JOHAN 4

Jesu te Samarianung

1Jesu nynh Johan laeze ccungccaw alunghua kha zuitu lang tangsah hae zah baptisma a pya hae cipaw kha Farasi hae nynh a thae vae hae cite Jesu nynh he a nyh tuh, 2(Jesu amaw ccaccei nynh baptisma pya khyh hae, a zuitu hae nynh baptisma a pya hae), 3Judea pee kha cciataw zah Galilee ram lang a ki. 4Jesu nynh Samaria ram kha po a cciapaw bia. 5Jakob nynh a ccapaw Josef a pyapaw laekua pe, Samaria ram kya-e Saikhar a ci hae paw khua kya a thua.#Gen 33.19; Jos 24.32 6Tuin kya Jakob tuisung a um. Jesu tuh khua a ccongnaw kyate a bang keiccuze tuisung pe kya a haung. Accyh tuh ninthu loukaw nynh thua.

7Samarianung tuh tui the lan yn cceih zah Jesu nynh, “Nia lanpaw tui yn pyabua,” a cipya. 8(Pawccecize a zuitu hae tuh aepaw re lan khualae lang a cceih hae.) 9Samarianung nynh, “Nang tuh Judah paw na thua zah kae tuh Samarianung nynh ka thua, pawccemou tui nia lanpaw nae ngiaku?” a cipya. (Pawccecize Judah hae tuh Samaria hae te ccuepekuh khyh hae.)#Ezr 4.1-5; Neh 4.1-2 10Jesu nynh, “Pachia lasung hynh na la ny lanze thuasah, te, ‘Nia lanpaw tui yn pyabua,’ cite nang ae citupaw hynh hum nynh thua cipaw na ny lanze thuasah amaw hynh na ngiakuh paleih cih zah aning nynh hiinnaw tui kha ae pya cih paw lahyn,” a cipya. 11Nopinung nynh, “Bawipaw, tui thenaw lanpaw bangting na hoi khyh, tuisung tuh akhu; paw kyate mou tuh-e hiinnaw tui tuh na lah cih? 12Kae minpaaw Jakob nynh e tuisung hynh kaening oun pya; amaw te a ccaaw hae te a sahiin hae nynh e tuisung kya-e tui hynh a nia hae; nang tuh Jakob laeze na lesaehua tou?” a cipya. 13Jesu nynh, “Humhung zemah hynh-e tui a neihpaw tuh tui bua a haw cih, 14thuasalama kae nynh ka pya lanpaw tui a neihpaw ccungccaw tuh a tuihaw boi vae lan khyh. Kae nynh ka pya lanpaw tui tuh tuh-e paw kya zungzae hiinnaw hanlan aphyhthungpaw tuidy athua cih,” a cipya. 15Nopinung nynh, “Bawipaw, ka tuihaw vae khyh ccaw, tui the lan hynhlang mah ka ccia vae khyh ccaw tuh-e tui tuh yn pyabua,” a cipya.

16Jesu nynh, “La cceih, na vawpaw kha yn ko lah hynhlang yn thuakhae,” a cipya. 17Nopinung nynh, “Vawpaw ka hoi khyh,” a ci. Jesu nynh, “ ‘Vawpaw ka hoi khyh,’ na cipaw tuh ahmepaw nynh na ho. 18Pawccecize nang tuh vawpaw lu pangaw na hoi vae, atu na hoipaw hynh na vawpaw thua khyh. Na hopaw bya tuh ahmepaw nynh thua!” a cipya. 19Nopinung nynh, “Bawipaw, nang tuh profeh lu kheit nynh na thua cipaw ka ny. 20Kaening kae minpaaw hae nynh hynh-e mua vawlan hin a la beik hae; thuasalama nanning Judah hae nynh Pachia tuh Jerusalem khua kya beik lanpaw nynh thua na ci oh,” a ci. 21Jesu nynh, “Nopinung, kae hynh yn zyn, nanning nynh hynh-e mua vawlan thua leite, Jerusalem kya mah thua leite Paaw kha nae beik ccyh oh yn thua cih. 22Nanning nynh na ny lei oh paw kha na beik oh, kaening tuh kae nypaw kha kae beik, pawccecize khumnaw tuh Judah hae kyate nynh yn thua. 23Thuasalama Pachia a beik ccaccing hae paw nynh Paaw kha muisaw te thuasah, byaccing te thuasah oun beik hae ccyh yn thua cih, tuh-e ccyh tuh atumaw yn thua vae. Pawccecize Paaw nynh khahcihawpaw ccungccaw hae kha amaw a beiktu lang a ccung hae. 24Pachia tuh Muisaw thua zah a beik hae paw nynh muisaw te byaccing te a beik cih hae,” a ci. 25Nopinung nynh, “Khri a ci hae paw Messiah tuh yn thua vae cih cipaw ka ny; he yn thua te kaening kha pawpaw balyn pong yn hopah cih,” a cipya. 26Jesu nynh, “Na kya bya a hopaw kae hynh Messiah nynh ka thua,” a cipya.

