HEBRU Byalaanmaw
Byalaanmaw
Hebru hae kalan Ccaky hynh doukunaw houh lung zah Khriccaaw zynnaw oun poutaw sei hae zya ci keiccuze kypaw nynh thua. Jesu Khri tuh byaccing te Pachia kya-e nyathya phykunawpaw nynh thua cipaw langsakunaw liate masaty e mih zynnaw kha ccawzeitu nynh thaw a pyanaw hae paw nynh thua. Tuhcite a honaw kya byaccing ccangthum a langsaku:
(1) Jesu tuh zungzaete Pachia Ccapaw thua zah teingnaw kha a taeningnaw liate Paaw kaw a ngae ccaccingpaw nynh thua. Jesu tuh Pachia Ccapaw athua thyhawte Byakin Ryn kya-e profeh hae, vaaw hae te Moses laeze mah ahang huapaw nynh thua. (2) Jesu tuh Byakin Ryn kya-e silawtu hae laeze mah zungzae silawtu lante Pachia nynh a phy vae. (3) Jesu liate zyntu tuh seinaw, rinaw te chinaw kyate khum athua; Jesu tuh Silawtu Lupi athua hawte khumnaw ccaccing a pyatu nynh thua; Hebru beiknaw phunglang te sarangpaw silawkunaw hae nynh khumnaw kha a muinsan muihsahnaw kyalya a la langsaku hae.
Byaria 11 lungkhu Israel hae phungpaw kya-e minthaan hae paw zynnaw tousenaw kha lawte ccawzeitu nynh a ccawriatu hae kha mih zynnaw kya atyn nawlan hae a tuhou hae. Byaria 12 kya a ccawriatu hae kha athangnaw cia zynnaw kya tyn oh lah, pawcih runaw te vawsawnaw oun thua zemah Jesu kha do oh cite a tuhou hae. Tuanaw pyanaw te raeringnaw pyanaw te ccauh kha a thangsah.
Alungkhu Umpaw
Byalaanmaw: Khri tuh Pachia phykunaw accingnaw — 1.1-3
Vaaw hae laeze Khri hanghuanaw — 1.4—2.18
Joshua te Moses laeze Khri hanghuanaw — 3.1—4.13
Khri silawtu thuanaw hanghuanaw — 4.14—7.28
Khri byakinnaw hanghuanaw — 8.1—9.22
Khri silawnaw hanghuanaw — 9.23—10.39
Zynnaw aleihpaw — 11.1—12.29
Pachia lungrynaw — 13.1-19
Athangnaw sawsang — 13.20-21
Bya thangnaw — 13.22-25
Currently Selected:
HEBRU Byalaanmaw: ZB16
Highlight
Share
Copy
Want to have your highlights saved across all your devices? Sign up or sign in
Zotung Bible © Bible Society of Myanmar, 2016.