JOHAN 5

Bethesda Kuaa kya Dansahnaw

1Tukoute Judah hae poi ccangkheit um zah Jesu tuh Jerusalem lang a cceihthung.

2Jerusalem kya Tuu Koikua pe khe Hebru bya te Bethzatha a ci hae paw kuaa ccangkheit um zah, tuh-e kuaa kyatuin bu bupangaw a um. 3Tuh-e bu hae kyatuin a mitmohpaw, a ccukhoupaw, kuihccuchih hae paw te ccinaw hoipaw ccungccaw patae nynh tui yn theku lanpaw kha ngawte a huekuh hae. 4Pawccecize vaawpaw nynh ccyhkhakheit kya kuaa lungkhu lang rungbung zah tui kha a piasah; tuhte tui he a pia koute masaty a phungkuhpaw tuh a ccinaw kha phe a dan. 5Sung thum kum tarya cia a ccihpaw lu kheit tuh tuin kya a la um. 6Tuh-e paw phang a huekuhpaw kha Jesu nynh muih zah, tuin kya khaw cia a um vae cipaw he a nyh tuh, “Na dan ry tou?” cite a khia. 7Ngeccihpaw nynh, “Bawipaw, tui he yn pia vae ze kuaa lungkhu lang yn phungbua lanpaw ccungccaw ka hoi khyh, he ka ccia lyakhe mingccangpaw nynh ka malang te phe leih a phungku,” cite a khung. 8Jesu nynh, “Thokuh, na iphae kha lawkuh lah cceih ccavae,” a cipya.

9Vaekheihmawte ccungccapaw tuh a dan, a iphae kha lawkuh zah a cceih vae. Tuh-e nin tuh sabbath nin nynh thua. 10Tukeiccuze Judah hae nynh dannaw a muetupaw kha, “Sabbath nin nynh thua, na iphae lawku lan ccan khyh,” a cipya hae.#Neh 13.19; Jer 17.21 11Thuasalama aning nynh, “Kae yn dansahtupaw nynh, ‘Na iphae kha lawkuh lah cceih ccavae,’ yn cipya,” cite a khung hae. 12Minmin nynh, “ ‘Na iphae kha lawkuh lah cceih ccavae,’ ae cipahpaw tuh hummou?” cite a khia hae. 13Dannaw a muetupaw nynh Jesu kha hum nynh thua cipaw nyh khyh; pawccecize tuin kya ccungccaw patae um hae zah Jesu tuh zya a pou vae. 14Tukoute Jesu nynh tuh-e paw tuh beikinn kya muih zah, “Dotua, nang tuh phe na dan vae! Na tungvaw kya houh athah huapaw uccaw a thua khyh nawlan la sei nan vae,” a cipya. 15Tuh-e paw nynh cceih zah amaw a dansahpaw tuh Jesu nynh thua cite Judah hae kha a hopya hae. 16Tuh-e tuh sabbath nin kya a cyi keiccuze Judah hae nynh Jesu kha a tuaa a sah hae. 17Thuasalama Jesu nynh minmin kha, “Ka Paaw tuh atu cia ryalah zah kae mah rya ka lah,” cite a khung hae. 18E kong keiccuze Judah hae nynh amaw kha chia lan cite houh a nounuaku hae, pawccecize aning nynh sabbath nin a ro kyalya thua leite Pachia kha mah ka Paaw ci zah tuhte amaw te amaw kha Pachia te a ngingsaku, a ci hae.

Ccapaw Kawhoinaw

19Jesu nynh minmin kha, “Byaccaccing kae hopya oh, Ccapaw nynh amaw kaw te pawsang mah cyih kho khyh, a Paaw nynh a cyipaw a muihpaw rou kha nynh a cyi kho; pawccecize Paaw nynh a cyipaw miakaw kha Ccapaw nynh mah a cyibua. 20Pawccecize Paaw nynh Ccapaw kha sungsah zah amaw nynh a cyipaw balyn kha Ccapaw marya a muihsah; nanning nae ngaeangthua nawlan hynh-e hae laeze ale huapaw ryalaw hae kha Ccapaw kha a muihsah ung cih. 21Pawccecize Paaw nynh a chih hae paw kha thoosah zah a hiinsah hae hawte, Ccapaw nynh mah a rypaw ccungccaw hae kha a hiinsah hae. 22Pawccecize Paaw nynh hum ccungccaw sanmah byapia khyh, byapianaw miakaw kha Ccapaw kalan marya a pya. 23Tuhteze nynh ccungccaw balyn nynh Paaw kha saw a tua hae hawte Ccapaw kha mah saw a tua cih hae. Ccapaw kha saw a tua leipaw ccungccaw tuh Ccapaw a sawtupaw Paaw kha saw a tua leipaw nynh thua. 24Byaccaccing kae hopya oh, ka bya thae zah kae yn sawtupaw a zynpaw ccungccaw tuh zungzae hiinnaw a hoi; byapianaw ing vae lan khyh, chinaw kyate hiinnaw kalan phe a sulue vae.