27Tuh ccyh lyakhe a zuitu hae oun thua hae zah nopinung ryte bya a hoku hae paw kha mih ngaeangthua. Tuhzemah hum nynh sanmah, “Pawmou na peki? Pawccemou hynh-e nung te bya na hoku oh?” cite khia khyh hae. 28Nopinung nynh a dawre kha cciataw zah khualae lang ki zah ccungccaw hae kyakhe, 29“Ka cyi boi paw balyn marya yn hopahpaw ccungccapaw hynh, rang oh lah oun dotua oh! Aning hynh Messiah thua vema?” a cipya hae. 30Ccungccaw hae tuh khua lungkhu te pou hae zah Jesu kalan a cceih hae.

31Tuh ccyh lyatuin zuitu hae nynh Jesu kha, “Sazae, ae hin,” cite a hopya hae. 32Thuasalama Jesu nynh minmin kha, “Nanning nynh na ny lei oh paw ae lanpaw looh ka hoi,” a cipya hae. 33Tukeiccuze zuitu hae nynh, “Lukhakheit nynh aepaw a ccyngpya vae vosi?” cite a hoku hae. 34Jesu nynh minmin kha, “Ka looh tuh kae yn sawtupaw rynaw cyi lanpaw te a ryalaw thangsah lanpaw hynh nynh thua. 35‘Sawpaw sah pali a um ung, tukoute loohrue ccyh yn thua vae cih,’ na ci oh. Thuasalama nanning kae hopya oh, loo hae hynh hoyte dotua oh, looh tuh phe voi vae zah rue ccyh azaw vae! 36Looh a ruepaw tuh ryalaw mee kha mue zah zungzae hiinnaw hanlan athae kha a ccakhungku; tuhteze nynh ccacii a vuapaw te looh a ruepaw tuh parouhte mih lungtua kalang cih. 37Ou tuhte, ‘Lukheitpaw nynh ccacii vua zah mingccangpaw nynh looh a rue,’ cite a ho hae paw bya tuh hein kyahin akyh. 38Naemaw nynh rya na law leinaw oh kya looh na rue ccaw oh cite nanning kha kae saw oh; mingccang hae nynh ryalah hae zah nanning nynh mih ryalaw lungkhu lang na tee vae oh,” a cipya hae. 39Nopinung nynh, “Kae nynh ka cyi boi paw balyn kha pong yn hopya,” cite ccaekia a khan keiccuze tuh-e khua kya um hae paw Samaria hae patae nynh Jesu kha a zyn hae. 40Tukeiccuze Samaria hae nynh a kalan oun cceih hae zah, kae kya um hin, cite a ngia hae; Jesu tuh tuin kya nin ning a um. 41A bya liate ccungccaw hae houhouh lung lan a zyn hae. 42Minmin nynh nopinung kha, “Nang nynh na hopaw keiccu atu kae zynpaw thua vae khyh; pawccecize kaemaw ccaccei nynh a bya kha kae thae zah, e paw tuh laephi Khumtu ccaccing nynh thua cipaw kae ny,” a cipya hae.

43Tuin kya nin ning a um koute Jesu tuh pou zah Galilee pee lang a cceih. 44Pawccecize, “Profeh tuh amaw ram kya sawtuanaw mue khyh,” cite Jesu amaw ccaccei nynh ccaekia a khan vae.#Mat 13.57; Mar 6.4; Luk 4.24 45Jesu tuh Galilee lang he a thua tuh Galilee ccungccaw hae nynh amaw kha lehkhan hae, pawccecize minmin mah poi kalan cceihbua hae zah Jerusalem khua poi kya Jesu nynh a cyipaw balyn kha a muihbua hae.#Joh 2.23

Bawi Lu Kheit Ccapaw A Dansah

46Te Jesu tuh tui kha misutui lang a raenaw Galilee pee Kana khua lang bua a thua. Kapernaum khua kya a ccapaw accihpaw bawi lu kheit a um.#Joh 2.1-11 47Tuh-e paw nynh Judea pee kyate Galilee pee lungkhu lang Jesu yn thua cipaw he a thae tuh, a kalan cceih zah vyavya chihpaw a ccapaw kha ccianuate a dansah nawlan thawte a ngia. 48Jesu nynh, “Nanning nynh muihsahnaw hae te ngaeangnaw hae hynh na muih khyh oh ze na zyn lan khyh oh,” cite tuh-e bawi tuh a hopya. 49Tuh-e bawi nynh, “Bawipaw, ka ccapaw a chi maw beih yn cceihbung,” a cipya. 50Jesu nynh, “La cceih ccavae, na ccapaw tuh a hiin cih,” a cipya. Jesu nynh a hopyapaw bya kha tuh-e paw nynh zyn zah a cceih. 51Aning nynh a cciabung cciamang lyakhe a see hae nynh oun cciadue hae zah, “Na ccapaw phe dan vae,” cite a hopya hae. 52Aning nynh a ccapaw a danhua ccyh kha khia hae zah minmin nynh, “Inkhawnin ninthu suimilan ccangkheit kya a ngesaw akyaa vae,” a cipya hae. 53Tuh-e ccyh tuh Jesu nynh, “Na ccapaw tuh a hiin cih,” cite a cipya ccyh nynh thua cipaw kha a paaw nynh a ny. Tukeiccuze amaw te a innbyn hae balyn nynh a zyn hae. 54E tuh Jesu nynh Judea pee kyate Galilee pee lang a thua koute bua a raepaw vaeningnaw muihsahnaw nynh thua.

Currently Selected:

JOHAN 4: ZB16

Highlight

Copy