Milimo ya Ŵakutumika 26

Paulosi wakujivikirira panthazi pa Karonga Agripa

1Ntheura Karonga Agripa wakati kwa Paulosi, “Wazomerezgeka kuti uyowoye wekha.” Penepapo Paulosi wakawuska woko lakhe wakamba kujivikirira wakati,

2“Nkhujipima kuŵa wa mwaŵi chomene pakujivikirira ndekha muhanya uno panthazi pinu, imwe Karonga Agripa, mu vyose ivyo ŵaYuda ŵakundipacha navyo, 3chifukwa chakuti imwe mukughamanya chomene maluso ghose gha ŵaYuda, na ivyo ŵakususkana. Ntheura nkhumupemphani kuti, munditegherezge, na kuzizipizga kose.

4“Umoyo wane umo ukaŵira kufuma ku uwukirano wane, umo nkhakhalira kufuma pa kwamba apo nkhakharanga pamoza na mtundu wane na mu Yerusalemu, ukamanyikwa na ŵaYuda wose. 5Ŵakhara ŵakundimanya kwa nyengo yitali, mwakuti, usange ŵakukhumba ŵangapereka ukaboni kuti pa umoyo wane wose ndakhara muFarisi wa chipani icho chili nganganga pakurondezga maluso gha chisopo chithu.#Mil 23.6; Fil 3.5 6Sono nkhwimilira pano kuti ndiyeruzgike chifukwa nkhugomezga mu phangano ilo Chiuta wakapangana na ŵasekuru ŵithu. 7Ndi phangano leneilo mafuko ghithu 12 ghakugomezga kupokera nga ndi umo ŵakufwirirapo kusopa Chiuta muhanya na usiku. Mwa ŵakuchindikika, ndi chifukwa cha chigomezgo ichi rekani ŵaYuda ŵakundipacha. 8Chifukwa uli waliyose wa imwe wakughanaghana kuti nchambula machitiko kuti Chiuta wakuwuska ŵanthu ŵakufwa?”

9“Ine nane nkhakhorweskeka kuti nkhwenera kuchita vinthu vinandi pakulimbana na zina la Yesu wa ku Nazarete.#Mil 8.3, 22.4-5 10Ndipo nkhavichita nadi mu Yerusalemu. Nkhapoka mazaza kufuma ku ŵasofi ŵarara na kuŵajalira mu gadi ŵanthu ŵa Chiuta ŵanandi. Para kukadumurika kuti ŵakomeke, ine nkhazomerezga. 11Nyengo zinandi nkhaŵaranganga mu nyumba zose zakusoperamo. Nkhayezganga chomene kuŵachichizga kuti ŵatuke. Nkhaŵakwiyira chomene mwakuti nkhaŵazikizga mpaka na mu misumba ya chilendo.

Paulosi wakwandula umo wakazgokera

(Mil 9.1-19, 22.6-16)

12“Ntheura nkharuta ku Damaseko na mazaza gha ŵasofi ŵarara. 13Na muhanya pakati, mwe karonga, apo nkhaŵa pa nthowa, nkhawona ungweru kufuma kuchanya wakubuta kujumpha ungweru wa dazi ndipo ukandizingirizga ine na wose awo ŵakaŵa nane. 14Tose tikawa pasi ndipo nkhapulika mazgu ghakuyowoya nane mu chiHebere ghakuti, ‘Sauli Sauli! Kasi ukundizikizgirachi? Ukujipweteka wekha pakujitimba pa lunkhanjo.’ 15Ntheura nkhafumba nkhati, ‘Ndimwe ŵanjani, Fumu?’ Ndipo Fumu yikati, ‘Ndine Yesu, uyo ukumuzikizga. 16Kweni wuka, ndipo wimilire, pakuti ndakuwonekera pa chifukwa ichi kuti ndikwimike kuŵa muteŵeti na kaboni wa ivyo wandiwoneramo na wa ivyo nditi ndijirongoreremo kwa iwe. 17Ndamukukuthaska ku ŵanthu ŵakwinu na ku ŵamitundu wuwo kwa ŵeneawo nkhukutumako, 18kuti ukajure maso ghawo mwakuti ŵawereko ku mdima na kwiza ku ungweru, ndiposo kufuma ku nkhongono ya Satana na kwiza kwa Chiuta, mwakuti ŵapokere chigowokero cha zakwananga na kupokeraso malo pamoza na awo mbakutuŵiskika chifukwa cha chipulikano mwa ine.’

