Amosi 5

Nchemo ya kung'anamuka mu mtima

1Mwe ŵaIsraele, pulikani mazgu agha, gheneagho nkhumuphalirani uku nkhutengera.

2“Mwali wakulangwa Israele wawa,

ndipo wawukengeso chara.

Wasidika yekha mu charu chakhe,

kwambula na yumoza wakumuwuska.”

3 Fumu Chiuta wakuti,

“Msumba uwo ukaruta ku nkhondo na ŵasilikari 1,000,

uzamkuŵa na ŵasilikari ŵakupona 100 pera.

Uwo ukaruta ku nkhondo na ŵasilikari 100,

uzamkuŵa na ŵasilikari ŵakupona khumi pera

mu ŵaIsraele.”

4 Fumu yikuti ku ŵaIsraele,

“Muwerere kwa ine

kuti muŵe ŵamoyo.

5Kweni mureke kuya kasopa vikozgo ku Betele,

nanga nkhuruta ku Giligala

panji kwambukira ku Beyeresheba.

Nadidi ŵanthu ŵa ku Giligala ŵamkuyorekera ku umikori,

malo gha Betele ghamkuzgoka kuŵa ghawakawaka.”

6Muwerere kwa Fumu

kuti muŵe ŵamoyo.

Usange mwareka,

iyo yigolerenge nga ndi moto

mu mumba ya Yosefe.

Wizamkumyangura ŵanthu ŵa ku Betele,

kwambula na yumoza wakuwuzimya.

7Imwe mukuzgora weruzgi wakunyoroka

kuŵa wakuŵaŵa,

ndipo urunji mukuwutaya mu fuvu.

8Chiuta uyo wakalenga nyenyezi za chilimira na mauta,

uyo wakuzgora chisi chikuru kuŵa kungweruka kwa mulenje,

uyo wakuzgora muhanya kuŵa usiku,

uyo wakuwunganya pamoza maji gha mu nyanja

na kughapungulira pa charu,

zina lakhe ndi Fumu.#Yob 9.9, 38.31

9Mwamabuchibuchi iyo wakuparanya vinkhara,

mwakuti malinga ghakubwanganduka.

10Imwe mukutinkha

uyo wakumuchenyani pa mphara,

ndipo mukumunyanyara

uyo wakuyowoya unenesko.

11Mukukandirizgira pasi ŵakavu

na kuŵachichizga kumupani tirigu.

Ntheura, nangauli mwazenga nyumba za mawe,

kweni kuti mwamkukharamo chara.

Nangauli mwalima minda yiweme ya mpheska,

kweni kuti mwamkumwapo vinyo lakhe chara.

12Ine nkhumanya unandi wa majuvyo ghinu

na unandi wa zakwananga zinu.

Imwe mukusuzga ŵarunji,

na kupoka vimbundi.

Mukureka kweruzga makora

mirandu ya ŵakavu pa mphara.

13Ndicho chifukwa munthu wa mahara

wakukhara chete pa nyengo nga ndi iyi,

pakuti iyi ndi nyengo yiheni.

14Penjani uweme, uheni chara

mwakuti muŵe ŵamoyo.

Ntheura Fumu, Chiuta Mwenenkhongono zose,

wati waŵe namwe

nga ndi umo mukuyowoyera kuti ndimo waliri.

15Tinkhani uheni, ndipo temwani uweme.

Weruzgi winu uŵe wakunyoroka pa mphara ya mirandu.

Tikumanya chara, panji Fumu, Chiuta Mwenenkhongono zose

wamkuŵa na lusungu kwa awo ŵakharako mu nyumba ya Yosefe.

16Pa chifukwa ichi

Fumu, Chiuta Mwenenkhongono zose, wakuti,

“Mu maluwugha ghose mwamkuŵa chitengero,

mu ŵagurwe wose ŵamkulira kuti,

‘Mbaya mwe! Mbaya mwe!’

Ŵalimi ŵamkuchemekera ku chiliro,

awo ŵakumanya kutengera nawo ŵamkuchemeka.

17Mu minda yose ya mpheska mwakuŵa chitengero

pakuti ndizamkwenda mukati mwinu,

kuti ndimulangani nadi.”

Ntheura ndimo yikuyowoyera Fumu.

18“Soka kwa imwe,

mwaŵeneimwe mukunwekera kuwona zuŵa la Fumu.

Kasi zuŵa la Fumu lizamkuŵa na chandulo uli kwa imwe?

Ndi zuŵa la mdima bii, ungweru chara.

19Kwizamkuŵa nga ndi munthu wakuchimbira ku nkharamu,

kweni wakukumana na nkharamira.

Panji nga ndi munthu uyo wakanjira mu nyumba

na kweghamira woko lakhe ku chimati

ndipo njoka yikumuruma.

20Asi zuŵa la Fumu nda mdima,

lambula ungweru?

Asi nda mdima wakofya,

lambula kuŵala?”

21 Fumu yikuti,

“Ine nkhuvitinkha na kuviyuyura viphikiro vyinu.

Ine kuti nkhukondwera chara

na maungano ghinu ghakupatulika.#Yes 1.11-14

22Nanga mupereke kwa ine sembe zinu zakocha na za ufu,

ine kuti ndizipokererenge chara.

Sembe zinu za wenenawene za ng'ombe zinu zakututuŵa,

ine kuti ndizamkuzilaŵiska chara.

23Mungandizinganga makutu chara

na mphomo ya kwimba kwinu.

Ine nditegherezgenge chara

para mukulizga ŵabango.

24Kweni nkhukhumba weruzgi wakunyoroka,

wendenge nga ndi maji.

Urunji nawo uŵenge nga ndi mronga

uwo kuti ukukamuka maji ghakwenda chara.

25“Kasi imwe ŵaIsraele mukandiyegherapo sembe na vyakupereka mu mapopa mu virimika 40?#Mil 7.42-43 26Sono imwe ipo mwamkuyeghanga Sakuti, karonga winu, Kayiwani, nyenyezi yira, chiuta winu, vyeneivyo ndi vikozgo ivyo mukajinozgera mwaŵene. 27Ntheura ndamkumuyorerani ku umikori kujumpha charu cha Damaseko.” Ntheura ndimo yikuyowoyera Fumu, yeneiyo zina lakhe ndi Chiuta Mwenenkhongono zose.

Currently Selected:

Amosi 5: Tumbuka

Highlight

Copy