25“Byaccaccing kae hopya oh, a chih hae paw nynh Pachia Ccapaw roi oun thae cih hae zah roi a thae hae paw nynh oun hiinnaw hae ccyh tuh yn thua cih, tuh-e ccyh tuh atu mah a thua vae. 26Pawccecize Paaw nynh amaw kya hiinnaw a hoi hawte, Ccapaw nynh mah amaw kya hiinnaw a hoi nawlan kaw a pya. 27Ccapaw tuh Ccungccaw Ccapaw athua keiccuze byapianaw kaw kha mah a pya. 28E konglang hynh nae ngaeangthua nan sah; pawccecize shaw hae kya a um hae paw balyn nynh a roi oun thaenaw hae ccyh yn thua cih, 29hoynaw a rae hae paw tuh hiinnaw thoothuinaw kalan, hoyleinaw a rae hae paw tuh seibyapianaw thoothuinaw kalan oun pou cih hae.#Dan 12.2

Jesu Ccaekia hae

30“Kae tuh kamaw kaw te pawsang ka cyih kho khyh. Ka thae thyhte bya ka pia; ka byapianaw tuh ahme, pawccecize kamaw rynaw kha ka ccung khyh, kae yn sawtupaw a rynaw kha nynh ka ccung.

31“Kae nynh kamaw konglang kha ccaekia ka khan lanze ka ccaekia tuh kyh khyh. 32Kamaw konglang ccaekiakhantu mingccangpaw a um, aning nynh kae ka konglang ccaekia a khanpaw tuh akyh cipaw ka ny. 33Nanning nynh locceihtu hae kha Johan kalan na saw oh zah aning nynh byaccing hanlan ccaekia a khan.#Joh 1.19-27, 3.27-30 34Kae tuh ccungccaw kyate ccaekia ka mue khyh, thuasalama nanning tuh khum na thua ccaw oh cite hynh-e bya hynh ka ho. 35Johan tuh aruapaw te a awpaw maeekhua nynh thua; nanning tuh amaw a awnaw kyakhe sosoh hoysah lan na ry oh. 36Thuasalama kae tuh Johan kya-e laeze ale huapaw ccaekia ka hoi; phe thang lan law lan cite Paaw nynh yn pyapaw ryalaw hae kha kae nynh ka law, tuh-e ryalaw hae nynh kae tuh Paaw nynh a sawpaw cipaw kha ccaekia a khan hae. 37Kae yn sawtupaw Paaw amaw ccaccei nynh mah kamaw konglang ccaekia a khan. Nanning nynh a roi kha na thae boi khyh oh, a muinsan mah na muih boi khyh oh zah#Mat 3.17; Mar 1.11; Luk 3.22 38a bya mah nae kya tyn khyh; pawccecize aning nynh a sawpaw kha na zyn khyh oh.

39“Ccathyaa kya zungzae hiinnaw kae mue cih cite na tua oh zah Ccathyaa kha thawte na ccung oh; Ccathyaa tuh kamaw konglang ccaekia a khanpaw nynh thua. 40Thuasalama hiinnaw hoi khylan ka kalan nae cceih ry khyh oh. 41Kae tuh ccungccaw hae kyate phu-enaw ka ccou khyh. 42Thuasalama nae kya Pachia sungsahnaw na hoi khyh oh cipaw ka ny. 43Kae tuh ka Paaw min te kae thua zah leh nae khan khyh oh; mingccangpaw nynh amaw min te yn thua lanze, tuh-e paw tuh leh na khan cih oh. 44Lu kheit te lu kheit pyakupaw thehoynaw kha na ccou ry oh zah amaw kyalya Pachia athuapaw kyate yn thuapaw thehoynaw kha na ccung lei oh paw nanning tuh pawtemou na zyn kho cih oh? 45Kae nynh Paaw malang kya nanning kha sei oun be cih cite tua nan oh; nanning nynh na ngaehoiku oh paw Moses nynh nanning kha sei ae be cih oh. 46Moses kha na zyn oh ze, kae hynh phe nae zyn cih oh paw, pawccecize aning nynh kamaw konglang nynh a zei. 47Thuasalama aning nynh a zeipaw kha na zyn khyh oh ze, pawtemou ka bya hynh na zyn kho cih oh?” a cipya hae.

Currently Selected:

JOHAN 5: ZB16

Highlight

Copy