Paulosi wakuŵarongosorera ŵaYuda na ŵamitundu za mlimo wakhe

19“Ntheura, imwe Karonga Agripa, kuti nkhaŵa wa mutafu chara ku mboniwoni ya kuchanya. 20Kweni nkhadanga kupharazga ku awo ŵali ku Damaseko, pamanyuma mu Yerusalemu, na mu chigaŵa chose cha Yudeya, ndiposo na ku ŵamitundu, kuti ŵakwenera kuzgoka mtima, na kwiza kwa Chiuta, na kuchita milimo yakurongora kung'anamuka kwawo.#Mil 9.20, 28-29 21Ndicho chifukwa ŵaYuda ŵakandikorera ine mu Nyumba ya Chiuta ndipo ŵakakhumba kundikoma. 22Kweni ndovwirikanga na Chiuta kufikira muhanya uno. Ntheura nkhwimilira pano kupereka ukaboni ku wose, ŵakuzirwa na ŵambula kuzirwa wuwo. Nkhuyowoya ivyo nchimi na Mozesi ŵakayowoya kuti vichitikenge, 23kuti, Mesiya wakwenera kukomwa, na kuŵa wakudanga kuwuka ku ŵakufwa, mwakuti wapharazge ungweru wa chiponosko ku ŵaYuda na ku ŵamitundu wuwo.” #Yes 42.6, 49.6; 1 Kor 15.20

Paulosi wakuzgora Fesito na Agripa

24Apo Paulosi wakajivikiriranga ntheura, Fesito wakachemerezga wakati, “Paulosi, wafuntha! Kusambira kwako kwa pachanya ndiko kukukufunthiska!”

25Kweni Paulosi wakazgora wakati, “Mwa ŵakuchindikika ŵa Fesito, ine kuti ndafuntha chara! Kweni nkhuyowoya mazgu ghaweme gha unenesko.” 26Ŵa Karonga Agripa ŵakumanya vinthu, ndicho chifukwa chakhe nkhuyowoya na chikanga pa maso pawo. Nkhugomezga nadi kuti palije mwa vinthu ivi, icho ŵakureka kumanya chifukwa chinthu ichi kuti chikachitikira ku ubende chara. 27Imwe Karonga Agripa, kasi mukugomezga nchimi? Nkhumanya kuti mukugomezga!

28Agripa wakati kwa Paulosi, “Kasi ukughanaghana kuti mu nyengo yichoko waka iyi ungandizgora kuŵa mukhristu?”

29Paulosi wakazgora wakati, “Nanga yingaŵa nyengo yichoko waka, panji nyengo yitali, icho nkhuromba pera kwa Chiuta nchakuti, imwe pera chara, kweni na wose awo ŵakundipulikizga muhanya uno waŵe nga ndine, kupatulako maunyoro agha.”

30Penepapo karonga, mukuru wa chigaŵa, Berenike na ŵanthu wose ŵakawuka. 31Ŵakati ŵafumamo ŵakayowoyeskana ŵakati, “Munthu uyu wakuchitapo na kamoza chara kakumwenereska nyifwa panji kujalirika mu gadi.” 32Agripa wakati kwa Fesito, “Munthu uyu wate wasutulikenge, warekenge kuyowoya kuti mrandu wakhe urute kwa karonga wa ku Romu.”

Currently Selected:

Milimo ya Ŵakutumika 26: Tumbuka

Highlight

Copy