Amosi 6
6
Kupankhuka kwa Israele
1Soka kwa imwe
mwaŵeneimwe mukukhara mu kufwasa mu Ziyoni,
na kwa imwe mukupima kuti muli mu chimango
pa Phiri la Samariya.
Soka kwa imwe muli ŵakumanyikwa mukati mu ŵamitundu ŵakudanga,
mwaŵeneimwe ŵaIsraele ŵakwizako kupenja wovwiri.
2Rutani ku msumba wa Kaline,
ndipo mukawone.
Kufuma kura muruteso ku Hamati, msumba ukuru ura,
ndipo mukhilire ku Gati, msumba wa ŵaFilisiti.
Kasi misumba iyi njiweme
kuruska maufumu gha Yuda na cha Israele?
Panji, kasi charu chawo nchikuru
kuruska charu chinu?
3Imwe kuti mukuliŵika kutali zuŵa lira la pharaniko,
ndipo mukulisezgera kufupi zuŵa lira la viwawa.
4Soka kwa imwe mukugona pa vitara vya minyanga ya zovu,
na kujinyorora pa mipando yinu ya kuwowofoka.
Imwe mukurya nyama ya ŵana-mberere kufuma ku mskambo
ndiposo na ŵana ŵa ng'ombe ŵakututuŵa kufuma mu chiŵaya.
5Imwe mukwimba sumu zawakawaka
uku mukulizga viding'indi,
ndipo, nga ndi Davide, mukujinozgera vyakwimbira.
6Imwe mukumwera vinyo mu twadira
na kujiphakazga mafuta ghaweme chomene,
kweni mulije chitima na kupankhuka kwa charu cha Yosefe.
7Ntheura imwe ndimwe mwamkuŵa ŵakudanga kuyorekera ku umikori
ndipo viphikiro na vikondwerero vyamkumumalirani.
8 Fumu, Chiuta Mwenenkhongono zose warapa mu zina lakhe kuti,
“Nkhunyanyara nako kujikuzga kwa Yakhobe,
nkhutinkhana nagho malinga ghawo.
Nadi nditi ndiwupereke msumba wawo ku ŵarwani
pamoza na vyose ivyo vili mwenemumo.”
9Usange ŵanthu khumi ŵamkubisama mu nyumba yimoza, nawoso ŵamkufwa ndipera. 10Mubali yumoza wa awo ŵafwa, uyo wakwenera kupwererera vya awo ŵafwa, wizamkufika na kufumiska vitanda vira. Apo wizamkufumba yumoza uyo wakharako mu nyumba yira kuti, “Kasi muliso munthu umo?” Iyo wizamkuzgora kuti, “Chara nadi, mulije.” Penepapo munthu yura wamkuyowoya kuti, “Chetama! Kuŵavye na yumoza wakuzunura zina la Fumu.”
11Nadi, para Fumu yalangula,
nyumba zikuruzikuru zizamkubwanganduka,
ndipo nyumba zichokozichoko zamkugundumulika nkhanira.
12Kasi mahachi ghakuchimbira pa majarawe?
Kasi pa nyanja munthu wangamanya kulimapo na ng'ombe.
Ndipouli imwe mwazgora weruzgi wakunyoroka
kuŵa chinthu chakukoma,
ndipo vipambi vya urunji
kuŵa nga ndi chinthu chakuŵaŵa.
13Imwe mukukondwa pakuthereska msumba wa Lodebara, na kuti,
“Asi tathereska msumba wa Karinayimu
na nkhongono zithu na zithu?”
14Sono Fumu, Chiuta Mwenenkhongono zose wakuti,
“Ndizamkumutumirani ŵanthu ŵa mtundu unyakhe
kuti ŵizakarwe namwe, Mwe ŵaIsraele.”
Iwo ŵizamkumuyuzgani kufuma ku chipata cha Hamati,
kuya kafika ku kadambo ka Araba.
Currently Selected:
Amosi 6: Tumbuka
Highlight
Share
Copy
Want to have your highlights saved across all your devices? Sign up or sign in
Bible Society of Malawi
