ZEKHARIAH 13
13
1Tuin nin khe David ciihan te Jerusalem khuaccaaw hae mih seinaw te mih nungsikunaw kha ccikan nawlan tuidy ccangkheit aphyh cih.
Zohtuh Beiknaw Vuanaw
2Vaaw Bawipaw nynh a hopaw tuh, tuin nin khe zohtuh hae min kha liathui athua vae khyh nawlan ram kyate ka vua cih; profeh hae te athyaa leipaw muisaw hae kha mah ram kyate ka vua cih hae. 3Profeh lukhakheit tuh bua yn langku lanze, amaw a saahkuhtu hae a nung te a paaw nynh, “Nang tuh Bawipaw min te hynbya na ho keiccuze na hiin vae lan khyh,” cite a hopah cih hae zah, profehbya a ho lyakhe a saahkuhtu hae a nung te a paaw nynh amaw kha po zua lan a thuing cih hae. 4Tuin nin vae tuh profeh hae tuh profehbya a ho vae hae ze, minmin lu kheit cci nynh a muih hae paw mih vizin keiccu mih maethah cih; milae kha ling khylan saming angkiccua kha kikuh vae lan khyh hae, 5minmin lu kheit cci nynh, “Kae tuh profeh ka thua khyh, loophopaw nynh ka thua; ka di lya mawte laephi te a vuekuakuhpaw nynh ka thua,” cite a ho cih hae. 6Te lukhakheit nynh, “Na by kya-e vaemaw hynh paw keiccu mou athua?” cite a khia hae ze, “Ka ban hae inn kya ka muepaw vaemaw nynh thua,” cite a khung cih hae.
Tuurin Detahnaw, Tuu hae Phiakunaw
7Pou thaloi, kae te ryalahkheihpaw,
ka tuurinpaw kha
rawsete thonuaku tua, cite
Vaaw Bawipaw nynh a ci.
Tuu hae tuh phiariphiarae a um ccaw hae,
tuurinpaw kha ziatua;
tuu taraw hae kha rawsete
ka kuih ka maeleihnua cih hae.#Mat 26.31; Mar 14.27
8 Bawipaw nynh a hopaw tuh,
ram pynpi kya
ccungccaw pum thum pum ning kha
vuate ro athua cih hae zah,
pum thum pum kheit tuh
a laehy cih hae.
9Te pum thum pum kheit tuh
maee lungkhu ka nung cih hae zah,
ngun kha thyaasah hawte
ka thyaasah cih hae,
sui kha syntawtua hawte
ka syntawtua cih hae.
Minmin nynh ka min kha
yn ko cih hae zah ka oi cih hae.
Kae nynh, “Minmin tuh
ka ccungccaw hae nynh
thua hae,” cite ka ho cih zah,
minmin nynh, “Bawipaw tuh
kae Pachia nynh thua,” cite a ho cih hae.
Currently Selected:
ZEKHARIAH 13: ZB16
Highlight
Share
Copy
Want to have your highlights saved across all your devices? Sign up or sign in
Zotung Bible © Bible Society of Myanmar, 2016.
