakuchita urunji.
17Ŵana-mberere ŵamkuryanga mu luhari palipose,
mbuzi zamkuryanga mu mahami.
18Soka kwa awo ŵakujiguzira ubendezi pakuyowoya utesi,
ndipo ŵakuguza kwananga nga ndi vingwe vya gareta.
19Iwo ŵakuhoyera kuti,
“Rekani Chiuta wendeske,
wachite luŵiro mlimo wakhe, mwakuti tiwuwone.
Rekani lisenderere pafupi, dazgo la Mutuŵa Yura wa Israele,
lize luŵiro mwakuti tilimanye.”
20Soka ku awo ŵakuti uheni ndiwo uweme,
ndipo uweme ndiwo uheni,
ŵeneawo ŵakuzgora mdima kuŵa ungweru,
ndipo ungweru kuŵa mdima,
ŵeneawo ŵakuzgora vyakuŵaŵa kuŵa vyakunowa,
ndipo vyakunowa kuŵa vyakuŵaŵa.
21Soka ku awo ŵakujipima ŵekha kuti mbamahara,
awo ŵakujipima ŵekha kuti mbakuchenjera.
22Soka ku awo ndi nkhwantha pakumwa vinyo,
awo ndi vinkhara pakusazga moŵa.
23Ŵeneawo ŵakumweruzgira makora munthu wakwananga,
chifukwa cha chimbundi,
kweni ŵakureka kumweruzgira mwakunyoroka
munthu wambula kafukwa.
24Ntheura sono, umo dimi la moto
likochera visinkho vya maphekese,
umo utheka wakomira
ukunyekera na moto,
ntheura ndimo misisi yawo yiti yivundirenge,
maluŵa ghawo ghati ghawuruke nga ndi fuvu.
Ivi vizamkuchitika chifukwa muli kukana,
marango gha Fumu Mwenenkhongono zose,
na kupepura mazgu gha Mutuŵa Yura wa Israele.
25Pa chifukwa ichi,
Fumu yikaŵakwiyira ŵanthu ŵakhe,
yikawuskira woko lakhe pa iwo kuti yiŵalange.
Mapiri ghakasunkhunyika,
ndipo vitanda vya mathupi ghawo,
vyati waka mbwee nga ndi viswaswa,
mu misewu ya misumba.
Nangauli vikaŵa ntheura,
ukari wa Fumu kuti ukagowoka chara,
woko lakhe likaŵa lakunyoroka ndipera kuŵalanga iwo.
26 Fumu yipereke chimanyikwiro cha ndembera ya nkhondo,
kuchema mafuko ghatali.
Yiti yilizge kaluvi kughachema,
kufuma ku mphererekezgo za charu kwiza kamumarani.
Wonani ghakwiza luŵiro ghakuchimbilira.
27Palije na yumoza wakuvuka,
panji wakukhuŵara, mukati mwawo.
Palije na yumoza wakusiwa
panji kugona tulo.
Palije nanga ndi nkhwamba mu chiuno
iyo yapweremuka,
panji lusinga lwa skapato ulo lwadumuka.
28Mivwi yawo njakuthwa,
ndipo mauta ghawo ngakupinda makora,
vikandiro vya mahachi ghawo
vili nga ndi libwe la sangalawe,
ndipo mikombero ya magareta ghawo,
yikuchimbira nga ndi kavuruvuru.
29Kubangura kwawo kuli nga ndi nkharamu,
nadi, ŵakubangura nga ndi twana twa nkharamu.
Ŵakuwuruma na kukora nyama,
ŵakuyiyegha ndipo palije na uyo wangayithaska.
30Pa zuŵa leneilo ŵati ŵabangure pa imwe ŵaIsraele,
nga ndi kupoma kwa nyanja.
Ndipo usange yumoza wizamkulaŵiska mu charu,
wizamkuwona mdima na visuzgo,
ungweru nawo wizamkufipiskika na maŵingu.
Currently Selected:
Yesaya 5: Tumbuka
Highlight
Share
Copy
Want to have your highlights saved across all your devices? Sign up or sign in
Bible Society of Malawi
