Hagayi 2

Uchindami uphya wa Nyumba ya Chiuta

1Mu chirimika cha chiŵiri cha Karonga Dariyusi, pa zuŵa la 21 la mwezi wa chinkhonde na chiŵiri, mazgu gha Fumu ghakiza kwa nchimi Hagayi kuti, 2“Yowoya kwa Zerubabele mwana wa Satiyele, nduna ya Yuda, na kwa Yoshuwa mwana wa Yehozadaki, musofi mukuru, na kwa ŵanthu awo ŵakawerako ku umikori, kuti, 3‘Kasi ndi njani wa imwe wa ŵakuwerako ku umikori uyo wakawona nyumba iyi mu uchindami wakhe wakale? Kasi sono mukuyiwona uli? Asi mukuyiwona kuŵa ya wakawaka?’ ”#Ezira 3.12 4Fumu yikuti, “Kweni sono uŵe wankhongono, iwe Zerubabele. Uŵe wankhongono, iwe Yoshuwa, mwana wa Yehozadaki, musofi mukuru. Muŵe ŵankhongono, mose mwa ŵanthu ŵakukhara mu charu. Teŵetani, pakuti Ine ndili namwe.” Ntheura ndimo yikuyowoyera Fumu Mwenenkhongono zose. 5Ichi ndicho nkhapangana namwe para mukafumanga mu charu cha Eguputo. Ine ndili namwe. Mureke kopa.#Kuf 29.45-46

6“Pakuti Fumu Mwenenkhongono zose yikuti, ‘Kwakhara kanyengo kachoko waka kuti ndisunkhunye kuchanya na pasi, nyanja na mtunda.#Heb 12.26 7Nditi ndisunkhunyenge mafuko ghose mwakuti usambazi wa mafuko ghose wamkwiza mu nyumba iyi, ndipo ndamkuzuzga nyumba iyi na uchindami.’ Ntheura ndimo yikuyowoyera Fumu Mwenenkhongono zose. 8‘Siliva ngwane, golide nayo ngwane.’ Ntheura ndimo yikuyowoyera Fumu Mwenenkhongono zose. 9‘Uchindami wa sono wa nyumba iyi uŵenge ukuru kuruska wa pakudanga.’ Ntheura ndimo yikuyowoyera Fumu Mwenenkhongono zose. ‘Ndipo mu malo agha ndamkuŵikamo mutende na uweme.’ ”

Ntheura ndimo yikuyowoyera Fumu Mwenenkhongono zose.

Nchimi yikufumba musofi

10Pa zuŵa la 24 la mwezi wa chinkhonde na chinayi, mu chirimika cha chiŵiri cha Dariyusi, mazgu gha Fumu ghakiza kwa nchimi Hagayi, ghakuti, 11“Ntheura Fumu Mwenenkhongono zose yikuti, ‘Fumba ŵasofi kuti ŵazgore fumbo ili: 12Usange munthu wakuyegha nyama yakupatulika mu chakuvwara chakhe, ndipo na chakuvwara chakhe wakukhwaska chingwa, panji musuni, panji vinyo, panji mafuta, panji mtundu uliwose wa chakurya, kasi chakurya ichi chingaŵa chakupatulika?’ ”

Ŵasofi ŵakazgora, ŵakati, “Chara.” 13Penepapo Hagayi wakati, “Usange munthu uyo ndi wakukazuzgika pakukhwaska chitanda ndipo wakhwaska chimoza icho chazunurika apa, kasi chikuŵa chakukazuzgika?” Ŵasofi ŵakati, “Chikuŵa chakukazuzgika.”#Kup 19.11-22 14Ndipo Hagayi wakati, “Fumu yikuti, ‘Ndimo kuliri na ŵanthu aŵa, na ku mtundu uwu ndiposo na vyose ivyo ŵakuchita. Ntheura ivyo ŵakupereka vikuŵa vyakukazuzgika.’ ”

Fumu yikupangana kupereka vitumbiko vyakhe

15“Sono romba, ghanaghana icho chichitikenge kwamba muhanya uno mpaka kunthazi. Pambere mundambe kuzenga Nyumba ya Fumu, kasi makhaliro ghinu ghakaŵa uli? 16Kasi kukuŵa uli? Para munthu wakughanaghana kuti pakuvuna wasangemo mikukwe 20, kweni wakusanga 10 pera. Para wakwiza kanegha vinyo mu chakusungiramo vinyo wakughanaghana kuzuzga mabotolo 50, kweni ghakusangika 20 pera. 17Nkhamutimbani na nthenda yakuŵawura mbuto yose na ya chinoni, na kurokweska matalala pa milimo yose ya mawoko ghinu. Ndipouli imwe kuti mukawerera kwa ine chara. Ntheura ndimo yikuyowoyera Fumu. 18Wonani ivyo vichitikenge kwamba zuŵa la muhanya uno, la 24 la mwezi wa chinkhonde na chinayi. Kufuma pa zuŵa ilo lufura lwa Nyumba ya Fumu lukakhazikikira, muwone icho chamkuchitika: 19Kasi mbuto zichali mu nthamba? Kasi mpheska, makuni gha vikuyu, magalagadeya, na maolive, vichali vindapambike? Kwamba muhanya uno nditi ndimutumbikani.”

Phangano la Fumu kwa Zerubabele

20Mazgu gha Fumu ghakiza kachiŵiri kwa Hagayi pa zuŵa la 24 la mwezi ura, ghakati, 21“Umuphalire Zerubabele, nduna ya cha charu Yuda kuti, ‘Ndili pafupi kusunkhunya kuchanya na pasi. 22Nditi ndibwangandule chizumbe cha maufumu, ndimarenge nkhongono za maufumu gha ŵamitundu, magareta na awo ŵakukweramo, ndipo mahachi na ŵakukwera ŵawo ŵawenge pasi. Waliyose wakomekenge na lupanga na munyakhe.’ ”

23Pa zuŵa ilo, Fumu Mwenenkhongono zose yikuti, “Nditi ndikutore iwe Zerubabele muteŵeti wane, mwana Shatiyele. Nditi ndikuzgore iwe kuŵa nga ndi mphete ya kudindira, pakuti ine ndine ndakusankha iwe.”

Ntheura ndimo yikuyowoyera Fumu Mwenenkhongono zose.

Currently Selected:

Hagayi 2: Tumbuka

Highlight

Copy