ZEKHARIAH 10
10
Judah te Israel Kithuinaw
1Hawkhuaa araw ccyh kya
Bawipaw kalan khuaa kha ngia oh,
khise maeking kha rae zah
nanning hanlan khuaa a rawsahpaw te
ccungccaw miakaw hanlan
loo kya aku a posahpaw tuh
Bawipaw nynh thua.
2Terafim khozi hae nynh
accakaepaw bya kha ho hae zah
apawe hae paw nynh
akyh leipaw vizin kha a muih hae;
maansahthya hae paw nynh
akyh leipaw maan kha sah hae zah,
accakaepaw ngaengannaw kha a pya hae.
Tukeiccuze ccungccaw hae tuh
tuu hae hawte khiavuikuh hae zah,
tuurin a um khyh keiccuze a teing hae.
3Tuurin hae tungvaw ka thinria,
cciakhaetu hae kha de ka tah cih hae;
vaaw Bawipaw nynh a tuuphu,
Judah hae kha do-oih hae zah,
huhan a hoipaw rhawtuknawpaw
a marang lang a rae cih hae.
4Apaki lang e abyapi huapaw lung thuasah,
bu saknawpaw pangreih thuasah,
rhawtuknawpaw li thuasah,
rhawbawi miakaw thuasah
minmin kyate oun langkuh cih hae.
5Minmin tuh rhaw hae kha
laanpi e tuiccua kya a syde hae paw
rhawtuknaw kya-e
rhawkaw hae hawte athua cih hae.
Bawipaw tuh mih kya a um keiccuze,
minmin nynh rhaw a tuk cih hae zah,
marang ccikuh hae paw
rhawkaw hae kha
maethya a bong cih hae.
6Kae nynh Judah hae kha
thawzung ka pya cih hae zah,
Josef phin hae kha ka khum cih hae.
Minmin kha ngaethya
ka umsah hae keiccuze ka kikhae cih hae zah,
ka vua boi lei hae paw hawte athua cih hae;
pawccecize kae tuh Bawipaw mih Pachia
ka thua zah, mih bya kha
ka thaepah cih hae.
7Te Efraim ccungccaw hae tuh
rhawkaw hae hawte athua cih hae zah,
misutui neihpaw hawte mih lungtua cih.
Mih ccaaw hae nynh tuh-e tuh
a muih cih hae zah mih lungpaw cih,
Bawipaw kya mih lungtua cih.
8Minmin kha ka shawkhaw vae hae keiccuze
syntawnaw pyate ka ko cih hae zah
ka suelua cih hae,
minmin tuh atakaw lya
a lung hae hawte a lungthui cih hae.
9Minphuin ccangpaw hae kya
phiariphiarae ka nung hae zemah,
asawnaw e ram hae kyakhe
kae kha yn liathui cih hae,
mih ccaaw hae kha
a do-oih cih hae zah a kithui cih hae.
10Izip ram kyate mih inn lang
ka kikhae cih hae zah
Assiria ram kyate ka suelua cih hae;
Gilead ram te Lebanon ram lang
ka cciakhae cih hae,
minmin hanlan umnaw
azaw lei lan ciate a lung cih hae.
11Riathaenaw rili kha a zua cih hae zah,
rili tuileih kha detah athua cih,
Nal vawpi akhunaw balyn tuh arou cih.
Assiria a lysakunaw kha
biabung athua cih zah,
Izip huhan tuh azo cih.
12Minmin kha Bawipaw liate
a thungpaw lang ka rae cih hae zah,
a min liate a cceih cih hae, cite
Bawipaw nynh a ci.
Currently Selected:
ZEKHARIAH 10: ZB16
Highlight
Share
Copy
Want to have your highlights saved across all your devices? Sign up or sign in
Zotung Bible © Bible Society of Myanmar, 2016.
