Amosi 2
2
Chilango pa ŵaMowabu
1 Fumu yikuti,
“Chifukwa cha zakwananga zinandinandi
za ŵanthu ŵa ku Mowabu,
ine kuti ndirekenge kuŵalanga chara.
Iwo ŵakocha viwangwa vya Karonga wa ku Edomu
mpaka vikazgoka vyoto.#Yes 15.1—16.14, 25.10-12; Yer 48.1-47; Eze 25.8-11; Zef 2.8-11
2Ntheura nditi nditume moto pa charu cha Mowabu
ndipo wamkocha malinga gha msumba wa Keriyoti.
ŴaMowabu wamkufwira mukati mu mphomo ya nkhondo,
mukati mu chiwawa na kulizga zimbata.
3Uyo wakuŵawusa ndizamkumukomera mu msumba,
nduna zakhe zose ndamkuzikoma pamoza nayo.”
Ntheura ndimo yikuyowoyera Fumu.
Chilango pa ŵaYuda
4 Fumu yikuti,
“Chifukwa cha zakwananga zinandinandi
za ŵaYuda,
ine kuti ndirekenge kuŵalanga chara.
Iwo ŵaghapata marango gha Fumu,
ŵalije kusunga malangulo ghane.
Ŵachiuta ŵa utesi awo ŵawiskewokuru ŵakasopanga
ndiwo ŵaŵapuruska.
5Ntheura nditi nditume moto
pa charu cha Yuda,
ndipo wamkocha malinga gha Yerusalemu.”
Chilango pa ŵaIsraele
6 Fumu yikuti,
“Chifukwa cha zakwananga zinandinandi
za ŵaIsraele,
ine kuti ndirekenge kuŵalanga chara.
Iwo ŵakuguliska ŵarunji na siliva,
ndipo ŵakavu pa mtengo wa skapato ziŵiri.
7Iwo ŵakukandirizgira ŵakavu mu fuvu,
na kukanchizgira mu mphepete mwa nthowa awo ŵakusuzgika.
Mwana na wiske ŵakwendezgana na mwali yumoza,
mwakuti ŵakukazuzga zina lane lituŵa.
8Ŵanthu aŵa ŵakujigoneka waka
pafupi na jochero lirilose,
pa vyakuvwara ivyo ŵakapoka nga nchikhole.
Mu Nyumba ya Chiuta wawo
ndimo ŵa ku mwera vinyo
leneilo ŵanthu ŵakalipira pa mrandu.
9“Ndipouli ine ndine nkhaparanya ŵaAmori
apo ŵaIsraele wakiziranga,
nangauli ŵaAmori ŵakaŵa ŵataliŵatali
nga ndi makumi gha milanje.
Iwo ŵakaŵa ŵankhongono
nga ndi makuni gha misoro.
Nkhaparanya vipambi vyawo muchanya
ndiposo na misisi yawo kusi.#Mar 3.8-11
10Imwe ŵaIsraele, ine ndine nkhamufumiskani mu Eguputo,
ndine nkhamurongozgani mu mapopa virimika 40,
kuti mutore charu cha ŵaAmori kuŵa chinu.
11Ndine nkhasankha ŵanji mu ŵana ŵinu,
kuti ŵaŵe nchimi.
Nkhasankhaso ŵanji mu ŵanyamata ŵinu,
kuti ŵaŵe ŵaNaziri.
Imwe ŵaIsraele, kasi ndi ntheura chara?”
Ntheura ndimo yikuyowoyera Fumu.#Kup 6.1-8
12Kweni imwe mukaŵamweska vinyo ŵaNaziri ŵara,
ndipo mukalangula nchimi kuti,
“Mungachimanga chara!”
13“Wonani, ndizamkumunyekezgerani pasi mu malo ghinu,
nga gareta ilo lanyekezgekera pasi na mphundwe.
14Chiponosko chamkuzgeŵa uyo ngwa luŵiro.
Uyo ngwa nkhongono wizamkuŵavye nkhongono,
chinkhara chizamkujithaska chara.
15Uyo ndi nkhwantha pakulasa na uta,
wamkuchintha chara.
Uyo ndi mupusu pakuchimbira
wamkuthaska umoyo wakhe chara.
Uyo wakukwera pa hachi
nayoso wamkuthaska umoyo wakhe chara.
16Uyo ngwa kukhwima mtima mukati mu vinkhara,
wamkuchimbira wali nkhule mu zuŵa leneilo.”
Ntheura ndimo yikuyowoyera Fumu.
Currently Selected:
Amosi 2: Tumbuka
Highlight
Share
Copy
Want to have your highlights saved across all your devices? Sign up or sign in
Bible Society of Malawi
