ZEKHARIAH 14
14
Malang Ccyh Rhawtuknaw te Nyathya Taenaw
1 Bawipaw ccyh tuh anae vae, tuin ccyh kyakhe ae luade oh paw nae uccaw kha nae malang khe a neekuh cih hae. 2Jerusalem kha tuk khylan minphuin hae balyn kha ka suelua cih hae zah khuapi kha a lah cih hae, inn hae kha a luade cih hae zah nopi hae kha kyngdete a ikhae cih hae; khuaccaaw hae angankuh kha kyngte a cciakhae cih hae, thuasalama a laehy hae paw kha tuh khuapi kyate vua thua lan khyh hae. 3Te Bawipaw tuh yn toikuh cih zah, rhaw a tuk nin lya hawte khah-e minphuin hae kha a tuk cih hae. 4Tuin nin vae tuh a ccu tuh Jerusalem nithua lang umpaw Oliv Mua vawlan a thadyn cih; Oliv Mua tuh nithua lang te niccaw lang cia ccangning lang akoi cih zah myarya kopaw accya lang a tang cih; tetuh Mua angankuh tuh thahlang a nuekuh cih zah, angankuh tuh alia lang a nuekuh cih. 5Te Bawipaw mua accya kin te na ccue cih oh, pawccecize mua hae laku e accya tuh Azal cia aphah cih; Judah siapharan Uzziah ccyh lyaze innrysuekuhpaw kyate na ccue lya oh hawte na ccue cih oh. Tetuh Bawipaw ka Pachia tuh a mithyaa hae balyn ryte oun cceih cih hae.
6Tuin nin vae tuh khuaccih te dangtui mah um vae lan khyh. 7Khuadae kyalya po a um cih (tuh-e tuh Bawipaw nynh a nyh), khuazi te khuadae cite um vae lan khyh, pawccecize zete ccyh kya awnaw a um cih. 8Tuin nin vae tuh Jerusalem kyate hiinnaw tui apou cih, tuh-e tui angankuh tuh nithua lang e rili kalan alua cih zah, angankuh tuh niccaw lang e rili kalan alua cih; hawnin te khuaccih kya po alua cih.#Eze 47.1; Joh 7.38; Bya 22.1
9 Bawipaw tuh laephi pynpi kya siapharan lang a tang cih; tuin nin vae tuh Bawipaw tuh ccangkheit kyalyapaw Bawipaw , a min minkheit kyalyapaw min athua cih.
10Ram pynpi tuh Geba khua kyate Jerusalem alia lang e Rimmon khua kyacia bialae lang rae athua cih. Thuasalama Jerusalem tuh a umnaw hmin kya po umte hangthung athua cih zah, Benjamin Koikua kyate langmawlya e koikua hmin kyacia, Apaki Koikua kyacia, Hananel Innhangpaw kyate Siapharan misu mianaw khu kyacia athua cih. 11Jerusalem tuh ccungccaw a um cih zah, ronaw kha kharouh teing vae lan khyh; khyndadyh lan a um cih.#Bya 22.3
12Jerusalem a doutu minphuin hae balyn kyakhe Bawipaw nynh hynh-e shethya hynh a thuasah cih: Mih ccu te a thadyn lya hae mawkhe mih ngesaw athuh cih; mih mitkarung lungkhu e mih mit tuh athuh cih zah, mih khalang lungkhu e mih lae tuh athuh cih. 13Tuin nin khe Bawipaw nynh yn sawpaw siikunaw alepaw nynh minmin kha a thuanua cih hae, mimaw te mimaw a kyngkuh cih hae zah, lu kheit te lu kheit rhawkute a theihkuh cih hae; 14Judah hae nynh heize Jerusalem kya rhaw a tuk cih hae. A pepan e minphuin hae sisua kha luadete suelua athua cih—sui, ngun te boeining patae kha suelua athua cih. 15Tuhcihawpaw shethya tuh rhaw hae kya-e ryahmin hae kya um hae paw marang hae, lann dihpaw hae, kalauh hae, lann hae te sarangpaw miakaw kya a thua cih.
16Te Jerusalem a doutu hae kya-e a hiinhy hae paw tuh Siapharan, vaaw Bawipaw kha beik khylan te bu poi kha tua khylan kum takyhte Jerusalem lang a cceih cih hae. 17Siapharan, vaaw Bawipaw kha beik khylan Jerusalem lang a cceihthung leipaw laephi vaw e minphuin ccangkhakheit a um lanze, tuh-e hae tungvaw kya khuaarah lan khyh. 18Izip hae nynh cciathung leite khuapi lungkhu lang a tee khyh hae ze, bu poi tua lan a cceihthung leipaw minphuin hae tungvaw kya Bawipaw nynh a thuasahpaw shethya tuh mih tungvaw kya a thua cih. 19Tuhcihawpaw shethya tuh bu poi tua khylan a cceihthung leipaw minphuin hae tungvaw te Izip tungvaw kya detahnaw a thua cih.
20Tuin nin vae tuh marang khinling hae vawlan khe, “Bawipaw hanlan athyaapaw,” cite zei athua cih. Bawipaw inn kya umpaw ang hae tuh silawhang malang umpaw pakekhupaw hae hawte athyaa cih hae; 21Jerusalem te Judah ram kya umpaw ang hae tuh vaaw Bawipaw hanlan a thyaa cih hae, tuhteze nynh silawtu balyn tuh oun thua cih hae zah, silawnawpaw saw kha thung nawlan tuh-e ang hae tuh a mang cih hae. Tuin nin kyate tuh vaaw Bawipaw inn kya kungku hae paw um vae lan khyh hae.
Currently Selected:
ZEKHARIAH 14: ZB16
Highlight
Share
Copy
Want to have your highlights saved across all your devices? Sign up or sign in
Zotung Bible © Bible Society of Myanmar, 2016.
