Amosi 7
7
Amosi wakuwona mboniwoni ya zombe
1 Fumu Chiuta wakandirongora chinthu ichi mu mboniwoni. Fumu yikapanganga zombe apo utheka ukambanga kuphukaso. Ukaŵa utheka uwo ukamera apo karonga wakaŵa kuti wavunamo kale. 2Para nkhawona kuti zombe wamara kurya utheka wose ŵa mu charu chira, ine nkhati,
“Mwe Fumu Chiuta,
nkhumuŵeyani, gowokani!
Kasi ŵaYakhobe aŵa
ŵangachintha uli?
Iwo aŵa ŵalije na nkhongono.”
3Penepapo Fumu yikagowoka, yikati,
“Ichi kuti chichitikenge chara.”
Amosi wakuwona moto
4Chinyakhe icho Fumu Chiuta wakandirongora mu mboniwoni ndi ichi: Fumu Chiuta wakachemanga moto kuti ulange ŵanthu. Moto ura ukamyangura ndimba yikuru ya nyanja ndipo ukamba kunanga charu. 5Penepapo ine nkhati,
“Mwe Fumu Chiuta,
nkhumuŵeyani, rekani.
Kasi ŵaYakhobe aŵa ŵangachintha uli?
Iwo aŵa ŵalije na nkhongono.”
6Penepapo Fumu yikagowoka.
Ntheura Fumu Chiuta wakazgora wakati,
“Ichi nacho kuti chichitikenge chara.”
Amosi wakuwona chingwe chakupimira
7 Fumu yikandirongora ichi: Fumu yimilira pa mphepete pa chiliŵa, uku yakolera chingwe chakupimira. 8Sono Fumu yikandifumba yikati, “Iwe Amosi, kasi ukuwona vichi?” Ine nkhazgora nkhati, “Chingwe chakupimira.” Penepapo Fumu yikati,
“Wona, nkhuŵika chingwe chakupimira
mukati mu ŵanthu ŵane, ŵaIsraele.
Ine kuti ndizamkuŵagowokeraso chara.
9Malo gha pachanya ghakusoperako gha Yisake ghamkuŵa mahami,
malo ghakupatulika gha ŵaIsraele, ghizamkupankhuka.
Ŵa mu nyumba ya Yerobowamu,
ndizamkuŵawukira na nkhondo.”
Amosi na Amaziya
10Sono ku Betele kukaŵa musofi munyakhe zina lakhe Amaziya. Iyo wakatuma mazgu kwa Yerobowamu, karonga wa charu cha Israele, wakati, “Amosi wakumwenderani mphiska mukati mu ŵaIsraele. Ŵanthu kuti ŵangamanya kuzomerezga chara vyose ivyo iyo wakuyowoya. 11Amosi wakuti,
‘Yerobowamu wamkufwa na nkhondo,
ŵaIsraele nawo ŵamkuyorekera ku umikori
kufuma mu charu cha kwawo.’”
12Amaziya wakayowoyaso kwa Amosi wakati, “Iwe muwoni, fumako kuno, ndipo rutanga ku charu cha Yuda. Kwenekuko ndiko ukaryenge na kuchima. 13Kweni ungizakachimangaso ku Betele chara, chifukwa ndi malo gha karonga ghakusoperako ndiposo ndi Nyumba ya Chiuta mu charu ichi.”
14Penepapo Amosi wakamuzgora Amaziya wakati, “Ine kuti ndine nchimi chara, ndiposo kuti ndine yumoza wa nchimi zichokozichoko chara. Ine ndine waka mliska ndiposo nkhupwererera waka makuni gha vikuyu. 15Fumu ndiyo yikachita kunditora na kundirekeska mlimo wakuŵeta mberere na mbuzi mberere na mbuzi, ndipo yikandiphalira kuti, ‘Rutanga, ukachime ku ŵanthu ŵane, ŵaIsraele.’ 16Ntheura sono pulika mazgu agho Fumu yikuyowoya. Iwe ukuti,
‘Reka kuchima vyakususka ŵaIsraele,
reka kupharazga vyakususka nyumba ya Yisake.’
17Pa chifukwa ichi Fumu yikuti,
‘Muwoli wako wati waŵenge muzaghali mu msumba,
ŵana ŵako ŵanarume na ŵanakazi ŵamkukomeka na nkhondo.
Charu chako ŵamkuchigaŵagaŵa
na kuchipereka ku ŵanthu ŵanji.
Iwe wamwene wamkufwira ku charu
chambula kumanya Chiuta.
ŴaIsraele nawo ŵamkuyorekera ku umikori
kufuma mu charu cha kwawo.’ ”
Currently Selected:
Amosi 7: Tumbuka
Highlight
Share
Copy
Want to have your highlights saved across all your devices? Sign up or sign in
Bible Society of Malawi
