Amosi 3
3
1Mwe ŵaIsraele, pulikani mazgu gha Fumu agha, agho yikayowoya kususka imwe, na mbumba yose iyo yikiza nayo kufuma ku Eguputo:
2“Pa mafuko ghose gha pa charu cha pasi,
imwe mwekha ndimwe nkhamusankhani.
Ntheura nditi ndimulangani nadi
chifukwa cha maubendezi ghinu ghose.”
Milimo ya nchimi
3Kasi ŵanthu ŵaŵiri ŵakwenda pamoza
kwambula kuti ŵazomerezgana?
4Kasi nkharamu yikubangura mu thengere,
kwambula kuti yakora nyama?
Kasi mwana wa nkharamu wakulira mu mphanji yakhe
kwambula kuti wakorapo kanthu?
5Kasi kayuni kakuwira mu chipingo pasi,
kwambula kuti pali nyambo?
Kasi chipingo chikuvwamphuka
kwambula kuti kanthu kakhwaskapo?
6Kasi mbata ya nkhondo yikulira mu msumba,
kwambula kuti ŵanthu ŵatentheme
Kasi suzgo yikuwira msumba,
kwambula kuti Fumu ndiyo yatuma?
7Nadi, Fumu Chiuta
kuti wakuchita kanthu chara,
kwambula kuti wavumbule cha muchindindi chakhe
ku ŵateŵeti ŵakhe, awo ndi nchimi.
8Para nkharamu yikubangura,
ndi njani uyo wakureka kopa?
Para Fumu Chiuta ndiyo wayowoya,
ndi njani uyo wati wareke kuchima?
Chilango cha ŵaSamariya
9Upharazge ku awo ŵakukhara mu malinga gha mu charu cha Ashidodi,
na ku awo ŵakukhara mu malinga gha mu charu cha Eguputo kuti,
“Wunganani pa mapiri gha mu charu cha Samariya,
mukawone vya chitimbaheti na visuzgo ivyo vili mwenemumo.”
10 Fumu yikuti,
“Iwo kuti ŵakumanya chara
kuchita icho nchiweme.
Ŵakuzuzga waka mu malinga ghawo
na vinthu ivyo ŵakusanga pakuchita nkhondo na pa kwiba.”
11Ntheura Fumu Chiuta wakuti,
“Ŵarwani ŵizamkuzingirizga charu ichi,
ŵizamkubwangandula malinga ghinu,
na kuskogha ivyo vili mwenemumo.”
12Ntheura Fumu Chiuta wakuti, “Nga ndi umo mliska wakupokeskera vigha viŵiri panji kachigaŵa ka khutu ka mberere yakhe para yaliwa na nkharamu, ndimo ŵizamkuphokwera ŵaIsraele ŵeneawo ŵakukhara mu charu cha Samariya, nga nkhachigaŵa waka ka mupando panji ka chitara.”
13 Fumu, Chiuta Mwenenkhongono zose wakuti,
“Pulikani, ŵapanikizgirani ŵa mu mbumba ya Yakhobe.
14Pa zuŵa ilo ndamkulangira ŵaIsraele,
chifukwa cha zakwananga zawo,
ndamkugumura majochero gha ku Betele.
Ndamkubonthora masengwe gha jochero,
na kughawiskira pasi.#2 Kar 23.15
15Ndamkubwangandula nyumba
ya pa nyengo ya chifuku na ya pa chihanya.
Nyumba zakuzengeka na minyanga ya zovu zamkubwanganduka.
Nadi nyumba zakuzirwa nazo zamkupasuka.”
Ntheura ndimo yikuyowoyera Fumu.
Currently Selected:
Amosi 3: Tumbuka
Highlight
Share
Copy
Want to have your highlights saved across all your devices? Sign up or sign in
Bible Society of Malawi
