Hagayi 1

Fumu yikulangula kuzengaso Nyumba ya Chiuta

1Mu chirimika cha chiŵiri cha kuwusa kwa Karonga Dariyusi, pa zuŵa lakudanga la mwezi wa chinkhonde na chimoza, mazgu gha Fumu ghakiza na nchimi Hagayi, kwa Zerubabele mwana wa Shatiyele, nduna ya charu cha Yuda, na kwa Yoshuwa mwana wa musofi mukuru Yehozadaki,#Ezira 4.24—5.2, 6.14 2ghakati, “Fumu Mwenenkhongono zose yikuti, ‘Ŵanthu aŵa ŵakuti nyengo ya kuzengeraso Nyumba ya Chiuta yindakwane.’ ”

3Penepapo mazgu gha Fumu ghakiza ku ŵanthu kwizira mwa nchimi Hagayi ghakati, 4“Kasi iyi ndi nyengo yakuti imwe mwekha ndimwe mukharenge mu zinyumba zakunozgeka makora, apo nyumba yane yakhara yakupasuka?”

5Ntheura Fumu Mwenenkhongono zose yikuti, “Ghanaghanani na umo mwakhalira na umoyo winu. 6Mwaseŵa chomene, ndipo mwavuna pachoko waka. Mukurya, kweni mukukhuta chara. Mukumwa, kweni mukukhorwa chara. Mukujivwarika, kweni palije na yumoza wakuthukira. Uyo wakupokera malipiro, wakughapokera kuti ghaŵikike waka mu thumba lakudoroka.”

7Ntheura Fumu Mwenenkhongono zose yikuti, “Ghanaghanani na umo mwakhalira na umoyo winu. 8Rutani ku mapiri, mukadumure makuni na kuzenga nyumba, yakuti ndikondwere nayo na kuti mwenemumo ndichindikikiremo.” Ntheura ndimo yikuyowoyera Fumu. 9“Mukakhumbanga vinandi, wonani, mwapokera vichoko. Ndipo mwati mwiza navyo kufuma ku nyumba zinu, nkhaviparanya”. Fumu Mwenenkhongono zose yikuti, “Kasi nchifukwa uli? Chifukwa chakuti nyumba yane yili kupasuka, apo yose wa imwe wakutangwanika na nyumba yakhe na yakhe. 10Pa chifukwa ichi kuchanya kwakora vura kuti yireke kurokwa, ndipo charu nacho kuti chireke kumezga mbuto zakhe.”

11Ndaŵika chilangalanga pa charu na mu mapiri, pa minda ya tirigu, pa minda ya mpheska, pa makuni gha maolive, pa vyose ivyo vikumera pa charu, pa ŵanthu na pa ng'ombe wuwo, ndiposo na pa milimo yawo yose.

Ŵanthu ŵakupulikira languro la Fumu

12Ntheura Zerubabele mwana wa Satiyele, na Yoshuwa mwana wa Yehozadaki, musofi mukuru, pamoza na ŵanthu wose awo ŵakawerako ku umikori ŵakapulikira mazgu gha Fumu, Chiuta wawo, agho ghakiza mwa Nchimi Hagayi, ndipo ŵanthu ŵakasopa Fumu.

13Penepapo Hagayi nthumi ya Fumu yikaŵaphalira ŵanthu uthenga wa Fumu wakati, “Fumu yikuti, ‘Ine ndili namwe.’ ” 14Ndipo Fumu yikawuska mtima wa Zerubabele mwana wa Satiyele, nduna ya Yuda, na mtima wa Yoshuwa mwana wa Yehozadaki, musofi mukuru, na mitima ya ŵanthu wose awo ŵakawerako ku umikori. Iwo ŵakiza kateŵeta pa Nyumba ya Chiuta wawo, Fumu Mwenenkhongono zose. 15Apa pakaŵa pa zuŵa la 24 la mwezi wa chinkhonde na chimoza mu chirimika cha chiŵiri cha kuwusa kwa Karonga Dariyusi.

Currently Selected:

Hagayi 1: Tumbuka

Highlight

Copy