Milimo ya Ŵakutumika 18

Paulosi ku Korinte

1Pamanyuma pa ivi, wakafumamo mu Ateni ndipo wakaruta ku Korinte. 2Kwenekura wakasangako muYuda zina lakhe Akwila, muPontu. Iyo wakafika waka kufuma ku Italiya na muwoli wakhe Prisira, chifukwa Kilaudiyo wakalangula kuti ŵaYuda wose ŵafumemo mu Romu. Ndipo Paulosi wakaruta kuya kaŵawona, 3ndipo pakuti umisili wawo ukaŵa umoza, wakakhara nawo ndipo ŵakateŵetanga pamoza pakuti mlimo wawo ukaŵa wakusona mahema. 4Pa zuŵa la Sabata lirilose Paulosi wakadumbiskananga na ŵanthu mu nyumba ya kusoperamo, kuti wakhorweske ŵaYuda na ŵaGriki.

5Sila na Timote ŵakati ŵafika kufuma ku Makedoniya, Paulosi wakatangwanika na kupharazga pakuŵapanikizgira ŵaYuda kuti Yesu ndi Mesiya. 6Para ŵaYuda ŵakimikana nayo na kumutuka, wakakhung'untha vyakuvwara vyakhe ndipo wakaŵaphalira wakati, “Ndopa zinu ziŵe pa mitu yinu! Ine ndilije mrandu. Kwamba sono nkhuruta ku ŵamitundu.” 7Ntheura wakawukako kura na kuruta ku nyumba ya munthu munyakhe zina lakhe Tito Yusto. Iyo wakaŵa wakusopa Chiuta, ndipo nyumba yakhe yikaŵa pafupi na nyumba ya kusoperamo. 8Krisipo, murara wa nyumba ya kusoperamo wakapulikana mwa Fumu pamoza na ŵa mu nyumba yakhe yose. ŴaKorinte ŵanandi nawo ŵakati ŵamupulika Paulosi ŵakapulikana, ndipo wakabapatizika.

9Zuŵa linyakhe na usiku Fumu yikamuphalira Paulosi mu mboniwoni yikati, “Ungopanga, kweni pharazganga waka, ndipo ureke kukhara chete. 10Chifukwa ndili nawe. Ndipo kulije munthu na yumoza uyo wakuwukirenge kuti wakupweteke, pakuti ndili nawo ŵanthu ŵanandi mu msumba uwu.” 11Ntheura wakakhara mu msumba ura chirimika chimoza na myezi yinkhonde na umoza, wakasambizganga mazgu gha Chiuta mukati mwawo.

12Apo Galiyo wakaŵa nduna ya Akaya, ŵaYuda na mtima umoza ŵakamukora Paulosi na kuya nayo panthazi pa ŵeruzgi, 13ŵakati, “Munthu uyu wakukhuŵirizga ŵanthu kuti ŵasope Chiuta mu nthowa yambula kuzomerezgeka na dango.”

14Kweni apo Paulosi wakatenge wayowoye, Galiyo wakaŵaphalira ŵaYuda wakati, “Mwe ŵaYuda, uŵenge mrandu wakuti wanangira dango, panyakhe wananga chinthu chakofya, mphanyi changuŵa chakwenerera kuti ndimupulikani. 15Kweni sono pakuti mukupindana waka pa vya mazgu, mazina na dango linu, ipo dumulani mwekha. Ine nkhukana kuti ndiŵe mweruzgi wa makani agha.” 16Ntheura wakaŵafumya mu mphara. 17Ntheura wose ŵakamuwukira Sositene, murara wa nyumba ya kusoperamo na kumutimba panthazi pa ŵeruzgi. Kweni Galiyo kuti wakalorako na vyose ivi chara.

Paulosi wakuwerera ku Antiyoke

18Paulosi wakakhara mu Korinte mazuŵa ghanandiko. Pamanyuma wakalayirana nawo ŵakhristu na kulowokera ku Siriya pamoza na Prisira na Akwila. Ku Kenkereya, Paulosi wakameta sisi lakhe, pakuti wakachita chirapo. #Kup 6.18 19Ŵakafika mu Efeso, ndipo wakaŵareka kwenekura. Kweni iyomwene wakaya kanjira mu nyumba ya kusoperamo na kudumbirana na ŵaYuda. 20Para ŵakamufumba kuti wakharepo nawo nyengo yitaliko, iyo kuti wakazomera chara. 21Kweni apo wakaŵarekanga wakati, “Ndamkuweraso kwa imwe usange ndi khumbo la Chiuta.” Ntheura wakafumako ku Efeso mu ngaraŵa.

22Wakati wafika pa dowoko la Kesareya, wakaruta kuya katauzga ŵakhristu, ndipo wakakhilira ku Antiyoke. 23Wakati wakharamo mazuŵa ghanji mu msumba ura, wakawukamo. Wakenda na kusorota mu malo ghakupambanapambana mu vigaŵa vya Galatiya na Firigiya, kukhomeska ŵasambiri wose.

Apolo ku Efeso na ku Korinte

24Sono muYuda yumoza zina lakhe Apolo, uyo wakababikira ku Alekizandiriya wakafika ku Efeso. Wakaŵa munthu wakumanya kuyowoya ndipo wakaŵa nkhwantha pa Malembo ghatuŵa. 25Iyo wakasambizgika mu nthowa ya Fumu, ndipo na phamphu likuru mu mzimu, wakayowoyanga na kusambizga vya Yesu makora chomene, nangauli wakamanya ubapatizo wa Yohane pera. 26Wakamba kuyowoya na chikanga mu nyumba ya kusoperamo. Para Prisira na Akwila ŵakamupulika, ŵakamutorera ku kwawo, ndipo ŵakamurongosorera makora nthowa ya Chiuta. 27Para Apolo wakakhumbanga kwambukira ku Akaya, ŵakhristu ŵakamukhwimiska ndipo ŵakaŵalembera ŵakhristu ŵanyawo ŵa ku Akaya kuti ŵamupokerere. Wakati wafika, wakawovwira chomene awo mu uchizi wa Chiuta ŵakapulikana. 28Pakuti iyo wakaŵasuska ŵaYuda mwa nkhongono pa mzinda, pakuŵarongora kufuma mu malembo kuti Yesu ndi Mesiya.

Currently Selected:

Milimo ya Ŵakutumika 18: Tumbuka

Highlight

Copy