Amosi 1
1
1Agha ndi mazgu gha Amosi uyo wakaŵa yumoza wa ŵaliska ŵa mberere ku Tekowa agho wakapokera kwizira mu mboniwoni. Ghakuphara na vya ŵaIsraele virimika viŵiri pambere chindindindi chindize. Apa pakaŵa pa nyengo iyo Uziya wakaŵa karonga wa charu cha Yuda, ndiposo na apo Yerobowamu, mwana wa Yowashi, wakaŵa karonga wa charu cha Israele.#2 Kar 15.1-7; 2 Mid 26.1-23; 2 Kar 14.23-29
2Amosi wakati,
“Fumu yikubangura ku Ziyoni,
mazgu ghakhe ghakududumira kufumira ku Yerusalemu.
Ndicho chifukwa maluhari ghakomira
ndipo utheka pa Phiri la Karimele ukufota.”
Chilango pa ŵaSiriya#Yoy 3.16
3 Fumu yikuti,
“Chifukwa cha zakwananga zinandinandi
za ŵanthu ŵa ku Damaseko
ine kuti ndirekenge chara kuŵalanga.
Iwo ŵakuyuzga ŵanthu ŵa ku Gileyadi
pakuŵatimba na chisulo.#Yes 17.1-3; Yer 49.23-27; Zak 9.1
4Ntheura nditi nditume moto
pa mbumba ya Hazayele,
ndipo wamkocha malinga gha Beni Hadadi.
5Ndamkuphyora mphingirizgo za Damaseko,
ndizamkumara petu awo ŵakukhara mu Dambo la Aveni
ndiposo na uyo wakuwusa ku Beti Edeni.
ŴaSiriya ŵamkuyorekera ku umikori
kuruta ku charu cha Kiri.”
Ntheura ndimo yikuyowoyera Fumu.
Chilango cha ŵaFilisiti
6 Fumu yikuti,
“Chifukwa cha zakwananga zinandinandi
za ŵanthu ŵa ku Gaza
ine kuti ndirekenge chara kuŵalanga.
Iwo ŵakayorera ku umikori mtundu wa msuma wa ŵanthu,
na kuwupereka ku charu cha Edomu.#Yes 14.29-31; Yer 47.1-7; Eze 25.15-17; Yoy 3.4-8; Zef 2.4-7; Zak 9.5-7
7Ntheura nditi nditume moto
pa viliŵa vya msumba wa Gaza,
ndipo wamkocha malinga ghakhe.
8Ndizamkumara petu awo ŵakukhara mu msumba wa Ashidodi
ndiposo na uyo wakuwusa mu msumba wa Ashikeloni.
Ndamkuwulanga msumba wa Ekuroni,
ndipo ŵaFilisiti awo ŵakakharako ŵamkumara petu.”
Ntheura ndimo Fumu Chiuta wakuyowoyera.
Chilango pa ŵanthu ŵa msumba wa Ture
9 Fumu yikuti,
“Chifukwa cha zakwananga zinandinandi
za ŵanthu ŵa ku Ture,
ine kuti ndirekenge chara kuŵalanga.
Iwo ŵakutorera mtundu wa msuma wa ŵanthu ku umikori ku charu cha Edomu,
kwambula kusungilira phangano la ubali wawo.#Yes 23.1-18; Eze 26.1—28.19; Yoy 3.4-8; Zak 9.1-4; Mat 11.21-22; Luk 10.13-14
10Ntheura nditi nditume moto
pa viliŵa vya msumba wa Ture,
ndipo wamkocha malinga ghakhe.”
Chilango pa ŵaEdomu
11 Fumu yikuti,
“Chifukwa cha zakwananga zinandinandi
za ŵanthu ŵa ku Edomu
ine kuti ndirekenge chara kuŵalanga.
Iwo ŵakaŵachimbizga ŵabali uku ŵakorera lupanga,
na kureka kuŵa na chiwuravi na iwo.
Nyengo zose mitima yawo yikatukutwa na ukari
ndipo ŵakakwiya kwambula kugowoka.#Yes 34.5-17, 63.1-6; Yer 49.7-22; Eze 25.12-14, 35.1-15; Oba 1-14; Mal 1.2-5
12Ntheura nditi nditume moto
pa msumba wa Temani,
ndipo wamkocha malinga gha ku Bozira.”
Chilango pa ŵaAmoni
13 Fumu yikuti,
“Chifukwa cha majuvyo gha ŵaAmoni
agho ghakukulirakulira
ndipo chifukwa cha zakwananga zawo zinandinandi,
nditi ndirekenge chara kuŵalanga.
Iwo pakukhumba kukuzga charu chawo,
ŵakafulumura ŵanakazi ŵa zinthumbo mu charu cha Gileyadi.#Yer 49.1-6; Eze 21.28-32, 25.1-7; Zef 2.8-11
14Ntheura ndamkupemba moto
pa viliŵa vya msumba wa Raba,
ndipo wizamkocha malinga ghakhe.
Na kupoma kukuru pa zuŵa lira la nkhondo,
ŵarwani ŵizamkurwa na ukari
nga ndi chimphupuru icho chiza na kavuruvuru.
15Karonga wawo wamkutorekera ku umikori,
iyo pamoza na nduna zakhe.”
Ntheura ndimo yikuyowoyera Fumu.
Currently Selected:
Amosi 1: Tumbuka
Highlight
Share
Copy
Want to have your highlights saved across all your devices? Sign up or sign in
Bible Society of Malawi
