FILEMON 1
1
Beihlangnaw
1Jesu Khri keiccu thong a ccahpaw Paul te kae unopaw Timote nynh kae sungsahpaw te rya kae lahkheihpaw Filemon kalan, 2kae sungsahpaw Apfia te rhawkaw kae tangkheihpaw Arkhippas kalan te na inn kya a pumkuh hae paw khriccaawbuu kalan ccaw kae ky oh.#Kol 4.17
3Ah Paaw Pachia te Bawipaw Jesu Khri kya-e thawccinaw te daenaw tuh nae kya la um sah.
Filemon Ozia
4Ka sawsangnaw kya nang kha kae lia takyhte, ka Pachia kalan lungtuabya zungzae ka ho. 5Pawccecize Bawipaw Jesu Khri na zynnaw te mithyaa hae balyn na sungsahnaw hae kha ka thae. 6Khri hanlan aening kya umpaw ahoypaw uccaw miakaw kha nynaw liate na zynnaw na neethung hae paw tuh ccungkiapaw lang a tang nawlan saw kae sang. 7Ka sungsahpaw ka neitaw, na hoipaw sungsakunaw nynh lungtuanaw te thawzung patae yn pya, pawccecize nang nynh mithyaa hae kha mih lung na tuasah hae.
Onesimas hanlan Ngiapyanaw
8Tukeiccuze kawpya lan accanpaw kha Khri liate rawhoyte kae pya ngan zemah, 9a kum mah tang vae zah atu lya Khri Jesu keiccu thong mah a ccahpaw kae, Paul nynh sungsakunaw keiccu ngiate kae ngia paleih. 10Thong yn sawnaw hae kya ka saahkupaw ka ccapaw Onesimas hanlan nang kha kae ngia.#Kol 4.9 11Langmawlya aning tuh na hanlan ccungkia khyh, thuasalama atu tuh na hanlan te ka hanlan ccungkia vae, 12amaw kha na kalan bua kae saw, tukeiccuze amaw kha leh la khan; tuh-e tuh kamaw ka thinlung kya-e nynh thua. 13Thehoypaw keiccuze thong ka ccaw lungkhu aning nynh namaw ccelang rya yn lawpya nawlan amaw kha ka kya ka umsah rypaw nynh thua. 14Thuasalama na nawccawpaw tuh nangse keiccu thua leite, lungthote na cyipaw kha ka ryhua, na nawccaw leite pawsang ka cyih ry khyh. 15Aning nynh na kyate sosoh a la toikupaw tuh amaw kha zungzae na hoi nawlan athua khopaw nynh thua. 16Atu tuh see lu kheit hawte thua vae leite, see lae ahang lante la ccou ccavae, abyapi lante kamaw hanlan sungsahpaw uno nynh athua vae; pynsaw lante thuasah, Bawipaw kya thuasah na hanlan pawcihmou houh sungsahpaw thua lan accan.
17Tukeiccuze kae hynh ah mungkuhpaw lu kheit lante nae tua ze, amaw hynh kamaw hawte la ccou. 18Na tungvaw a cyisei ze, tuhkhyhze hankhakheit laebah ae um ze, tuh-e tuh kae nynh laebah ka umpaw lante la tua. 19Tuh-e laebah tuh kae pyaru cih cite hynh-e hynh kae, Paul nynh kamaw ka kuih te ka zeipaw nynh thua. Tuhzemah namaw na hiinnaw heize ka kya laebah na um cipaw kae hopah khyh. 20Athua, ka neitaw, na kyate thanenaw kha Bawipaw kya mue ka ry, Bawipaw min te nang nynh ka lung yn tuasah. 21Nang nynh kaw na la ngae cih cite zynkunaw ka hoi zah, e ccaw hynh na kalan kae zei, ka hopaw lae heize na la cyih cih cite ka zyn.
22Ka thuanaw lanpaw hmin kha mah yn la paccynpah; pawccecize nae sawsangnaw liate nae kalan thuanaw kaw ka mue cih cite ka ngaehoi.
Nyathya Beihlangnaw
23Khri Jesu kya kamaw ryte thong kae ccahkheihpaw Epafras nynh nang kha ae beihlang.#Kol 1.7, 4.12 24Kamaw ryte rya kae lahkheih hae paw Marka, Aristarkhas, Demas te Luka nynh ae beihlang hae.#Loc 12.12, 25, 13.13, 15.37-39, 19.29, 27.2; Kol 4.10, 14; 2Ti 4.10, 11
25Ah Bawipaw Jesu Khri kya-e thawccinaw tuh nae muisaw kya la um vae sah. Amen.
Currently Selected:
FILEMON 1: ZB16
Highlight
Share
Copy
Want to have your highlights saved across all your devices? Sign up or sign in
Zotung Bible © Bible Society of Myanmar, 2016.
